រាជធានីភ្នំពេញ ៖ emart24 Inc. និង Saihan Partners Co., Ltd បាន​ប្រារព្ធ​ពិធី​ចុះហត្ថលេខា​ផ្តល់​សិទ្ធិ​ធ្វើ​អាជីវកម្ម​ផ្តាច់មុខ​ដើម្បី​នាំ​យក emart24 ដែល​ជា​ផ្សារ​ទំនើប​ខ្នាត​តូច​របស់​កូរ៉េ​ខាងត្បូង​ មក​កាន់​ប្រទេស​កម្ពុជា កម្មវិធី​នេះ​ប្រព្រឹត្ត​ទៅ​នា​ថ្ងៃ​ទី ១ ខែកុម្ភៈ ឆ្នាំ ២០២៤ នៅសណ្ឋាគារ ហ្វែ​រ​ហ្វៀ​ល បាយ ម៉ា​រៀត ភ្នំពេញ ​។

emart24 Inc. ដែល​ជា​ក្រុមហ៊ុន​បុត្រ​សម្ព័ន្ធ​របស់ Shinsegae Group ដែល​បាន​ដឹកនាំ​ប្រវត្តិសាស្ត្រ​នៃ​ការ​លក់រាយ និង​ចែកចាយ​ទំនិញ​នៅ​ក្នុង​ប្រទេស​កូរ៉េ បាន​ចាប់ផ្តើម​ប្រតិបត្តិការ​របស់​ខ្លួន​ក្នុង​ឆ្នាំ 2013​។ ចាប់តាំងពី​ពេល​នោះ​មក​បាន បើក​ផ្សារ​ទំនើប​ខ្នាត​តូច​ជាង 6,000 រហូត​មក​ដល់​បច្ចុប្បន្ន ហើយ​ត្រូវ​បាន​គេ​ស្គាល់​ថា​ ជា​ផ្សារ​ទំនើប​ខ្នាត​តូច​ដែល​រីក​ចម្រើន​បំផុត ក្នុង​ប្រទេស​កូរ៉េ​ ។ វា​បាន​ចាប់ផ្តើម​ពង្រីក​សក្តានុពល​អាជីវកម្ម​របស់​ខ្លួន​នៅ​ក្រៅប្រទេស​ក្នុង​ឆ្នាំ 2021 ដោយ​បើកហាង​ដំបូង​របស់​ខ្លួន​នៅ​ក្នុង​ប្រទេស​ម៉ា​ឡេ​ស៊ី ហើយ​មិនយូរ​ប៉ុន្មាន​ក៏​បន្ត​បើកហាង​នៅ​សិង្ហ​បុរី​ក្នុង​ឆ្នាំ 2022​ ។

Saihan Partners Co., Ltd ដែល​ជា​ក្រុមហ៊ុន​បណ្តាក់ទុន​រួម​គ្នា​រវាង​ក្រុមហ៊ុន Hanlim Architecture Group របស់​ប្រទេស​កូរ៉េ ជា​ក្រុមហ៊ុន​សេវាកម្ម​អចលនទ្រព្យ​សកល និង​ក្រុមហ៊ុន Saisons Brother Holding Co., Ltd. របស់​កម្ពុជា ដែល​ប្រតិបត្តិការ​អាជីវកម្ម​នៅ​ក្នុង​ប្រទេស​កម្ពុជា​លើ​វិស័យ​ជា​ច្រើន រួម​មាន​បណ្តាញ​ភោជនីយដ្ឋាន ការ​ចែកចាយ​អាហារ និង​ភេសជ្ជៈ សំណង់ ផលិតផល​កសិកម្ម អេ​ឡិច​ត្រូ​និក និង​បច្ចេកវិទ្យា ​។

ហាង​ទី ​១ របស់ emart24 គ្រោង​នឹង​បើកទ្វារ​សម្រាប់​បម្រើសេវា​កម្ម​ជូន​អតិថិជន​កម្ពុជា​នៅ​ក្នុង​ខែមិថុនា ឆ្នាំ 2024 ខាង​មុខ​នេះ ជាមួយនឹង​ទីតាំង​បន្ថែម​ដែល​ត្រូវ​បាន​គ្រោង​សម្រាប់​ការ​ពង្រីក​ជា​យុទ្ធសាស្ត្រ​ពេញ​មួយ​ឆ្នាំ និង​ដំណាក់កាល​ជា​បន្តបន្ទាប់ ​។ ក្រុមហ៊ុន​មាន​ចក្ខុវិស័យ​វែង​ឆ្ងាយ​ចំពោះ​អនាគត ហើយ​មាន​បំណង​បន្តសកម្មភាព​យូរអង្វែង​របស់​ខ្លួន លើ​ទីផ្សារ​លក់រាយ​នៅ​ប្រទេស​កម្ពុជា ​។

emart24 ត្រូវ​បាន​គេ​ស្គាល់​ថា ​ទីកន្លែង​ដែល​ផ្តល់ភាព​ងាយ​ស្រួយ ប្រកបដោយ​គុណភាព និង​ការ​ច្នៃប្រឌិត​របស់​ខ្លួន ជូន​ទៅ​កាន់​អតិថិជន ​។ ផ្សារ​ទំនើប​ខ្នាត​តូច emart24 ផ្តល់​ជូន​អតិថិជន​នូវ​ប្រភេទ​អាហារ​សម្រន់ និង​ភេសជ្ជៈ​ចម្រុះ​ទៅ​ដល់​អតិថិជន ​។ ក្នុង​នាម​ជា​អ្នកត្រួសត្រាយ​ផ្លូវ​នៅ​ក្នុង​ឧស្សាហកម្ម​នេះ emart24 បាន​កំណត់​យ៉ាង​ខ្ជាប់ខ្ជួន​នូវ​ស្តង់ដារ​គុណភាព​ខ្ពស់ ដោយ​ផ្តល់​ជូន​នូវ​ការ​បញ្ចូល​គ្នា​តែ​មួយ​គត់​នៃ​រសជាតិ​ប្រពៃណី​កូរ៉េ និង​ផលិតផល​អន្តរជាតិ​ជា​ច្រើន​មុខ​ផង​ដែរ​ ។ ហាង emart24 Cambodia នឹង​ផ្តល់​នូវ​ការ​រចនា​ហាង​ធំ​ទូលាយ និង​ខ្យល់អាកាស​បរិសុទ្ធ សម្រាប់​អតិថិជន ​។ ដោយ​ប្រើ​បទ​ពិសោធន៍​នៅ​កូរ៉េ​របស់​ខ្លួន​ដើម្បី​បម្រើសេវា​កម្ម​យ៉ាង​ល្អ​ឥត​ខ្ចោះ​ជូន​អតិថិជន ម៉ាក​យីហោ​នេះ​គ្រោង​នឹង​លេចធ្លោ​ចេញពី​គូប្រជែង​នានា ដោយ​ផ្តល់​ជូន​នូវ​អាហារ​ប្រពៃណី​កូរ៉េ ស្ថានីយ៍​កាហ្វេ​ស្រស់ អាហារ​សម្រន់​កូរ៉េ​ផ្តាច់មុខ​ពី​ស្លាក​យីហោ​ឯកជន​របស់​ខ្លួន និង​ផលិតផល សម្រស់​កូរ៉េ ជា​ច្រើន​ប្រភេទ​ ។ ការ​សម្រេចចិត្ត​ចូល​ទីផ្សារ​កម្ពុជា​ធ្វើ​ឡើង​បន្ទាប់​ពី​ការ​ស្រាវជ្រាវ​ទីផ្សារ​យ៉ាង​ហ្មត់ចត់ ដោយ​ទទួលស្គាល់​សក្តានុពល និង​កំណើន​តម្រូវការ​សម្រាប់​ការ​លក់រាយ​ដែល​មានគុណ​ភាព​ខ្ពស់ ​។

លោក ង​ន ដេ​វី​ដ​សំបូរ នាយក​គ្រប់គ្រង​ក្រុមហ៊ុន Saihan Partners មាន​ប្រសាសន៍​ថា “​ប្រទេស​កម្ពុជា ជាមួយនឹង​វប្បធម៌​ដ៏​រស់​រវើក និង​កំណើន​ចំនួន​ប្រជាជន កំពុង​បង្ហាញ​ពី​ការ​ផ្លាស់​ប្តូរ​ដ៏​គួរ​ឱ្យ​កត់ សម្គាល់​នៅ​ក្នុង​ឥរិយាបថ​របស់​អ្នក​ប្រើប្រាស់ អំពី​ការ​កើនឡើង​តម្រូវ​សម្រាប់​ភាព​ងាយស្រួល ប្រសិទ្ធភាព គុណភាព និង​បទ​ពិសោធន៍​ទិញ​ទំនិញ​ដែល​សម​ស្រប​នឹង​របៀប​រស់នៅ​ដែល​មានការ​ផ្លាស់​ប្តូរ​យ៉ាង​លឿន​របស់​អតិថិជន​កម្ពុ​ជានា​ពេល​បច្ចុប្បន្ន​នេះ​”​ ។

ថ្លែង​ក្នុង​ឳ​កាស​នេះ​ដែរ​ឯកឧត្តម អ៊ុ​ក ប្រជា រដ្ឋលេខាធិការ​ក្រសួងពាណិជ្ជកម្ម ក៏​បាន​លើក​ឡើង​ពី​សារៈសំខាន់​នៃ​កិច្ច​សហប្រតិបត្តិការ​នេះ ក្នុង​ការ​ជំរុញ​ទំនាក់ទំនង​ធុរកិច្ច​អន្តរជាតិ និង​រួមចំណែក​ដល់​កំណើនសេដ្ឋកិច្ច​របស់​កម្ពុជា​ ។ ឯកឧត្តម អ៊ុ​ក ប្រជា បាន​មាន​ប្រសាសន៍​ថា “​ថ្ងៃនេះ​ជា​ថ្ងៃ​ជោគជ័យ​នៃ​កិច្ចព្រមព្រៀង Franchise រវាង emart24 Inc. និង Saisons Brother Holding ក្នុង​ពិធី​ចុះហត្ថលេខា​នេះ គឺជា​សក្ខីភាព​បញ្ជាក់​ពី​ការ​ប្តេជ្ញា​ចិត្ត​របស់​កម្ពុជា និង​សាធារណរដ្ឋ​កូរ៉េ ក្នុង​ការ​លើកកម្ពស់​កំណើនសេដ្ឋកិច្ច បង្កើត​ឱកាស​ការងារ និង​លើកកម្ពស់​សុខុមាលភាព​ទូទៅ​របស់​ប្រជាពលរដ្ឋ​យើង​” ៕ អត្ថបទសហការ