រាជធានីភ្នំពេញ ៖ អ្នកនាងប៉េងប៉ោង និងក្រុមគ្រួសារបានរៀបចំពិធីក្រុងពាលី ដើម្បីត្រៀមចំសាងសង់ចេតិយដាក់ធាតុ និងសូនរូបសំណាក់តារាកំប្លែងវីតាមីនសេ ដែលជាឪពុកបង្កើតក្រោយទទួលមរណភាពអស់រយៈពេលជាង២ខែមកហើយ។ កាលពីថ្ងៃព្រឹកថ្ងៃទី១២ ឧសភា តារាកំប្លែងប្រចាំក្រុម…
រាជធានីភ្នំពេញ ៖ អ្នកនាងប៉េងប៉ោង និងក្រុមគ្រួសារបានរៀបចំពិធីក្រុងពាលី ដើម្បីត្រៀមចំសាងសង់ចេតិយដាក់ធាតុ និងសូនរូបសំណាក់តារាកំប្លែងវីតាមីនសេ ដែលជាឪពុកបង្កើតក្រោយទទួលមរណភាពអស់រយៈពេលជាង២ខែមកហើយ។
កាលពីថ្ងៃព្រឹកថ្ងៃទី១២ ឧសភា តារាកំប្លែងប្រចាំក្រុម នាយក្រឹម នាងប៉េងប៉ោង និងក្រុមគ្រួសារបានធ្វើពិធីក្រុងពាលី រៀបចំចេតិយដាក់ធាតុ និងសូនរូបតារាកំប្លែងវីតាមីនសេ ដែលជាឪពុកក្រោយទទួលមរណភាព ស្ថិតនៅវត្តមកុដបុរី ជិតភ្នំពេញ Waterpark ។
អ្នកនាង ប៉េងប៉ោង បានថ្លែងថា អ្នកនាង និងគ្រួសារត្រូវតែខំប្រឹងធ្វើចេតិយសម្រាប់ដាក់ធាតុសពឪពុកឱ្យខានតែបាន បើទោះបីជាត្រូវចំណាយច្រើនយ៉ាងក៏ដោយ។ សម្រាប់ដីទីតាំង និងការកសាងចេតិយដាក់ធាតុឪពុកនេះ នាងត្រូវចំណាយខ្ទង់ជាង២ម៉ឺនដុល្លារ ឬជិត៣ម៉ឺនដុល្លារ តាមការប៉ាន់ស្មានគម្រោងសាងសង់។ តែថវិកាយ៉ាងច្រើននេះ នាងនិងគ្រួសាររៀងពិបាកបន្តិច ប៉ុន្តែត្រូវតែខំប្រឹងរកលុយ និងប្រមូលលុយពីផ្ទះធ្វើឱ្យចេតិយជូនឪពុកនាងឱ្យខានតែបាន បើទោះបីជាចាយខ្វះល្ងាចព្រឹកយ៉ាងណាក៏ដោយ។
តារាកំប្លែងស្រីដែលតែងតែដើរសម្តែងតាមឪពុករូបនេះបានបញ្ជាក់ថា នាងសុខចិត្តអត់ព្រឹកអត់ល្ងាចក៏ត្រូវដកលុយពីគ្រួសារមកចំណាយបំពេញបន្ថែមលើការសាងសង់ចេតិយនេះដែរ ពីព្រោះនាង និងម្តាយសម្រេចចិត្តថា ត្រូវឱ្យធាតុសពឪពុករបស់នាងមានកន្លែង មានផ្ទះមួយ នៅក្នុងវត្តមកុដបុរីនេះឱ្យខានតែបាន ទោះបីជាមានបញ្ហាលំបាកណាក៏ដោយ។
អ្នកនាងប៉េងប៉ោង និយាយថា អ្នកនាងសម្រេចចិត្តធ្វើផ្ទះថ្មីឱ្យលោកឪពុកនៅក្នុងវត្តនោះ គឺដោយសារតែមុនពេលទទួលមរណភាព លោកនាយវីតាមីនសេ ចូលចិត្តមកធ្វើបុណ្យនៅវត្តនោះ ហើយលោកក៏មានវេណកាន់បិណ្ឌធ្វើបុណ្យនៅទីនោះជាប្រចាំរាល់ឆ្នាំផង។ ដ្បិតថា លោកនាយវីតាមីនសេ ទើបតែផ្លាស់មករស់នៅម្ដុំភ្នំពេញថ្មីក៏ដោយ ប៉ុន្តែអ្នកនាងថា មុនពេលទទួលមរណភាពលោកចូលចិត្តចេញចូលធ្វើបុណ្យនៅក្នុងវត្តនោះជាប្រចាំ ទើបអ្នកនាង និងក្រុមគ្រួសារសម្រេចសាងសង់ចេតីយនៅក្នុងវត្តនោះតែម្ដង៕
ចែករំលែកព័តមាននេះ