រាជធានីភ្នំពេញ ៖ ក្រុម«តារារះថ្មី» ដែលកញ្ញាសូ អែនណា ជាអ្នកគ្រប់គ្រងបានត្រឡប់មកដល់កម្ពុជាវិញហើយ ។ តារាកម្ពុជាយើងក្នុងក្រុមនេះទទួលបានកិត្តិយសក្នុងកម្មវិធី Asian Model…
រាជធានីភ្នំពេញ ៖ ក្រុម«តារារះថ្មី» ដែលកញ្ញាសូ អែនណា ជាអ្នកគ្រប់គ្រងបានត្រឡប់មកដល់កម្ពុជាវិញហើយ ។ តារាកម្ពុជាយើងក្នុងក្រុមនេះទទួលបានកិត្តិយសក្នុងកម្មវិធី Asian Model Festival 2018 និងកម្មវិធី Asian Model Star Award 2018 ។
លោកអែតវីន តំណាងឲ្យតារាខ្មែរទទួលបានពានរង្វាន់ក្នុងកម្មវិធី Asian Model Star Award 2018 កាលពីថ្ងៃទី៦ ខែឧសភា និងតារាខ្មែរម្នាក់ទៀត គឺប្រាជ្ញ ឆវ័ន្ត ទទួលបានរង្វាន់ពីក្រុមហ៊ុនអន្តរជាតិធំមួយពីកម្មវិធីប្រកួតម៉ូដែល Asian Model Festival 2018 កាលពីថ្ងៃទី៥ ខែឧសភា នៅក្នុងព្រឹត្តិការណ៍តែមួយ ។
កញ្ញាសូ អែនណា អតីត Miss Global Cambodia កាលពីឆ្នាំ២០១៦ និយាយថា ក្នុងការប្រកួត Asian Model Festival 2018 តារាម៉ូដែលនៃក្រុម«តារារះថ្មី»គឺលោកប្រាជ្ញ ឆវ័ន្ត ទទួលបានការឧបត្ថម្ភពីក្រុមហ៊ុន JMA ដែលជាក្រុមហ៊ុនធំក្នុងនាមជាតារាមួយរូបដែលក្រុមហ៊ុននេះពេញចិត្ត ។
ដោយឡែកតារាសម្ដែងលោកអែតវីន គឺក្រុមបង្ហាញម៉ូដរបស់នាងបានអញ្ជើញឲ្យទៅទទួលពានក្នុងកម្មវិធី Asian Model Star Award 2018 ដែលបានធ្វើឡើងនៅក្នុងប្រទេសកូរ៉េនោះដែរ ក្នុងនាមជាតារាតំណាងឲ្យប្រទេសកម្ពុជា។ ការទទួលពាននេះក៏ជាកិត្តិយសសម្រាប់តារាខ្មែរផងដែរ ទើបនាងកាន់តែមានកម្លាំងចិត្តក្នុងការដឹកនាំតារាខ្មែរឲ្យចូលរួមប្រកួត និងបង្ហាញរូបសម្រស់លើឆាកអន្តរជាតិខ្លាំងឡើង។ នាងរីករាយបន្ទាប់ពីការដឹកនាំតារាខ្មែរយើងឲ្យចេញបង្ហាញខ្លួនលើឆាកអន្តរជាតិលើកនេះជោគជ័យ ។
កញ្ញាសូ អែនណា និយាយថា «កម្ពុជាកាន់តែមានកិត្តិយសនៅក្នុងព្រឹត្តិការណ៍អន្តរជាតិដែលនាងខ្ញុំបានបញ្ជូនតារាខ្មែរឲ្យចូលរួម ខណៈដែលជនបរទេសក៏បានកោតសរសើរពីតារារបស់កម្ពុជាមិនដាច់ពីមាត់ ។ ក្រោយភាពជោគជ័យ ក្រុមបង្ហាញម៉ូដ«តារារះថ្មី»នឹងកាន់តែមានកម្លាំងចិត្តដឹកនាំតួទៅកាន់ឆាកអន្តរជាតិបន្ថែមទៀត ក្នុងពេលដែលសម្លៀកបំពាក់តំណាងឲ្យជាតិខ្មែរបានបង្ហាញ ហើយក៏នឹងត្រៀមរំលេចឈុតដ៏ប្រណីតដើម្បីបង្ហាញអត្តសញ្ញាណរបស់ជាតិ ។ កិត្តិយសបំផុតដែលនាងខ្ញុំជាប្រធានក្រុមមានភាពរំភើបខ្លាំងនោះ គឺតារាខ្មែរទទួលបានការប្រកាសឲ្យឡើងយកពាន និងឲ្យឡើងយករង្វាន់ ក្នុងពេលដែលតារាបរទេសផ្សេងទៀតមិនទទួលបានផ្លែផ្កានោះ ។
ការណ៍ពិតកម្មវិធីដែលបានធ្វើឡើងនៅក្នុងប្រទសកូរ៉េនោះ គឺជាកម្មវិធីតែមួយប៉ុណ្ណោះ ដោយគ្រាន់តែក្រោយបញ្ចប់កម្មវិធីប្រលងម៉ូដែល ក៏មានការប្រគល់ពានដល់ តារាៗមកពីប្រទេស ផ្សេងៗនៅមួយថ្ងៃបន្ទាប់ពីចប់ម៉ូដែលផង »៕
ចែករំលែកព័តមាននេះ