រាជធានីភ្នំពេញ៖ តារាសម្តែងអ្នកនាងរ៉ូ ចាន់ដារ៉ា បានបង្ហាញរូបភាពពីការមានផ្ទៃពោះលើកដំបូងរបស់ខ្លួន បន្ទាប់ពីរៀបការបានជិតមួយឆ្នាំ ជាមួយបុរសកូនខ្មែររស់នៅអាមេរិក ។ រូបភាពមួយសន្លឹកបង្ហាញពីការពពោះ៥ខែ ត្រូវអ្នកនាងដារ៉ា បង្ហោះតាមហ្វេសប៊ុក…
រាជធានីភ្នំពេញ៖ តារាសម្តែងអ្នកនាងរ៉ូ ចាន់ដារ៉ា បានបង្ហាញរូបភាពពីការមានផ្ទៃពោះលើកដំបូងរបស់ខ្លួន បន្ទាប់ពីរៀបការបានជិតមួយឆ្នាំ ជាមួយបុរសកូនខ្មែររស់នៅអាមេរិក ។ រូបភាពមួយសន្លឹកបង្ហាញពីការពពោះ៥ខែ ត្រូវអ្នកនាងដារ៉ា បង្ហោះតាមហ្វេសប៊ុក បង្ហាញទស្សនិកជន និងមិត្តភក្តិរបស់នាងឲ្យបានដឹងពីដំណឹងល្អមួយនេះកាលពីពេល ថ្មីៗកន្លងមក។
តារាសម្តែងអ្នកនាងរ៉ូ ចាន់ដារ៉ា ហៅស្រីលាភ មិនបានអធិប្បាយអ្វីច្រើនឡើយក្រៅពីសម្តែងក្តីត្រេកអរ និងបានបញ្ជាក់ប្រាប់មិត្តភក្តិដែលបានសួរដោយខ្លីថា «កូនស្រីដែលនៅក្នុងពោះរបស់នាងគឺមានអាយុ៥ខែហើយ»។
ជាការកត់សម្គាល់ បន្ទាប់ពីអ្នកនាងរ៉ូ ចាន់ដារ៉ា បានបង្ហោះរូបភាពនេះរួចមក គេឃើញមានមិត្តភក្តិ និងប្រិយមិត្តគាំទ្ររបស់នាងជាច្រើននាំគ្នាចូលរួមសម្តែងការអបអរសាទរ ចំពោះការមានកូនដំបូងរបស់នាងនាពេលនេះ។ តារាសម្តែងរូបនេះអាចនឹងសម្រាលកូនស្រីរបស់ខ្លួននៅលើទឹកដីអាមេរិក ព្រោះដើម្បីងាយស្រួលបានចូលសញ្ជាតិតែម្តង ខណៈពេលដែលនាងក៏បានចេញទៅរស់នៅសហរដ្ឋអាមេរិកជាមួយស្វាមីផងដែរ ។
បន្ទាប់ពីសម្រាលកូនរួចហើយនោះអ្នកនាង រ៉ូ ចាន់ដារ៉ា គេនៅមិនទាន់ដឹងទេថា នាងអាចនឹងវិលមកកាន់អាជីពសិល្បៈវិញ ឬយ៉ាងណានោះឡើយ ក្នុងពេលដែលនាងកំពុងតែសាងសុភមង្គលដោយភាពកក់ក្តៅជាមួយស្វាមីនៅលើលើទឹកដីអាមេរិកហើយនោះ ។
រ៉ូ ចាន់ដារ៉ា ហៅស្រីលាភ បានសម្រេចចូលរោងការជាមួយបុរសកូនថៅកែហាងនំ និងជាអាណិកជនខ្មែរ រស់នៅសហរដ្ឋអាមេរិក កាលពីថ្ងៃទី២៤ ខែមីនា ឆ្នាំ២០១៧ ជាមួយនឹងការចូលរួមអបអរសាទរពីអ្នកសិល្បៈយ៉ាងច្រើនកុះករ ។
ទម្រាំសម្រេចចិត្តលាភាពក្រមុំចូលរោងការជាមួយលោកយឹម យ៉ាន់សីហា ដែលជាថៅកែហាងនំមួយនៅសហរដ្ឋអាមេរិក អ្នកនាងរ៉ូ ចាន់ដារ៉ា បានពិសោធស្នេហ៍ឆ្លងដែនរយៈពេលជាង២ឆ្នាំ ។
នៅមុនពេលរៀបការ តារាសម្តែងរូបនេះធ្លាប់បានអះអាងថា ក្រោយរៀបការរួចនាងគ្រោងនឹងចេញទៅរស់នៅជាមួយស្វាមីក្នុងប្រទេសអាមេរិក ដោយមិនបញ្ជាក់ពីការងារសិល្បៈរបស់នាងយ៉ាងណានោះឡើយ ។ យ៉ាងណាក៏ដោយការទទួលបានកូនស្រីលើកដំបូងរបស់អ្នកនាងរ៉ូ ចាន់ដារ៉ា នាពេលនេះ គឺអាចនឹងធ្វើឲ្យចំណងអាពាហ៍ពិពាហ៍របស់នាងកាន់តែរឹងមាំ និងមានភាពផ្អែមល្ហែមថែមមួយកម្រិតទៀត ៕
ចែករំលែកព័តមាននេះ