ខេត្តកំពង់ស្ពឺ ៖ ជនសង្ស័យជាមុខសញ្ញាជួញដូរគ្រឿងញៀនមួយក្រុមត្រូវបានចៅហ្វាយខេត្ត ដឹកនាំកម្លាំងចុះបង្ក្រាបគ្រឿងញៀន ជាក់ស្តែងកាលពីរសៀលថ្ងៃទី១៨ ខែវិច្ឆិកា ឆ្នាំ២០១៧ ។
លោក វ៉ី សំណាង អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តកំពង់ស្ពឺបានដឹកនាំកម្លាំងប្រដាប់អាវុធទាំង៣ប្រភេទ នគរបាល អាវុធហត្ថ និងយោធា រួមទាំងអាជ្ញាធរមូលដ្ឋានជាច្រើននាក់ បានបង្ក្រាបករណីគ្រឿងញៀន និងបទល្មើសផ្សេងៗតាមរយៈការងាររដ្ឋបាលចំហរ ព្រមទាំងអនុវត្តតាមដីកាតុលាការ ។
មន្ត្រីសាលាខេត្តមួយរូបបង្ហើបប្រាប់ថា ប្រតិបត្តិការបង្ក្រាបនេះធ្វើឡើងនៅភូមិស្រែអំបិល ឃុំត្រពាំង ស្រុកសំរោងទង ខេត្តកំពង់ស្ពឺ កម្លាំងចម្រុះបានឃាត់ជនសង្ស័យចំនួន១២នាក់ រឹបអូសបានកាំភ្លើងចំនួន០២ដើមម៉ាកអាកា កាត់ស្នូក០១ដើម មាន០៨គ្រាប់ ម៉ាករ៉ូឡូ០១ដើម មាន៧គ្រាប់ ម៉ូតូ០២គ្រឿង គ្រឿងញៀន០១កញ្ចប់រួមសម្ភារផ្សេងទៀត ។
ជនសង្ស័យទាំង១២នាក់ត្រូវប្រគល់ទៅឲ្យជំនាញស្នងការនគរបាលខេត្តកំពង់ស្ពឺចាត់ចែង ដើម្បីស្វែងរកជនពាក់ព័ន្ធ និងជនមិនពាក់ព័ន្ធ ក្នុងករណីសង្ស័យជាច្រើនដោយជនសង្ស័យមួយចំនួនដែលគេចខ្លួន លោកបានបញ្ជាឲ្យស្រាវជ្រាវបន្តដើម្បីចាប់ខ្លួនមកផ្តន្ទាទោសតាមច្បាប់ ៕
ចែករំលែកព័តមាននេះ