រដ្ឋមន្ត្រីក្រសួង​ធនធានទឹក និង​ឧតុ​និយម បំពាក់​គ្រឿង​ឥស្សរិយយស​ជូន​មន្ត្រី​ស្ថានទូត​ជប៉ុន​ប្រចាំ​នៅ​កម្ពុជា


រាជធានី​ភ្នំពេញ ៖ នា​ព្រឹក​ថ្ងៃ​ច័ន្ទ ទី​០២ ខែធ្នូ ឆ្នាំ ២០១៩​នេះ ឯកឧត្តម លឹ​ម គាន​ហោ រដ្ឋមន្ត្រី​ក្រសួង​ធនធានទឹក និង​ឧតុនិយម បាន​អញ្ជើញ​ជា​អធិបតី​ក្នុង​ពិធី​បំពាក់​គ្រឿង​ឥស្សរិយ​យស​​មុនី​សារា​ភ័​ណ្ឌ​ថ្នាក់​មហា​សេនា ជូន​លោក Sugano Yuichi , លោក Tanaka Kotaro ជា​ប្រធាន អនុប្រធាន​ទីភ្នាក់ងារ​សហប្រតិបត្តិការ​អន្តជាតិ​ជប៉ុន (JICA ) ប្រចាំ​នៅ​កម្ពុជា និង​គ្រឿង​ឥស្ស​រិយយស​មុនី​សារា​ភ័​ណ្ឌ​ថ្នាក់​ធិ​ប​ឌិ​ន្ទ ជូន​លោក Kengo Matsuda លេខា​ទី​២ ស្ថានទូត​ជប៉ុន , មន្ត្រី JICA , ប្រធាន​ទីប្រឹក្សាបច្ចេកទេស ជា​បេសកជន​ជប៉ុន សរុប​ចំនួន 08 រូប ដែល​មាន​ស្នាដៃ​ល្អ​ក្នុង​ការ​បំពេញបេសកកម្ម​ការងារ និង​កិច្ចសហការ​ផ្តល់​ឥណទាន​សម្បទាន និង​ជំនួយ​ឥត​សំណង របស់​រាជរដ្ឋាភិបាល​ជប៉ុន​លើ​វិស័យ​ធនធានទឹក និង​ឧតុនិយម ។

ក្នុង​ពិធី​នេះ ឯកឧត្តម​រដ្ឋមន្ត្រី បាន​សំដែង​នូវ​ការ​ស្វាគមន៍ និង​អបអរសាទរ​ចំពោះ​លោក Sugano Yuichi ប្រធាន JICA ប្រចាំ​កម្ពុជា និង​សហការី ដែល​ត្រូវ​បាន ព្រះករុណា ព្រះបាទ សម្តេច ព្រះ​បរមនាថ នរោត្តម សីហ​មុនី ព្រះមហាក្សត្រ​នៃ​ព្រះរាជាណាចក្រ​កម្ពុជា បាន​ប្រោស​ព្រះ​រាជទាន​នូវ​គ្រឿង​ឥស្សរិយយស តាម​សំណើ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា ។

ឯកឧត្តម​រដ្ឋមន្ត្រី បាន​វាយតម្លៃ​ខ្ពស់​ចំពោះ​លទ្ធផល​ការងារ​ដែល​លោក Sugano Yuichi និង​សហការី ខិតខំ​ប្រឹងប្រែង​បំពេញ​នា​ពេល​កន្លង​មក ដែល​បាន​រួមចំណែក​លើកកម្ពស់​កិច្ច​សហ​ប្រតិបត្តិការ​បាន​ល្អ​ប្រសើរ​រវាង​ក្រសួង​ធនធានទឹក និង​ឧតុនិយម និង JICA តាម​រយៈ​ការ​គាំទ្រ​លើ​ការ​គ្រប់គ្រង និង​អភិវឌ្ឍ​វិស័យ​ធនធានទឹក​នៅ​កម្ពុជា ឲ្យ​មានការ​រីក​ចម្រើន​ជា​បន្តបន្ទាប់ ។

ជាមួយ​គ្នា​នោះ​ផង​ដែរ តាង​នាម​រាជរដ្ឋាភិបាល​កម្ពុជា និង​ក្នុង​នាម​ក្រសួង​ធនធានទឹក និង​ឧតុ​និយម ឯកឧត្តម​រដ្ឋមន្ត្រី បាន​សំដែង​នូវ​អំណរ​គុណ​យ៉ាង​ជ្រាលជ្រៅ តាម​រយៈ​លោក Sugano Yuichi ប្រធាន JICA ប្រចាំ​កម្ពុជា ជូន​ចំពោះ​ប្រជាជន និង​រដ្ឋាភិបាល​នៃ​ប្រទេស​ជប៉ុន ដែល​បាន​និង​កំពុង​រួមចំណែក​ជួយ​ជ្រោមជ្រែង​យ៉ាង​សកម្ម​ក្នុង​ការ​អភិវឌ្ឍ​ប្រទេស​កម្ពុជា​លើ​គ្រប់​វិស័យ ដោយឡែក​លើ​វិស័យ​ធនធានទឹក​ផង​ដែរ ឲ្យ​មានការ​រីក​ចម្រើន​ជា​បន្តបន្ទាប់​មក​ដល់​សព្វថ្ងៃ ។

លោក Sugano Yuichi ប្រធាន​ទីភ្នាក់ងារ​សហប្រតិបត្តិការ​អន្តជាតិ​ជប៉ុន (JICA ) ប្រចាំ​នៅ​កម្ពុជា បាន​សំដែង​នូវ​មនោសញ្ចេតនា​រំភើប​រីករាយ​យ៉ាង​ក្រៃ​លែង ដែល​លោក​មាន​កិត្តិយស​បាន​ទទួល​នូវ​គ្រឿង​ឥស្សរិយយស​នៅ​ពេល​នេះ ហើយ​លោក​ក៏​សូម​ថ្លែង​នូវ​អំណរ​គុណ ចំពោះ ឯកឧត្តម​​រដ្ឋមន្ត្រី សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណា​ចក្រ​កម្ពុជា និង​សូម​អរ​ព្រះ​គុណ​ចំពោះ​ព្រះករុណា​ព្រះបាទ សម្តេចព្រះ​បរមនាថ នរោត្តម សីហ​មុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ដែល​បាន​ប្រោស​ព្រះ​រាជទាន នូវ​គ្រឿង​ឥស្សរិយ​យស ដល់​រូប​លោក​នៅ​ពេល​នេះ ហើយ​រូប​លោក​ជា​ប្រធាន​ទីភ្នាក់ងារ​សហប្រតិបត្តិការ​អន្តជាតិ​ជប៉ុន (JICA ) ប្រចាំ​នៅ​កម្ពុជា ប្តេជ្ញា​នឹង​នៅ​តែ​បន្ត​កិច្ច​សហប្រតិបត្តិការ​ឲ្យ​កាន់តែ​ល្អ​បន្ថែម​ទៀត​ជាមួយ​រាជរដ្ឋាភិបាល​កម្ពុជា ជា​ពិសេស​ជាមួយ​ក្រសួង​ធនធានទឹក និង​ឧតុនិយម ។

លោក​ប្រធាន JICA ប្រចាំ​កម្ពុជា បាន​គោរព​ថ្លែងអំណរគុណ​ជា​ពិសេស​ចំពោះ​ឯកឧត្តម​រដ្ឋមន្ត្រី​ផ្ទាល់​ដែល​បាន​បង្ក​លក្ខណៈ​ងាយស្រួល និង​ផ្តល់​កិច្ច​សហប្រតិបត្តិការ​ល្អ​ដល់​រូប​លោក និង​សហការី ក្នុង​ការ​បំពេញការងារ​នា​ពេល​កន្លង​មក និង​សម្រាប់​ពេល​ខាង​មុខ ហើយនឹង​បន្ត​ឲ្យ​កាន់តែ​ល្អ​ប្រសើរ​ថែម​ទៀត ដើម្បី​ធ្វើ​ឲ្យ​វិស័យ​ធនធានទឹក ដើរតួ​នាទី​ជា​ស្នូល​កាន់តែ​សំខាន់​ក្នុង​ការ​រួមចំណែក​ជំរុញ​កំណើនសេដ្ឋកិច្ច​កម្ពុជា ឲ្យ​មានការ​រីក​លូតលាស់​ជា​បន្ត​ប្រកបដោយ​ចីរភាព។

សូម​ជម្រាប​ថា រហូត​មក​ដល់​ពេល​នេះ សម្រាប់​វិស័យ​ធនធានទឹក​នៅ​កម្ពុជា ជប៉ុន​បាន​ជួយ​គម្រោង​ពាក់ព័ន្ធ​មួយ​ចំនួន​មាន​ជា​អាទិ៍​ដូច​ជា ការងារ​ស្តារ និង​អភិវឌ្ឍន៍​ប្រព័ន្ធ​ធារាសាស្ត្រ​, ការ​ប្រើប្រាស់​ធនធានទឹក​អាង​ទន្លេ​, ការ​បណ្តុះបណ្តាល​ធនធានមនុស្ស និង​ជំនួយ​ផ្នែក​បច្ចេកទេស​តាម​រយៈ​ការ​ចាត់​បញ្ជូន​ជំនាញការ​/​ទីប្រឹក្សា​រយៈពេល​ខ្លី និង​មធ្យម បម្រើ​ការ​ជួយ​ក្នុង​គម្រោង​របស់​ក្រសួង​ផង​ដែរ ៕ ដោយ​សហការ (​កែសម្រួល​ដោយ ៖ បុប្ផា​)

Facebook Google Twitter Email

ពាណិជ្ជកម្ម

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ