រាជធានីភ្នំពេញ ៖ ភាពជាដៃគូរយៈពេល ២៥ ឆ្នាំរវាងក្រុមហ៊ុន ហ៊ិននីគែន ខេមបូឌា និងក្រុមហ៊ុន ដឹកជញ្ជូន និងភស្តុភារក្នុងស្រុក…
រាជធានីភ្នំពេញ ៖ ភាពជាដៃគូរយៈពេល ២៥ ឆ្នាំរវាងក្រុមហ៊ុន ហ៊ិននីគែន ខេមបូឌា និងក្រុមហ៊ុន ដឹកជញ្ជូន និងភស្តុភារក្នុងស្រុក ជីអូលីង គ្រុប (Geolink Group) បានរួមចំណែកផ្លាស់ប្តូរឧស្សាហកម្មដឹកជញ្ជូន ដោយបានកំណត់ស្តង់ដាថ្មី ប្រកបដោយប្រសិទ្ធភាព សុវត្ថិភាព និងនិរន្តរភាពនៅក្នុងវិស័យភស្តុភារ នៅក្នុងប្រទេសកម្ពុជា ។
ភាពជាដៃគូនេះបានចាប់ផ្តើម ក្នុងអំឡុងពេលដែលវិស័យភស្តុភារនៅប្រទេសកម្ពុជាមិនទាន់មានរចនាសម្ព័ន្ធជឿនលឿននៅឡើយ ។ ពេលនោះ ដំណើរការចែកចាយផលិតផល មិនទាន់មានភាពស្របគ្នា និងសុក្រិត ដោយសារតែភ្នាក់ងារតំណាងចែកចាយ និងដេប៉ូ ត្រូវមកទទួល និងប្រមូលផលិតផលដោយផ្ទាល់ ដែលបានបង្កនូវបញ្ហាទាក់ទងនឹងស្តង់ដានៃតម្លៃ ។
ជាមួយនឹងចក្ខុវិស័យរួមគ្នា ក្រុមហ៊ុន ហ៊ិននីគែន ខេមបូឌា និងជីអូលីង បានបង្កើតនូវប្រព័ន្ធភស្តុភារ និងដឹកជញ្ជូនមួយដែលរៀបចំការចែកចាយផលិតផលរបស់ក្រុមហ៊ុនកាន់តែជឿនលឿន មានប្រព័ន្ធមួយច្បាស់លាស់ ដើម្បីធ្វើឲ្យការចែកចាយផលិតផលកាន់តែមានប្រសិទ្ធភាព និងអាចជឿទុកចិត្តបាន ។
លោកឧកញ៉ា វ៉ាន គិមឆន ប្រធាន និងជានាយកប្រតិបត្តិរបស់ក្រុមហ៊ុន ជីអូលីង មានប្រសាសន៍ថា «ក្រុមហ៊ុន ហ៊ិននីគែន ខេមបូឌា និង ជីអូលីង គ្រុប មានចក្ខុវិស័យរួមគ្នាក្នុងការផ្លាស់ប្តូរ និងធ្វើទំនើបកម្មវិស័យភស្តុភារ» ។ «នៅពេលចាប់ផ្តើមដំបូង ដំណើរការមួយនេះ គឺពិតជាពិបាក យើងត្រូវពន្យល់ទៅកាន់ដៃគូដែលជាដេប៉ូ និងហាងនានា អំពីអត្ថប្រយោជន៍នៃបណ្តាញចែកចាយប្រកបដោយសុវត្ថិភាព និងនិរន្តរភាពមួយនេះ ។ ទោះជាយ៉ាងណាក៏ដោយ តាមរយៈកិច្ចសហការ និងការតាំងចិត្តដ៏មុតមាំ យើងបានបង្កើតប្រព័ន្ធមួយដោយជោគជ័យ និងបានជំរុញកំណើនអាជីវកម្មរបស់យើងទាំងពីរ» ។
ការសហការនេះ បានធ្វើឲ្យមានការលូតលាស់រួមគ្នា ដោយក្រុមហ៊ុន ជីអូលីង បានចាប់ផ្តើមជាមួយនឹងបុគ្គលិកចំនួន ៣៩ នាក់ ប៉ុណ្ណោះ តែបច្ចុប្បន្ននេះមានបុគ្គលិកកើនឡើងមក ៤៥៩ នាក់ ហើយ ជីអូលីងបានលូតលាស់ជាក្រុមហ៊ុនឈានមុខក្នុងការផ្តល់ដំណោះស្រាយផ្នែកដឹកជញ្ជូន និងភស្តុភារនៅកម្ពុជា ។
ការជំរុញវប្បធម៌សុវត្ថិភាព និងនវានុវត្តន៍
លោក Andy Hewson អគ្គនាយកនៃក្រុមហ៊ុន ហ៊ិននីគែន ខេមបូឌា មានប្រសាសន៍ថា «ភាពជាដៃគូរយៈពេលវែងរបស់យើងជាមួយ ជីអូលីង បង្ហាញពីការសហការមួយដែលបង្កើតតម្លៃ និងផលវិជ្ជមានទៅវិញទៅមកសម្រាប់ឧស្សាហកម្ម សេដ្ឋកិច្ច និងដៃគូអាជីវកម្មរបស់យើង» ។ «យើងពិតជាអរគុណ ដល់ក្រុមហ៊ុន ជីអូលីងចំពោះការសហការដ៏ល្អមួយនេះចំពោះប្រតិបត្តិការរបស់យើង ក៏ដូចជាការអភិវឌ្ឍ និងការច្នៃប្រឌិតជាបន្តបន្ទាប់របស់ពួកគេ ដើម្បីធានាបាននូវសុវត្ថិភាព និងប្រសិទ្ធភាពនៃការងារ» ។
ភាពជាដៃគូនេះបានដើរតួយ៉ាងសំខាន់ក្នុងការធ្វើទំនើបកម្មនៃការដឹកជញ្ជូនរបស់ ជីអូលីង ដោយជាក់ស្តែងក្នុងពេលបច្ចុប្បន្ននេះ ក្រុមហ៊ុនមានរថយន្តជាច្រើនដែលមានស្តង់ដាខ្ពស់ ដោយផ្លាស់ប្តូរពីរថយន្តធុនតូចដែលមានចំណុះពី ១,៥ តោន ទៅ ៣,៥ តោន ទៅជារថយន្តទំនើបដែលមានចំណុះ ១៩ តោន, ៣៥ តោន និងរហូតដល់ ៤០ តោន។ លើសពីនេះ ជីអូលីង ក៏មាននូវរថយន្តបើកស្លាប (Wing-body Truck) ផងដែរ ដែលផ្លាស់ប្តូរពីការលើកដាក់ទំនិញដោយប្រើកម្លាំង មកប្រើប្រាស់ រថយន្ត Forklift វិញ ដែលនេះបានធានានូវប្រសិទ្ធភាពការងារ ធានាបាននូវល្បឿន និងសុវត្ថិភាពរបស់បុគ្គលិក ។
នៅក្រុមហ៊ុន ហ៊ិននីគែន ខេមបូឌា សុវត្ថិភាពគឺជាអាទិភាពចម្បងសម្រាប់រាល់ប្រតិបត្តិការទាំងអស់ ជាក់ស្តែងត្រូវបានអនុវត្តតាម “Life Saving Rules” របស់ក្រុមហ៊ុនដែលបានបន្តអនុវត្តទៅដល់ដៃគូសហការរបស់ក្រុមហ៊ុនទាំងអស់។ ក្រុមហ៊ុន ជីអូលីង បានប្រកាន់ខ្ជាប់នូវ ប្រព័ន្ធគ្រប់គ្រងសុវត្ថិភាពនៃការដឹកជញ្ជូន (RTSMS) ដើម្បីកាត់បន្ថយគ្រោះថ្នាក់ និងធានាការគោរពច្បាប់ ។
ក្រុមហ៊ុន ជីអូលីង បានពង្រឹងកម្មវិធីបណ្ដុះបណ្ដាល និងជ្រើសរើសអ្នកបើកបររបស់ខ្លួន ដោយរួមបញ្ចូលនូវគោលការណ៍សុវត្ថិភាពចរាចរណ៍ រួមមាន ការវាយតម្លៃអំពីកាយសម្បទា ផ្លូវចិត្ត ការធ្វើតេស្តគ្រឿងស្រវឹង និងគ្រឿងញៀ.នដ៏តឹងរ៉ឹង ។ លើសពីនេះ ក្រុមហ៊ុនបានណែនាំប្រព័ន្ធ “Glass Run” ដែលជាកម្មវិធីឌីជីថលរួមបញ្ចូល GPS ដែលអនុញ្ញាតឱ្យមានការត្រួតពិនិត្យការដឹកជញ្ជូនតាមពេលវេលាជាក់ស្តែង ធានាបាននូវប្រតិបត្តិការទាន់ពេលវេលា និងតម្លាភាពនៃប្រតិបត្តិការពេញលេញ។
លោក ប៊ុន សំណាង ប្រធានផ្នែកប្រតិបត្តិការនៃក្រុមហ៊ុន ជីអូ លីង បានចែករំលែកថា «ពីមុន យើងត្រូវល់កដាក់ទំនិញ និងផលិតផល ដោយកម្លាំងកម្មករ ដែលពេលខ្លះមិនសូវមានសុវត្ថិភាពនោះទេ ព្រោះវាមានទម្ងន់ធ្ងន់។ ឥឡូវនេះ ជាមួយនឹងរថយន្តដឹកទំនិញ និងបច្ចេកវិទ្យាទំនើបៗ ការងាររបស់យើងកាន់តែងាយស្រួល និងមានសុវត្ថិភាពជាងមុន» ។
ការជម្រុញនិរន្តរភាពទៅមុខ
ទោះបីជាក្រុមហ៊ុន ជីអូលីង ជាក្រុមហ៊ុនក្នុងស្រុកក្តី ប៉ុន្តែក្រុមហ៊ុនបានប្រកាន់ខ្ជាប់នូវស្តង់ដាអន្តរជាតិ ជាពិសេសនោះនិរន្តភាពជាស្នូលនៃប្រតិបត្តិការរបស់ក្រុមហ៊ុនផ្ទាល់ ។ ការប្តេជ្ញាចិត្តរួមគ្នាចំពោះផ្នែកនិរន្តភាពនេះ បានពង្រឹងបន្ថែមនូវភាពជាដៃគូដ៏យូរអង្វែងរបស់ជីអូលីង និងក្រុមហ៊ុន ហ៊ិននីគែន ខេមបូឌា ។ គម្រោងដ៏សំខាន់មួយនៅក្នុងកិច្ចសហប្រតិបត្តិការនេះគឺគំនិតផ្តួចផ្តើម “Returnable Glass Bottle” (RGB) ដែលត្រូវបានរចនាឡើងដើម្បីលើកកម្ពស់ចក្រាវិស័យ និងកាត់បន្ថយកាកសំណល់ ដែលនេះពង្រឹងការប្តេជ្ញាចិត្តរបស់ឧស្សាហកម្មចំពោះការទទួលខុសត្រូវផ្នែកបរិស្ថាន ។ ខណៈពេលដែលការចាប់ផ្តើមដំបូងតម្រូវឱ្យមានការណែនាំ និងពន្យល់ដល់ដៃគូពាក់ព័ន្ធជាច្រើនយ៉ាងណាក្តី ក៏ជីអូលីងបានចាប់យកគម្រោងនេះដោយមិនរាករេ ។ ហេតុនេះហើយ ក្រុមហ៊ុនហ៊ិននីគែន បានជឿជាក់ និងទុកចិត្ត ជីអូលីងដើម្បីគ្រប់គ្រងដំណើរការទាំងមូល នៅពេលចាប់ផ្តើមគម្រោងនេះដំបូងក្នុងឆ្នាំ ២០២៣ ។ លោក ឡេង ចំណាន នាយកគ្រប់គ្រង នៃក្រុមហ៊ុន ជីអូលីង បានចែករំលែកថា “ចាប់តាំងពីពេលនោះមក បារ និងភោជនីយដ្ឋានជាង ១៨០០ បានចូលរួមក្នុងគំនិតផ្តួចផ្តើមនេះ ហើយថ្ងៃនេះ Geolink ធានានូវការប្រមូលប្រកបដោយប្រសិទ្ធភាព ធានាការសម្អាតជាបឋម ដើម្បីបន្តឲ្យក្រុមហ៊ុន ហ៊ិននីគែន ខេមបូឌាបន្តសម្អាតតាមស្តង់ដាត្រឹមត្រូវ និងប្រើប្រាស់ម្តងទៀត ។
អំពីក្រុមហ៊ុន ហ៊ិននីគែន ខេមបូឌា
ក្រុមហ៊ុន ហ៊ិននីគែន ដែលជាក្រុមហ៊ុនផលិតស្រាបៀរឈានមុខគេនៅលើពិភពលោក ដែលជាក្រុមហ៊ុនស្រាបៀរ និងក្រុមហ៊ុនវិនិយោគឈានមុខនៅកម្ពុជាតាំងពីឆ្នាំ ១៩៩៤ ។ ជាមួយគោលបំណងបង្កើតការរួបរួមគ្នាជាធ្លុងមួយ ដើម្បីជម្រុញពិភពលោកមួយកាន់តែប្រសើររ ក្រុមហ៊ុនហ៊ិននីគែន ហ៊ិននីគែន ខេមបូឌា មានម៉ាកយីហោស្រាបៀរចំនួន ៥ រួមមាន ស្រាបៀរ Heineken ® ស្រាបៀរ Tiger ស្រាបៀរ ABC ស្រាបៀរ Anchor និងស្រាបៀរ Gold Crown។ ក្រុមហ៊ុនមាននិយោជិតប្រមាណ ៧០០នាក់ និងផ្តល់ការងារដោយប្រយោលជូនប្រជាជនកម្ពុជាចំនួន ៦៦,០០០នាក់នៅទូទាំងច្រវាក់ផលិតកម្មរបស់ខ្លួន ។ តាមរយៈយុទ្ធសាស្ដ្រ «ធ្វើឱ្យប្រទេសកម្ពុជាកាន់តែប្រសើរ» ក្រុមហ៊ុន ហ៊ិននីគែន ខេមបូឌា ប្ដេជ្ញាចិត្ដចូលរួមនិរន្ដរភាពបរិស្ថាន និង ព្រមទាំង សង្គម និងការទទួលទានដោយការទទួលខុសត្រូវ ។ សម្រាប់ព័ត៌មានបន្ថែម សូមចូលទៅកាន់វេបសាយ heinekencambodia.com ។
អំពីក្រុមហ៊ុន Geolink
អស់រយៈពេលជិតបីទសវត្សរ៍មកហើយ ក្រុមហ៊ុន Geolink Logistics គឺជាដៃគូ ប្រកបដោយការជឿទុកចិត្ត ក្នុងការដោះស្រាយ បញ្ហាផ្សេងៗនៅក្នុងទីផ្សារដែលកំពុងវិវត្តន៍របស់កម្ពុជា ។ Geolink បានទទួលនូវទំនុកចិត្តពីអតិថិជនជាច្រើន ដែលជាម៉ាកយីហោធំៗនៅក្នុងពិភពលោក ដូចជា HEINEKEN Cambodia, Chevron, Total Energy, DKSH, Coca-Cola និងម៉ាកផ្សេងទៀត ដែលក្រុមហ៊ុននីមួយៗទាមទារការធ្វើប្រតិបត្តិការទាន់ពេលវេលា សុវត្ថិភាព និងប្រកបដោយវិជ្ជាជីវៈ ។ ជាមួយនឹងប្រព័ន្ធដឹកជញ្ជូនតាមគ្រប់មធ្យោបាយដ៏រឹងមាំ និងមជ្ឈមណ្ឌលដឹកជញ្ជូនដែលមានទីតាំងយុទ្ធសាស្ត្រ Geolink បានផ្តល់នូវដំណោះស្រាយតាមតម្រូវការជាក់ស្តែងរបស់អាជីវកម្មនៅក្នុងប្រទេសកម្ពុជា ៕ អត្ថបទសហការ
ចែករំលែកព័តមាននេះ