រាជធានីភ្នំពេញ ៖ លោកសំ សិលា ដែលពីមុនគឺជាសិស្សមិនសូវស្រវាស្រទេញជាមួយការរៀនសូត្រ ដោយឧស្សាហ៍គេចសាលាដើរលេងជាមួយមិត្តភក្តិ ធ្វើឱ្យឪពុកម្តាយមិនសប្បាយចិត្តនោះ ពេលនេះបានក្លាយជាជាងកាត់សក់យ៉ាងចំណាន ហើយបើកហាងពីរបីលើកស្ទួយជីវភាពគ្រួសារឱ្យប្រសើរឡើងជាលំដាប់ ។
រាជធានីភ្នំពេញ ៖ លោកសំ សិលា ដែលពីមុនគឺជាសិស្សមិនសូវស្រវាស្រទេញជាមួយការរៀនសូត្រ ដោយឧស្សាហ៍គេចសាលាដើរលេងជាមួយមិត្តភក្តិ ធ្វើឱ្យឪពុកម្តាយមិនសប្បាយចិត្តនោះ ពេលនេះបានក្លាយជាជាងកាត់សក់យ៉ាងចំណាន ហើយបើកហាងពីរបីលើកស្ទួយជីវភាពគ្រួសារឱ្យប្រសើរឡើងជាលំដាប់ ។
ខណៈពេលកំពុងមមាញឹកជាមួយអាជីពកាត់សក់ជូនអតិថិជន លោកសំ សិលា ឆ្លៀតបង្ហាញពីបទពិសោធន៍ក្នុងជីវិតរបស់ខ្លួនប្រាប់ភ្នាក់ងារកោះសន្តិភាពកាលពីពេល ថ្មីៗនេះថា ពីមុនលោកគឺជាសិស្សនៅវិទ្យាល័យប៊ុន រ៉ានី ផ្សារដើមថ្កូវ តែមិនបានយកចិត្តទុកដាក់រៀនសូត្រឱ្យដិតដល់ដូចសិស្សរួមថ្នាក់ឯទៀតឡើយ គឺ មួយថ្ងៃៗគិតតែដើរលេងទៅនេះទៅនោះ គេចសាលាទៅដើរលេងជាមួយមិត្តភក្តិ ។ ពោលឱ្យតែបានលុយពីម៉ាក់ប៉ា គិតតែដើរលេងមិនចូលរៀនឡើយ ។ ម៉្លោះហើយការសិក្សារបស់លោកសិលា បានតិចតួចត្រឹមថ្នាក់វិទ្យាល័យប៉ុណ្ណោះ ក្នុងពេលបច្ចុប្បន្ននេះ មិត្តរួមថ្នាក់របស់លោកខ្លះរៀនសូត្រចេះដឹងបានធ្វើការមានប្រាក់ខែសមរម្យ ។
ពេលនៅរៀន លោកសិលា រៀនយ៉ាងម៉េចក៏មិនចេះដែរ តែពេលចូលហាងកាត់សក់ ម្តងៗលោកមើលគេច្នៃម៉ូដសក់ជក់ចិត្ត ហើយឆាប់ចាប់បានណាស់ មើលតែមួយភ្លែតម៉ូដនោះដក់ជាប់អារម្មណ៍រហូត ។
ដោយសារតែយល់ថា ខ្លួនឯងមាននិស្ស័យខ្លាំងទៅលើផ្នែកកាត់សក់បែបនេះ លោកសំ សិលា បានរំអុកសុំឪពុករបស់លោករៀនកាត់សក់ ដោយប្រាប់ហេតុផលថា លោករៀនមិនចូលទេ បើគាត់ឱ្យលុយទៅរៀនបានត្រឹមតែចាយវាយអត់ប្រយោជន៍ ហើយឧស្សាហ៍គេចមិនចូលសាលាទៀត ។ ឪពុករបស់លោកសិលា ជាអ្នករៀនពូកែ ដូច្នេះចង់ឱ្យកូនរៀនពូកែដូចគាត់ ។ ដោយសារបែបនេះហើយ គាត់ច្រានចោលបំណងរបស់លោកសិលា ។ ទោះជាយ៉ាងណាក្តី លោកសិលា មិនបោះបង់គំនិតចូលរៀនកាត់សក់ឡើយ ដោយពុះពាររហូតបានទៅរៀនតាមបំណងរបស់ខ្លួន ។ លោកសិលា រៀនតែរយៈពេល១ខែកន្លះប៉ុណ្ណោះអាចចាប់យកជំនាញនេះបាន សូម្បីតែអ្នកបង្ហាត់ក៏សរសើរថា ពូកែដែរ ព្រោះតែអ្នកខ្លះរៀនយូរជាងលោកមិនចង់ចេះផង ។
នៅពេលទុកចិត្តខ្លួនឯងបានហើយ លោកសំ សិលា សម្រេចចិត្តបើកហាងកាត់សក់ដោយជួលសំយាបផ្ទះគេនៅម្តុំវិទ្យាល័យព្រះយុគន្ធរ កាសពីប្រមាណ៦ឆ្នាំមុន ។ ក្នុងជំហានដំបូង លោកសិលា ជួលសំយាបផ្ទះគេក្នុង១ខែជាង១០០ដុល្លារ សូម្បីតែបន្ទប់ទឹកក៏គ្មានដែរ និងខ្វះឧបករណ៍គ្រប់យ៉ាង ។ លោកសិលា យកចានដែកដាក់លាងសក់ឱ្យភ្ញៀវ ហើយគេចេះតែទ្រាំ ព្រោះលោកកាត់សក់ស្អាតសមទម្រង់មុខ ។
អ្នកច្នៃម៉ូដសក់វ័យក្មេងរូបនេះឱ្យដឹងថា របររបស់លោករីកចម្រើនពីមួយថ្ងៃទៅមួយថ្ងៃ ហើយបានងាកទៅជួលផ្ទះគេធំល្មមបើកហាងឱ្យសមរម្យ ។ ដោយមានការរីកចម្រើន លោកសិលា ពង្រីកសាខាពីមួយកន្លែងទៅមួយកន្លែង ហើយមានអ្នកសុំរៀនជំនាញនេះពីលោកច្រើននាក់ណាស់ ។ នៅភ្នំពេញ មានហាង២០ ដែលជារបស់កូនសិស្សលោក ។ សព្វថ្ងៃនេះលោកសំ សិលា ពង្រីកសាខាកាត់សក់បានបីកន្លែង ដោយហាងរបស់លោកដាក់ឈ្មោះថា «ហូលីវូត» នៅក្រោយសាលាព្រះយុគន្ធរ ម្តុំទួលទំពូង និងនៅខាងក្រោយវិទ្យាល័យផ្សារដើមថ្កូវ ។
លោកសំ សិលា មានឪពុកឈ្មោះវង្ស សំណល់ ជាសន្តិសុខស្ថានទូត និងម្តាយឈ្មោះជា ដាវី បាត់បង់ជីវិតប៉ុន្មានឆ្នាំមកហើយ ។ សិលាមានបងប្អូន៧នាក់ ក្នុងនោះលោកជាកូនទី៦ ។ នៅពេលអាជីពកាត់សក់រីកចម្រើន ឪពុករបស់លោកសំ សិលា ឈប់ជំទាស់ ហើយព្យាយាមណែនាំលោកឱ្យខិតខំតស៊ូក្នុងរបរនេះ ។ លោកសិលា បានជួយបង្រៀនបងប្អូនបង្កើត និងសាច់ថ្លៃមួយចំនួន ឱ្យចេះជំនាញកាត់សក់ដែរ ហើយមានខ្លះបានបើកហាងផ្ទាល់ខ្លួន ។
តាមរយៈការបើកកកាយប្រវត្តិផ្ទាល់ខ្លួននេះ លោកសិលា មានបំណងតែមួយគត់ គឺចង់ឱ្យយុវវ័យខិតខំរៀនសូត្រដើម្បីអនាគតល្អ ឬត្រូវចាប់យកជំនាញឱ្យច្បាស់ ដើម្បីចិញ្ចឹមជីវិត ។ ទន្ទឹមនេះលោកអំពាវនាវដល់យុវជនត្រូវធ្វើតែអំពើល្អ ចៀសឱ្យឆ្ងាយពីអំពើអបាយមុខ ៕
ចែករំលែកព័តមាននេះ