រាជធានីភ្នំពេញ ៖ យុវតី ដាវណ្ណ ជេន្នី ជាតារាសម្តែងវ័យក្មេងប៉ុណ្ណោះ តែបើនិយាយពីតិចនិចសម្តែងវិញ មិនបាច់និយាយទេ គឺអាចធ្វើបានស្ទើរតែគ្រប់ស្ទីល។ ម្ល៉ោះហើយទើបនាងត្រូវបានអ្នកស្រី ពាន់ ភួងបុប្ជា ដែលពូកែចុចតួចេះសម្តែងពេញចិត្តតារាក្មេងរូបនេះ ដោយឱ្យចូលសម្តែងជាមួយអ្នកស្រីអំឡុងពេលនៅស៊ីធីអិន។
ក្រោយពេលបាត់មុខមួយរយៈមក ដាវណ្ណ ជេន្នី បានប្រកាសចូលសិល្បៈវិញ ព្រមទាំងបានរៀបចំពិធីខួបកំណើតកាលពីយប់មិញនេះ ក្នុងបរិយាកាសរីករាយដែលម្តាយជាអ្នករៀបចំរំលេចឡើងជូនកូនស្រីសំណប់ចិត្ត។ ធ្លាប់តែឃើញនៅក្នុងភាពយន្តតាំងពីក្មេង ស្រាប់តែនៅដំណាច់ឆ្នាំ២០១៧នេះ តារាសម្ដែងដែលមានឈ្មោះបោះសំឡេងនៅក្នុងពិភពសិល្បៈតាំងពីវ័យកុមារភាពរូបនេះ មានវ័យពេញ១៧ឆ្នាំហើយ ដោយរូបរាង និងមុខមាត់របស់នាង ក៏បែកសាច់ស្អាតជាងមុន ហើយរំលេចសម្រស់ផូរផង់មិនចាញ់នារីពេញវ័យទាំងពួងនោះដែរ បើទោះជានាងមើលទៅហាក់នៅក្មេងវ័យមិនទាន់ពេញរូបពេញរាងនៅឡើយ។
តារាសម្តែងវ័យក្មេង ដាវណ្ណ ជេន្នី ត្រូវបានប្រកាសថា កាន់តែមានទីផ្សារខាងផ្នែកសម្ដែង តែក៏មិនទាន់ខ្លាំងក្លាដូចកាលពីវ័យកុមារភាពនោះដែរ បើធៀបនឹងស្នាដៃដែលនាងទើបតែទទួលបានពេលនេះ។
អ្នកស្រី ច័ន្ទ សោភ័ណ្ឌ ជាតារាសម្តែង និងត្រូវជាម្តាយរបស់ វណ្ណី ជេន្នី បានថ្លែងថា ពេលនេះកូនស្រីរបស់អ្នកស្រីត្រឡប់មកពីថតសម្តែងឡើងវិញ បន្ទាប់ពីផ្អាកមួយសន្ទុះធំ។
ការផ្អាកនេះមិនមែនមកពីខ្ជិលសម្តែងអ្វីនោះទេ គឺមកពីនាងដាក់តួកូនក្មេងក៏មិនសម ដាក់តួពេញរូបរាងក៏នៅស្ទើរ ទើបផលិតករសុំឱ្យចាំ១ឆ្នាំ ឬ២ឆ្នាំ ទើបមកវិញ ដើម្បីពេញរូបសម្បត្តិស្រណុកចាប់តួ។
អ្នកស្រីបន្តទៀតថា ក្រោយកូនធំបានបន្តិចផលិតករក៏ចាប់អារម្មណ៍ហៅសម្តែងឡើងវិញបានប៉ុន្មានរឿងមកហើយ ព្រោះបើនិយាយពីកូនស្រីមួយនេះ គ្នាថតសម្តែងតាំងពីអាយុ៦ឆ្នាំ ហើយទាក់ចិត្តអ្នកស្រី ពាន់ ភួងបុប្ជា ហៅថត រហូតកាលនៅក្មេងវ៉ាដាច់ហ្មង ឱ្យតែរឿងភាគនៅស៊ីធីអិន គឺកូនស្រីសម្តែងជាប់ច្រើន ទើបទស្សនិកជននៅចងចាំ។
ចែករំលែកព័តមាននេះ