រាជធានីភ្នំពេញ ៖ បន្ទាប់ពីទទួលជោគជ័យជាបន្តបន្ទាប់ក្នុងនាមជាពិធីការិនី និងសម្តែងមកពិធីការិនីសម្តីស្រទន់របស់ស្ថានីយទូរទស្សន៍អាស៊ីអាគ្នេយ៍អ្នកនាងទូច ស៊ីណាត បានអះអាងថា នាងកំពុងតែប្រឹងប្រែងបន្ថែមទៀតដើម្បីអភិវឌ្ឍខ្លួនឯងឲ្យក្លាយជាអ្នកផលិតកម្មវិធីឲ្យទូរទស្សន៍ដែលមានការគាំទ្រពីអ្នកទស្សនា ។
រាជធានីភ្នំពេញ ៖ បន្ទាប់ពីទទួលជោគជ័យជាបន្តបន្ទាប់ក្នុងនាមជាពិធីការិនី និងសម្តែងមកពិធីការិនីសម្តីស្រទន់របស់ស្ថានីយទូរទស្សន៍អាស៊ីអាគ្នេយ៍អ្នកនាងទូច ស៊ីណាត បានអះអាងថា នាងកំពុងតែប្រឹងប្រែងបន្ថែមទៀតដើម្បីអភិវឌ្ឍខ្លួនឯងឲ្យក្លាយជាអ្នកផលិតកម្មវិធីឲ្យទូរទស្សន៍ដែលមានការគាំទ្រពីអ្នកទស្សនា ។
ក្នុងបទសម្ភាសន៍ដោយផ្ទាល់ជាមួយកោះសន្តិភាព កាលពីថ្ងៃទី១៥ កញ្ញា ពិធីការិនីដែលមានដើមកំណើតនៅរាជធានីភ្នំពេញរូបនេះបាននិយាយថា បច្ចុប្បន្នបើទោះបីជានាងកំពុងតែកាន់កម្មវិធីជាច្រើននៅក្នុងស្ថានីយទូរទស្សន៍អាស៊ីអាគ្នេយ៍ក៏ដោយ ប៉ុន្តែដោយមានការគាំទ្រ និងបង្ហាត់បង្ហាញពីថ្នាក់ដឹកនាំនៅក្នុងស្ថានីយនោះ នាងនឹងប្រឹងធ្វើយ៉ាងណាដើម្បីអភិវឌ្ឍខ្លួនឯងឲ្យក្លាយជាអ្នកផលិតកម្មវិធីទូរទស្សន៍បន្ថែមទៀត ខណៈពេលនេះនាងក៏ជាអ្នកជំនួយការអ្នកផលិតកម្មធីរបស់ស្ថានីយទូរទស្សន៍មួយនេះផងដែរ ។
អ្នកនាងស៊ីណាត បញ្ជាក់ថា បើទោះបីជានាងមានឱកាសបានសម្តែងខ្សែភាពយន្តក៏ដោយ តែនាងគ្មានមហិច្ឆតាណាមួយចង់ក្លាយជាសិល្បការិនីម្នាក់ឡើយ ដោយហេតុថា គោលបំណងសំខាន់របស់នាងនាពេលនេះគឺចង់ក្លាយជាអ្នកដឹកនាំកម្មវិធីទូរទស្សន៍ និងជាអ្នករកស៊ីម្នាក់។
ពិធីការិនីរូបនេះយល់ថា អាជីពជាពិធីការិនីរបស់នាងនាពេលសព្វថ្ងៃនេះប្រៀបបាននឹងទឹករលកដែលត្រូវច្រានដោយរលកក្រោយ ខណៈពេលដែលបច្ចុប្បន្នមានពិធីការិនីក្មេងៗជាច្រើនកំពុងតែប្រជ្រៀតខ្លួនចូលក្នុងអាជីពមួយនេះ ហើយស្របពេលដែលនាងមានវ័យកាន់តែជ្រេរហើយនោះ ។ ទោះជាយ៉ាងណាក្តី ពិធីការិនីសម្តីផ្អែមរូបនេះអះអាងថា ប្រសិនបើនៅតែមានឱកាស និងនៅតែមានការគាំទ្រពីទស្សនិកជននោះនាងនឹងនៅតែបន្តក្នុងការងារមួយនេះព្រោះនាងស្រលាញ់ ការងារទូរទស្សន៍ ជាពិសេសការផលិតកម្មវិធីដែលមានការទទួលស្គាល់ពីទស្សនិកជន ។ ការងារជាពិធីការិនីរបស់នាងសព្វថ្ងៃនេះគឺបានមកដោយមិនបានព្រាងទុកឡើយ ពោលគឺបានមកដោយមានការជួយជ្រោមជ្រែងពីថ្នាក់ដឹកនាំរបស់ស្ថានីយទូរទស្សន៍អាស៊ីអាគ្នេយ៍ ដោយសារពីដំបូងនាងគ្មានជំនាញខាងផ្នែកនេះឡើយ។
អ្នកនាង ទូច ស៊ីណាត និយាយថា ដើមឡើយនាងជាអ្នកបង្ហាញម៉ូដម្នាក់នៅក្នុងក្រុមសាព័រណ៍តែបានបោះបង់ចោលអាជីពនេះដោយសារជាប់រវល់ការងារនិងកូន ។ ក្រោយមកនាងបានដាក់ពាក្យនៅស្ថានីយទូរទស្សន៍អាស៊ីអាគ្នេយ៍ នៅចុងឆ្នាំ២០០៨ ហើយក៏ក្លាយជាពិធីការិនីចាប់ពីពេលនោះមក ។ កម្មវិធីដែលនាងកាន់សព្វថ្ងៃនេះមានដូចជាកម្មវិធីសំឡេងមាសក្នុងដួងចិត្ត ជីវិតខ្ញុំ សុភាសិត ពេជ្រកំពុងច្នៃ និងកម្មវិធីសន្ទនាជាមួយសិល្បករ និងវរជនខ្មែរ ។ក្រៅពីអាជីពជាពិធីការិនី អ្នកនាងស៊ីណាត ក៏មានឱកាសបានសម្តែងក្នុងខ្សែរឿងសម្រាប់ស្ថានីយទូរទស្សន៍អាស៊ីអាគ្នេយ៍ចំនួន៣រឿងដែរគឺរឿងស្នេហាស្រុកស្រែ រាជិនីបញ្ចពណ៌ និងរឿងជីវិតលើវិថីសិល្បៈ ។
ពិធីការិនីកូន២រូបនេះអះអាងថា ឱកាសជាបន្តបន្ទាប់នេះជាការជំរុញចិត្តនាងឲ្យកាន់តែមានការចូលចិត្តលើអាជីពសិល្បៈ ហើយចង់អភិវឌ្ឍខ្លួនឯងបន្ថែមទៀតឲ្យក្លាយជាអ្នកផលិតកម្មវិធីម្នាក់ដែលមានការគាំទ្រ ។ដោយសារតែមានចិត្តស្រលាញ់មុខរបររកស៊ីផងនោះ ទៅថ្ងៃមុខក្រៅពីអាជីពសិល្បៈអ្នកនាងទូច ស៊ីណាត ក៏មានបំណងបើករបររកស៊ីផ្សេងមួយទៀត ហើយចង់ឲ្យរបរទាំងពីរនេះធ្វើដំណើរទៅមុខទន្ទឹមគ្នា ៕
ចែករំលែកព័តមាននេះ