រាជធានីភ្នំពេញ៖ តារាកំប្លែងអ្នកនាងខ្ញុង បានសម្តែងការមិនពេញចិត្ត និងជះភាពគ្រោតគ្រាតទៅកាន់អ្នកដែលរិះគន់នាងរឿងចង់ស្អាតកែច្រមុះ ។
ការរិះគន់នេះបានធ្វើឡើងបន្ទាប់ពីតារាកំប្លែងនាងខ្ញុងបានបង្ហាញការកែច្រមុះរបស់នាងជាំរាលដាលដល់ភ្នែក ។ ប្រិយមិត្តមួយចំនួនដែលឃើញនូវស្ថានភាពបែបនេះបាននាំគ្នារិះគន់ និងបន្តុះបង្អាប់នាងថា នាំឲ្យឈឺខ្លួន និងមានសភាពអាក្រក់លើសដើម ។
ការចំអក និងការរិះគន់ទាំងនោះ ធ្វើឲ្យនាងខ្ញុង ខឹង ហើយបានឆ្លើយតបទៅវិញ ដោយចាត់ទុកការរិះគន់ទាំងនោះមិនសមហេតុផល ដ្បិតនាងកែដោយប្រើប្រាស់ប្រាក់ផ្ទាល់ខ្លួន ហើយជារឿងរបស់នាង ។
បើយោងតាមអ្វីដែលតារាកំប្លែងអ្នកនាង ខ្ញុង និយាយតាមហ្វេសប៊ុកកាលពីពេល ថ្មីៗកន្លងមកថា «លួចឆក់ប្លន់ គេវៃ៉ខៀវភ្នែកទៅសមនឹងខ្មាស ។ គ្រាន់តែធ្វើច្រមុះលុយប្តីឲ្យ សាច់ខ្លួនឯង ឈឺខ្លួនឯង ស្អាតខ្លួនឯង សោះហេតុអ្វីត្រូវខ្មាស ។ អ្នកដែលត្រូវខ្មាសគឺអ្នកដែលកែសម្រស់មិនហ៊ាននិយាយការណ៍ពិតហើយដើរអួតគេថាស្អាតធម្មជាតិឯណោះវិញ ! អូយខ្មាសគេណាស់លោក អាណិតតែអ្នកជេរថាឲ្យគេលោកអើយ ហេតុតែគ្នាច្រណែន ខ្លះជេរអ៊ីចេះអ៊ីចុះ ដាក់ទំនាយ ។ ហួសចិត្ត ! តែៗ ស្ករៗ »។
ជាការកត់សម្គាល់រូបភាពជាំភ្នែករបស់នាងខ្ញុង ដែលបង្ហោះតាមហ្វេសប៊ុកបានក្លាយជាចម្ងល់របស់មហាជនដោយគេសង្ស័យថា នាងអាចមានទំនាស់ជាស្វាមី ហើយត្រូវប្តីវ៉ៃបែបនេះ។ ការសង្ស័យនេះត្រូវបានបកស្រាយតាមរយៈការ Lives វីដេអូរបស់នាងខ្ញុងបានបដិសេធ ថានាងពុំមានទំនាស់ជាមួយស្វាមី រហូតដល់ថ្នាក់ប្រើអំពើហិង្សាលើនាងទេ តាមពិតទៅនាង បានវះកាត់កែច្រមុះ ដែលជាហេតុបណ្តាលឲ្យជាំសាច់ ជាពិសេសរង្វង់ភ្នែក ។
អ្នកនាងខ្ញុង បានវះកាត់កែច្រមុះរយៈពេលមួយសប្តាហ៍មកហើយ ដោយនាងមិនខ្មាសអៀនលាក់បាំងទេ ។ នាងប្រាប់ទៅប្រិយមិត្តអ្នកគាំទ្រថា នាងចង់ស្អាត ទើបវះកាត់កែច្រមុះបែបនេះ ៕
ចែករំលែកព័តមាននេះ