រាជធានីភ្នំពេញ ៖ រាជរដ្ឋាភិបាលបានទទួលស្គាល់ និងលើកទឹកចិត្តឲ្យមានការផលិតធ្យូងអនាម័យយ៉ាងខ្លាំង ដើម្បីរួមចំណែកថែរក្សាបរិស្ថាន ធម្មជាតិ និងត្រូវបានចាត់ទុកជាឧស្សាហកម្មបៃតង និងថាមពលបៃតង ។ បច្ចុប្បន្ន…
រាជធានីភ្នំពេញ ៖ រាជរដ្ឋាភិបាលបានទទួលស្គាល់ និងលើកទឹកចិត្តឲ្យមានការផលិតធ្យូងអនាម័យយ៉ាងខ្លាំង ដើម្បីរួមចំណែកថែរក្សាបរិស្ថាន ធម្មជាតិ និងត្រូវបានចាត់ទុកជាឧស្សាហកម្មបៃតង និងថាមពលបៃតង ។ បច្ចុប្បន្ន បើទោះបីជាផលិតផលមួយនេះកំពុងមានការគាំទ្រពីអ្នកប្រើប្រាស់ក្នុងស្រុក និងមានឱកាសនាំចេញទៅទីផ្សារក្រៅប្រទេសក្ដី ប៉ុន្ដែទំហំនៃការផលិត និងការចូលរួមពីផលិតករ នៅមានកម្រិតនៅឡើយ ។
លោក អេង ឃ័ង អ្នកគ្រប់គ្រងក្នុងសិប្បកម្មធ្យូងអនាម័យ (Clean Charcoal) ដែលមានទីតាំងស្ថិតនៅក្នុងរាជធានីភ្នំពេញ បានប្រាប់កោះសន្តិភាពថា សិប្បកម្មធ្យូងអនាម័យរបស់លោកបានចាប់ផ្ដើមដំណើរការប្រហែលជាង១០ឆ្នាំមកហើយ ដោយកន្លងមក ក៏ធ្លាប់នាំចេញទៅក្រៅប្រទេសដែរ តែដោយសារតម្រូវការប្រើប្រាស់ក្នុងស្រុកកើនឡើង ទើបសិប្បកម្មលោកមិនអាចនាំចេញទៅក្រៅប្រទេសដូចមុនទៀត ។
លោកថា ៖« ប៉ុន្មានឆ្នាំមុន ខាងសិប្បកម្ម យើងបាននាំចេញទៅប្រទេសជប៉ុន និងចិន ប៉ុន្តែឥឡូវនេះមិនបាននាំចេញទៀតទេ គឺបានត្រឹមតែនៅរាជធានីភ្នំពេញ និងតាមខេត្តមួយចំនួនប៉ុណ្ណោះ ដោយសារតែទំហំនៃសង្វាក់ផលិតកម្មរបស់យើងមានកម្រិត » ។
លោកបន្តថា ៖« បច្ចុប្បន្ន បងប្អូនខ្មែរយើងមួយចំនួនធំចាប់ផ្តើមឲ្យតម្លៃលើការច្នៃប្រឌិតរបស់កូនខ្មែរដោយផ្ទាល់ និងយល់ដឹងពីការប្រើប្រាស់របស់ដែលមិនប៉ះពាល់ដល់សុខភាពនោះ ទើបធ្វើឲ្យការផ្គត់ផ្គង់ធ្យូងទៅក្រៅមិនអាចបន្តទៅទៀត ហើយណាមួយវាពិបាករកវត្ថុធាតុដើមយកមកកែច្នៃ ព្រោះធ្យូងអនាម័យនេះធ្វើពីត្រឡោកដូង និងសំបកដូងសឹងតែ១០០% » ។
លោកបញ្ជាក់ថា បច្ចុប្បន្ន សិប្បកម្មរបស់លោកមានសមត្ថភាពផលិតធ្យូងបានចាប់ពី៣ទៅ៤តោនក្នុង១ថ្ងៃ និងចែកចាយនៅរាជធានីភ្នំពេញ និងតាមបណ្ដាខេត្តមួយចំនួនទៀតមិនដែលសល់ទេ ដោយក្នុង១គីឡូក្រាម តម្លៃត្រឹមតែ១.២០០រៀលតាមដេប៉ូ តែបើតាមហាង គឺអាចបាន១.៥០០រៀល ទៅ១.៧០០រៀលក្នុង១គីឡូក្រាម ។
លោកពន្យល់ថា ៖« ធ្យូងអនាម័យ និងធ្យូងធម្មតា មានលក្ខណៈខុសគ្នាច្រើនដូចជា ធ្យូងអនាម័យពេលដុតទៅ គ្មានផ្សែង អត់ផ្ទុះ ឆេះងំបានយូរជាងធ្យូងធម្មតាប្រហែល១ទៅ២ម៉ោង ប៉ុន្តែកម្តៅភ្លើងវិញមិនសូវខ្លាំងដូចធ្យូងធម្មតាទេ ដោយសារធ្យូងនេះជាប្រភេទកែច្នៃ » ។
អ្នកគ្រប់គ្រងសិប្បកម្មធ្យូងអនាម័យរូបនេះបានបង្ហាញពីវិធីផលិតធ្យូង ដោយលោកលើកឡើងថា ដើម្បីចេញជាធ្យូងនេះបាន គឺមានដំណាក់កាលរបស់វា ។ ដំបូង យើងត្រូវយកត្រឡោកទៅដុតឲ្យក្លាយជាធ្យូង បន្ទាប់មកវាយឲ្យម៉ត់ដូចម្សៅ រួចហើយដាក់ចូលទៅក្នុងពុម្ពដែលមានរាងដូចដុំទឹកកកអនាម័យ ក្រោយមកទៀត គឺយើងយកវាទៅហាលក្រោមកម្តៅព្រះអាទិត្យរយៈពេល៣ថ្ងៃដើម្បីឲ្យវាស្ងួតល្អ ទើបចុងក្រោយច្រកធ្យូងទាំងនោះទៅក្នុងបាវដែលមានទម្ងន់២៥គីឡូក្រាម ។
រដ្ឋលេខាធិការក្រសួងឧស្សាហកម្ម និងសិប្បកម្ម លោក ហេង សុខគង់ បានថ្លែងថា មិនត្រឹមតែប្រភេទធ្យូងដែលផលិតចេញពីត្រឡោកដូងទេដែលរាជរដ្ឋាភិបាលយកចិត្តទុកដាក់ និយាយរួមឲ្យតែប្រភេទឧស្សាហកម្មបៃតង គឺរាជរដ្ឋាភិបាលបានលើកទឹកចិត្តជានិច្ច និងបានចែងនៅក្នុងកិច្ចព្រមព្រៀងអាស៊ាន ទាំងប្រភេទឧស្សាហកម្មបៃតង និងថាមពលបៃតង ។
លោកលើកឡើងដូច្នេះថា ៖« រាល់ប្រភេទឧស្សាហកម្មបៃតង និងថាមពលបៃតង គឺរាជរដ្ឋាភិបាលបានលើកចិត្តយ៉ាងខ្លាំង ហើយក៏បានចែងនៅក្នុងកិច្ចព្រមព្រៀងអាស៊ានរួចមកហើយដែរ » ។
លោក ហេង សុខគង់ បន្តថា ប្រភេទធ្យូងអនាម័យ គឺប្រជាពលរដ្ឋមួយចំនួនគាត់បានធ្វើវាយូរមកហើយ ប៉ុន្តែគ្រាន់តែថា បច្ចេកទេសនៅទាប តែក៏មានក្រុមហ៊ុនបរទេសជាច្រើនដែលផលិតវាឡើងដោយប្រើបច្ចេកទេសខ្ពស់ រហូតទទួលស្គាល់ពីរាជរដ្ឋាភិបាល ។
ដោយឡែកកម្ពុជាយើង ការផលិតធ្យូងអនាម័យនៅមានកម្រិតទាបនៅឡើយ ។ អីចឹង បងប្អូនដែលកំពុងផលិតធ្យូងពីកូនឈើ អាចពិចារណាបាន ព្រោះប្រភេទធ្យូងអនាម័យ គឺមានឱកាសច្រើនក្នុងការនាំចេញទៅក្រៅប្រទេស ។
ការធ្វើធ្យូងអនាម័យដែលច្នៃចេញពីត្រឡោកដូង ឬសំបកដូង ដែលមិនមែនចេញពីព្រៃឈើធម្មជាតិ គឺវាពិតជាប្រសើរខ្លាំងណាស់ ជាពិសេសបានចូលរួមចំណែកកាត់បន្ថយពីការកាប់ព្រៃឈើធម្មជាតិបានមួយកម្រិតទៀត ។
អនុប្រធានរដ្ឋបាលព្រៃឈើ លោកបណ្ឌិត កែវ អ៊ូម្លិះ ថ្លែងប្រាប់កោះសន្តិភាពថា នេះជាអ្វីដែលប្រជាពលរដ្ឋយើងគាត់ត្រូវការខ្លាំងណាស់ ព្រោះវាបានផ្ដល់ប្រយោជន៍ច្រើនពីការប្រើប្រាស់ធ្យូងអនាម័យ ជាពិសេសគឺម្ចាស់សិប្បកម្ម ឬម្ចាស់រោងចក្រ ដែលពួកគាត់មានគំនិតច្នៃប្រឌិតបែបនេះ ។ អីចឹង យើងគួរតែជំរុញការងារមួយនេះឲ្យបានច្រើន ដើម្បីរួមចំណែកកាត់បន្ថយព្រៃឈើ និងការពារបរិស្ថាននៅស្រុកយើងឲ្យកាន់តែប្រសើរ។
លោកថា ៖« មិនត្រឹមតែធ្យូងអនាម័យទេដែលចូលរួមចំណែកការពារព្រៃឈើនោះ គឺមានការប្រើប្រាស់គ្រឿងអគ្គិសនី ឡជីវៈឧស្ម័ន និងថាមពលផ្សេងៗទៀត ដែលធ្វើពីកាកសំណល់នៅជុំវិញផ្ទះរបស់យើង ។ ប៉ុន្តែយ៉ាងណា ក៏នៅមានសិប្បកម្មដែលផលិតធ្យូងចេញពីឈើធម្មជាតិ តែបើពួកគាត់គ្មានមធ្យោបាយផ្សេងក្នុងការបំពេញតម្រូវការប្រើប្រាស់ទេ សម្ពាធនៃការកាប់ឈើធ្វើធ្យូងនៅតែមានលក្ខណៈមួយគួរឲ្យបារម្ភបន្តទៀត » ។
លោក កែវ អ៊ូម្លិះ បានបន្ថែមថា រាល់សិប្បកម្មផលិតធ្យូងដទៃទៀត ធ្វើយ៉ាងណា គួរតែចាប់ផ្ដើមប្រើប្រាស់ថាមពលក្រៅពីព្រៃឈើដែលជាសម្បត្តិធម្មជាតិ ព្រោះតម្រូវការរបស់យើងមានការកើនឡើង ជាហេតុធ្វើឲ្យបាត់បង់ព្រៃឈើពីមួយថ្ងៃទៅមួយថ្ងៃ ហើយក្រសួងតែងតែជំរុញរាល់ការប្រើប្រាស់នូវឡឧស្ម័នផ្សេងៗ ហើយក៏ទទួលបានលទ្ធផលជោគជ័យស្ទើរគ្រប់ប្រទេសផងដែរ ៕
ចែករំលែកព័តមាននេះ