រាជធានីភ្នំពេញ៖ តារាសម្តែងកញ្ញាស៊ីន យូប៊ីន កាន់តែលូតលាស់នៅក្នុងអាជីពសិល្បៈសម្តែង ដោយពីមួយថ្ងៃទៅមួយថ្ងៃនាងកាន់តែមមាញឹកខ្លាំងនៅក្នុងការចូលរួមសម្តែងរឿងថ្មីជាបន្តបន្ទាប់ ។ ជាមួយភាពលូតលាស់នៃអាជីពនេះ យូប៊ីន ក៏មានទឹកចិត្តចង់រួមចំណែករកប្រាក់ជួយមន្ទីរពេទ្យគន្ធបុប្ផាដែរ ។…
រាជធានីភ្នំពេញ៖ តារាសម្តែងកញ្ញាស៊ីន យូប៊ីន កាន់តែលូតលាស់នៅក្នុងអាជីពសិល្បៈសម្តែង ដោយពីមួយថ្ងៃទៅមួយថ្ងៃនាងកាន់តែមមាញឹកខ្លាំងនៅក្នុងការចូលរួមសម្តែងរឿងថ្មីជាបន្តបន្ទាប់ ។ ជាមួយភាពលូតលាស់នៃអាជីពនេះ យូប៊ីន ក៏មានទឹកចិត្តចង់រួមចំណែករកប្រាក់ជួយមន្ទីរពេទ្យគន្ធបុប្ផាដែរ ។ ទឹកចិត្តសប្បុរសរបស់នាងកញ្ជ្រោលឡើងខ្លាំងនៅពេលស្ថាបនិកមន្ទីរពេទ្យនោះគឺលោកបេអាត រីចឆ្នឺរ ទទួលមរណភាព ។
កញ្ញាស្រស់ស្អាតស៊ីន យូប៊ីន កាលពីពេល ថ្មីៗកន្លងមកបានបង្ហោះសារមួយ ភ្ជាប់ជាមួយនឹងរូបភាពនៃការចូលរួមគោរពវិញ្ញាណក្ខន្ធលោកបេអាត រីចឆ្នឺរ ស្ថាបនិកមន្ទីរពេទ្យគន្ធបុប្ផា ។ ជាមួយនឹងទឹកមុខក្រៀមក្រំចូលរួមរំលែកទុក្ខ សោកស្តាយចំពោះការបាត់បង់បុគ្គលដ៏ឆ្នើមរបស់កម្ពុជារូបនោះ កញ្ញាស៊ីន យូប៊ីន បានសន្យាថា នាងនឹងបរិច្ចាគប្រាក់របស់នាងដែលបានពីគ្រប់ការងារប្រមាណ៣០ភាគរយ ដើម្បីជូនដល់មន្ទីរពេទ្យគន្ធបុប្ផា ។
ទឹកចិត្តសប្បុរសធម៌របស់ស៊ីន យូប៊ីន បានធ្វើឲ្យរំជួលចិត្ត និងមានការពេញចិត្តពីបណ្តាប្រិយមិត្តអ្នកគាំទ្រនៅតាមហ្វេសប៊ុក ។
សាររបស់ស៊ីន យូប៊ីន នៅលើហ្វេសប៊ុកមានន័យសេចក្តីថា៖ «គោរពលាវិញ្ញាណក្ខន្ធវីរបុរសនៃកុមារកម្ពុជាជាលើកចុងក្រោយ ព្រមទាំងនាំយកនូវថវិកាបន្តិចបន្តួចដែលនាងខ្ញុំបានដក ៣០% ពីចំណែកការងារដែលនាងខ្ញុំទើបតែទទួលបានដើម្បីបរិច្ចាគដល់ខាងមន្ទីរពេទ្យដើម្បីបន្តសង្គ្រោះកុមារកម្ពុជាជាបន្តទៀត ហើយចាប់ពីពេលនេះទៅនាងខ្ញុំស៊ីន យូប៊ីន សន្យាថានឹងបរិច្ចាគ៣០% នៃតម្លៃការងារនូវគ្រប់ការងារទាំងអស់របស់នាងខ្ញុំ ជូនដល់គន្ធបុប្ផា ហើយទឹកប្រាក់ទាំងអស់នាងខ្ញុំនឹងប្រគល់ជូនជារៀងរាល់ចុងឆ្នាំម្តង ។
នេះជាការចូលរួមចំណែកដ៏តូចមួយក្នុងការបំពេញបំណងប្រាថ្នារបស់លោកបេអាត រីចឆ្នឺរ បន្ត ដោយលោកចង់សង្គ្រោះកុមារកម្ពុជាដោយស្មោះអស់ពីចិត្ត» ។
កញ្ញាស៊ីន យូប៊ីន ជាដៃគូសម្តែងជាមួយលោកខាត់ វៃហាំង ហើយទស្សនិកជនជាច្រើនចង់ឃើញអ្នកទាំង២ស្រឡាញ់គ្នាដោយយោងលើភាពសក្តិសមគ្នាពួកគេ ៕
ចែករំលែកព័តមាននេះ