រាជធានីភ្នំពេញ ៖ ក្នុងសង្គមសិល្បៈតារាចម្រៀង តារាកំប្លែង មួយចំនួនបានបណ្តុះបណ្តាលឱ្យកូនចាប់អាជីពជាអ្នកសិល្បៈដូចខ្លួនដែរ ។
តំណក់ឈាមសិល្បៈដែលមហាជនបានស្គាល់ និងសរសើរពីទេពកោសល្យសម្តែងកន្លងមករួមមាន នាយកយកូនរបស់នាយកុយ នាយព្រែកកូនយាយយ៉យ កញ្ញាវី ឌីណែត កូនលោកហ៊ួរ ឡាវី និងកូនប្រុសទាំង៣លោកព្រាប សុវត្ថិ ។ មួយរយៈចុងក្រោយនេះកូនស្រីតារាកំប្លែងនាយក្រូច បានក្លាយជាអ្នកចម្រៀង និងកូនស្រីនាងអ៊ិត ជាតារាកំប្លែងបានក្លាយជាអ្នកចម្រៀងដែរ ។
នាយកយ កូនប្រុសតារាកំប្លែងជួង ជី ហៅនាយកុយ ត្រូវបានទស្សនិកជនមើលឃើញថា ស្ទីលសម្តែងរបស់នាយបង្ហាញមកចំចិត្តអ្នកមើល ពោលមុខមាត់សមជាអ្នកកំប្លែង មានភាពក្រមិចក្រមើម ពោលគឺបុគ្គលិកលក្ខណៈមើលមួយភ្លែតដូចនាយកុយជាឪពុកបេះបិទ ។ នាយកយកំពុងតែមានវត្តមានក្នុងកម្មវិធី «មន្តស្នេហ៍សំនៀង» «តន្ត្រីស្រុក ស្រែ» និងកម្មវិធីមួយចំនួនទៀតនៅទូរទស្សន៍អាស៊ីអាគ្នេយ៍ ។
ចំពោះនាយព្រែកកូនប្រុស យាយយ៉យ ប្រឡូកសិល្បៈពេញទំហឹងតាំងពីកុមារភាព ។ ទស្សនិកជនចាំជាងគេក្នុងភាពយន្តរឿង«នេសាទក្រពើ» របស់ផលិតកម្មហង្សមាស ។ មានរឿងជាច្រើនទៀតដែលនាយព្រែកសម្តែងតាំងពីក្មេង ។
នាយព្រែកពេលពេញវ័យកំលោះបានក្លាយជាពិធីករតាមស្ថានីយទូរទស្សន៍ ធំៗដូចជាបាយ័ន ស៊ីធីអិន ម៉ាយធីវី និងបន្តថតភាពយន្តដូចពីមុនដែលជួយរកចំណូលជូន ។
កញ្ញាវី ឌីណែត កូនស្រីលោកហ៊ួរ ឡាវី បានក្លាយជាតារាចម្រៀងលំដាប់យុវវ័យពោរពេញដោយទេពកោសល្យ ច្រៀងបានទាំងបទពីដើម និងចម្រៀងសម័យ ។ រហូតមកទល់ពេលនេះវី ឌីណែត ក្លាយជាតារាចម្រៀងពេញសិទ្ឋិប្រចាំផលិតកម្មហង្សមាស ។
អាជីពចម្រៀងរបស់វី ឌីណែតគឺពេញនិយមខ្លាំងល្បីល្បាញ ហើយកាន់តែវិវឌ្ឍខ្លួន សូម្បីតែក្បាច់រាំក៏ខ្លាំងមិនធម្មតា ។
ចំណែកកូនស្រីនាងអ៊ីត និងកូនស្រីនាយក្រូចទើបវិវឌ្ឍខ្លួនជាអ្នកចម្រៀង ហើយទទួលបានការចាប់អារម្មណ៍បន្ទាប់ពីស្ថានីយទូរទស្សន៍មួយចំនួនផ្តល់ឱកាសសម្តែង ៕
ចែករំលែកព័តមាននេះ