រាជធានីភ្នំពេញ ៖ ដោយមើលឃើញពីភាពខ្វះខាតនៅសាលាបឋមសិក្សាមួយនៅតំបន់តាតៃ ក្រុមហ៊ុន Havas Riverorchid Cambodia បានចូលរួមក្នុងសកម្មភាពមនុស្សធម៌ក្នុងន័យផ្តល់នូវការឧបត្ថម្ភគាំទ្រដល់ប្រជាជនជួបការលំបាកក្នុងប្រទេសកម្ពុជា។
សម្រាប់ការចូលរួមចំណែកនៃសកម្មភាពនេះ ក្រុមហ៊ុន Havas Riverorchid Cambodia បានបរិច្ចាគសម្ភារៈសិក្សា និងថវិការមួយចំនួនដល់សិស្សានុសិស្សចំនួន ១៨៨ នាក់ នៅបឋមសិក្សាតាតៃ។ ក្នុងនោះក្រុមហ៊ុន Unilever Cambodia ដែលជាអតិថិជនរបស់ Havas Riverorchid Cambodia ក៏រីករាយចូលរួមបរិច្ចាគផលិតផលមួយចំនួន ដូចជាថ្នាំដុសធ្មេញស៊ីកណល អំបិល ម្លួរ និងសាប៊ូដុសខ្លួនកម្ចាត់មេរោគឡៃប៊យ ដល់សិស្សានុសិស្ស និងគ្រូបង្រៀននៅទីនោះផងដែរ។
ការចែកសម្ភារៈសិក្សានេះ បានធ្វើឡើងនៅពេលដែលក្រុមហ៊ុន Havas Riverorchid Cambodia ដែលជាក្រុមហ៊ុនផ្សព្វផ្សាយពាណិជ្ជកម្មឈានមុខគេនៅកម្ពុជាបានចាប់ផ្តើមឆ្នាំថ្មី ២០១៨ បានរៀបចំដំណើរកម្សាន្តប្រចាំឆ្នាំទៅកាន់ខេត្តកោះកុង សម្រាប់បុគ្គលិករបស់ខ្លួនចំនួន ១១៥ នាក់ សម្រាប់ការភ្ជាប់ទំនាក់ទំនង និងពង្រីកការយល់ដឹងបន្ថែមពីកម្ពុជាទាំងមូល រួមទាំងតំបន់ដាច់ស្រយាល។
លោក Anthony Keck អគ្គនាយកក្រុមហ៊ុន Havas Riverorchid ប្រចាំកម្ពុជា មានប្រសាសន៍ថា ៖ «យើងទទួលបានសមិទ្ធផលជាច្រើនពីការងារនៅកម្ពុជា។ ការអភិវឌ្ឍន៍ និងភាពរស់រវើកនៃប្រទេសបានធ្វើឲ្យការងាររបស់យើងកាន់តែមានភាពភ្ញាក់ផ្អើល ហើយវាពិតជាមានតម្លៃណាស់ ក្នុងការបង្ហាញដល់អតិថិជនរបស់យើង និងយុទ្ធនាការនានារបស់ពួកគេ »។
លោក Anthony Keck បានបន្ថែមថា «វាពិតជាត្រឹមត្រូវណាស់ដែលយើងអាចបរិច្ចាគបន្តិចបន្តួចពេលយើងមានឱកាស ហើយយើងពិតជារីករាយណាស់ដែលពេលនេះយើងមានឱកាសឧបត្ថម្ភដល់កុមារដែលត្រូវការជំនួយពីយើង»៕
ចែករំលែកព័តមាននេះ