រាជធានីភ្នំពេញ ៖ តារាសម្ដែងស្រគត់ស្រគំ និងជាតារាបង្ហាញម៉ូដនាងកែវ ពេជ្រពិសី បានតាំងចិត្តខ្ពស់ដើម្បីដណ្ដើមយកពានរង្វាន់ឆ្នាំ២០១៣ ក្នុងកម្មវិធី Apsara Award ដោយហ៊ានសម្ដែងជាមួយសត្វពស់ដ៏ធំនៅលើឆាកផ្សាយបន្ដផ្ទាល់កាលពីពេលថ្មីៗនេះ ។ នេះជាភាពក្លាហានមួយរបស់កែវ ពេជ្រពិសី ចំណែកអ្នកសិល្បៈខ្លះមិនអាចសម្ដែងជាមួយពស់ពិតបានទេ ច្បាស់ជារត់ធ្លាក់ពីលើឆាកមិនខាន ។
នេះជាលើកទី១ហើយ ដែលអ្នកនាងកែវ ពេជ្រពិសី តស៊ូសម្ដែងជាមួយពស់ថ្លាន់ ខណៈតារាសម្ដែងមួយចំនួនបដិសេធច្រានចោលមិនទទួលវិញ្ញាសានេះ ដែលអ្នករៀបចំកម្មវិធីដាក់ឱ្យ។ នៅមុនពេលសម្ដែងជាក់ស្ដែង មានការអះអាងពីមិត្ដរួមការងារថា កែវ ពេជ្រពិសី ស្រក់ទឹកភ្នែកមិនតិចទេ នៅពេលនាងឃើញពស់នោះគេលើកយកមកដាក់លើឆាក ហើយនាងត្រូវលោកហ្វៃ សំអាង ដែលជាអ្នកគ្រប់គ្រងកម្មវិធីឱ្យសាកល្បងហាត់សម្ដែងជាមុន ទម្រាំតែដល់ពេលផ្សាយបន្ដផ្ទាល់ ។ ជាមួយទឹកមុខស្លេកស្លាំង កែវ ពេជ្រពិសី ហាក់មានអារម្មណ៍មួយខ្លាចរអារហូតដល់យកធូបអុជបួងសួងសុំសេចក្ដីសុខ ហើយអ្នកដែលនៅជុំវិញនាង សុទ្ធតែគិតថា ប្រហែលជានាងមិនអាចទៅរួចទេ សម្រាប់ការសម្ដែងស្រស់ៗបែបនេះ តែនៅទីបំផុតភាពអត់ទ្រាំរបស់នាងបានប្រព្រឹត្ដទៅដោយជោគជ័យ ចប់ចុងចប់ដើម រហូតថែមទាំងមានការកោតសរសើរពីគណៈកម្មការដាក់ពិន្ទុទៀតផង ។
ថ្លែងពីរឿងរ៉ាវដែលបានកើតឡើងពេលរួមសម្ដែងឈុតស្នេហាកៀកកិតជាមួយពស់នោះ កែវ ពេជ្រពិសី អះអាងទាំងមោទនភាពថា កន្លងមកនាងក៏ធ្លាប់សម្ដែងជាមួយពស់បែបនេះដែរក្នុងរឿង «រាជនីពស់» តែជាពស់ក្លែងក្លាយ និងមានបច្ចេកទេសកាត់តតាមបែបកុំព្យូទ័រមិនធ្វើឱ្យភ័យតក់ស្លុតដូចជួបពស់ពិតបែបនេះឡើយ ។
ពេលដឹងថានាងបានវិញ្ញាសាសម្ដែងជាមួយពស់ពិតៗ ហើយរូបរាងវែង ថ្លោស នាងចាប់ផ្ដើមដេកឈឺ៣ទៅ៤ថ្ងៃ រហូតមានគំនិតថានឹងសុំគេលុបចោល បើសិនជានាងនៅតែមិនទាន់ធ្វើអារម្មណ៍ឱ្យបាត់ខ្លាចបាននោះ ។ នេះជាលើកទី១ហើយ ដែលនាងហ៊ានលេងជាមួយពស់បែបស្និទ្ធស្នាល ដោយថែមទាំងដាក់អារម្មណ៍គ្រប់យ៉ាងមានទាំងយំសោក ចាប់បីត្រកង បីបមឱបថើប ក្នុងពេលកំពុងថតផ្សាយផ្ទាល់ជូនដល់មហាជនគ្រប់ទិសទីបានទស្សនា ។ ពេលនាងឃើញពស់នោះភ្លាមចង់តែរត់ចោលឆាកទៅហើយ ។ ដូច្នេះហើយ នាងអាចសម្រួលចិត្ដសម្ដែងជាមួយឈុតឆាកដ៏ពិបាកនេះបាន នាងចាត់ទុកថាជាប្រវត្ដិសាស្រ្ដមួយក្នុងជីវិតជាអ្នកសម្ដែង ។ ទោះជានៅពេលខាងមុខនាងមិនបានទទួលជោគជ័យ ក៏នាងសប្បាយចិត្ដ ព្រោះសិល្បៈនាងហ៊ានតស៊ូសព្វបែបយ៉ាងឱ្យតែអាចធ្វើបាន ទោះជាធ្វើឆ្កួតយ៉ាងណាក៏មិនគិតដែរ ព្រោះអ្នកសិល្បៈទាល់តែចេះគ្រប់យ៉ាងទើបជាការប្រសើរ ។
កម្មវិធីប្រកួតប្រជែងដណ្តើមពានរង្វាន់ Apsara Award មានដំណើរការផ្សាយបន្ដផ្ទាល់នៅរៀងរាល់រាត្រីថ្ងៃសុក្រ វេលាម៉ោង៦និង៣០នាទី ដោយមានតារាស្រីល្បីឈ្មោះចំនួន១០រូបមានអ្នកនាង ចន ច័ន្ទលក្ខិណា ,អ្នកនាង ស្វែង សុជាតា ,កែវ ពេជ្រពិសី ,សារ៉ាយ សក្ខណា ,នីមុនីនាថ ,គង់ ច័ន្ទស្រីមុំ ,សូដា នីតា ,ឈិត សុជាតា ,ទឹម រដ្ឋា និងអ្នកនាង សឿ សុធារ៉ា ។ តារាទាំង១០រូបនោះនឹងក្លាយជាម្ចាស់ពានរង្វាន់Apsara Awardដូចគ្នា ដោយគ្រាន់តែមិនដឹងថាតើតារាស្រីរូបណានឹងក្ដាប់ពានកំពូលតារាឆ្នើមApsara Award លើផ្នែកទេពកោសល្យណាមួយប៉ុណ្ណោះ ។
លក្ខខណ្ឌទទួលបានពានទាល់តែតារាស្រីទាំងនោះអាចឆ្លងកាត់ការសម្ដែងជាច្រើនលើកដូចជាវិញ្ញាសារាំរបាំប្រពៃណី របាំបុរាណ សម្ដែងល្ខោនបាសាក់ យីកេ សម្ដែងឈុតខ្លីៗដែលពាក់ព័ន្ធនឹងភាពកាចឆ្នាស សម្រក់ទឹកភ្នែក តាមទេពកោសល្យជាក់ស្ដែងរបស់ពួកគេ ។ ក្រៅពីនេះទៅបំពេញសកម្មភាពមនុស្សធម៌ជាច្រើនដើម្បីលើកកម្ពស់ដល់កេរ្ដិ៍ឈ្មោះរបស់អ្នកទាំង១០ឱ្យមហាជនកាន់តែកោតសរសើរក្នុងជីវិតជាអ្នកសិល្បៈ ៕
ចែករំលែកព័តមាននេះ