រាជធានីភ្នំពេញ ៖ ទោះបីជាតារាចម្រៀងលាន សូនី បាត់មុខមួយរយៈធំពីវិស័យសិល្បៈ ដែលគេគិតថា ប្រហែលជាបោះបង់ចោលអាជីពជាសិល្បៈទៅហើយ តែលោកលួចខ្សឹបប្រាប់កោះសន្តិភាពថា លោកមិនទាន់ចាកចេញពីសិល្បៈទេ ។ រូបលោកមិនបានបង្ហាញមុខញឹកញាប់នោះព្រោះតែជាប់រៀបចំកម្មវិធីតន្ត្រីតាមបណ្តាខេត្ត និងកិច្ចការផ្ទាល់ខ្លួនមួយទៀត ដែលបច្ចុប្បន្នលោកបានបើកក្រុមហ៊ុនមួយឈ្មោះមេឌាសូនី ដែលរៀបចំទទួលកម្មវិធីផ្សេងៗ ដូចជាជួយផ្សព្វផ្សាយផលិតផលជាដើម។
លោកលាន សូនី លើកឡើងថា សព្វថ្ងៃនេះ អ្នកសិល្បៈស្រករក្រោយមានការរីកដុះដាលច្រើនណាស់ ហើយល្បីឈ្មោះទៀតផង ដែលលោកគិតថា សម្រាប់សិល្បករជើងចាស់មិនអាចនៅប្រកួតប្រជែងជាមួយសិល្បករ សិល្បការិនីវ័យក្មេងទាំងនោះបានទេ ។ ប៉ុន្តែក្នុងនាមជាសិល្បករជើងចាស់ លោកមិនភ្លេចក្នុងការជួយអប់រំណែនាំ និងបណ្តុះបណ្តាលដល់សិល្បករ សិល្បការិនីវ័យក្មេងតាមលទ្ធភាព ដើម្បីឱ្យពួកគេបានដើរលើផ្លូវដ៏ត្រឹមត្រូវមានអនាគតល្អក្នុងជីវិតសិល្បៈ ព្រមទាំងរួមចំណែកក្នុងការលើកស្ទួយវិស័យសិល្បៈ វប្បធម៌ជាតិ។ពាក់ព័ន្ធនឹងការចាកចេញជាលើកចុងក្រោយពីស្ថានីយទូរទស្សន៍បាយ័ន ដែលគេបានដឹងថា ជាពេលវេលាដែលលោកលាន សូនី ត្រូវបាត់មុខពីវិថីសិល្បៈនោះ លោកនិយាយថា ជាការចាកចេញដោយខ្លួនឯង ដោយសារតែវិបត្តិគ្រួសារយ៉ាងធ្ងន់ធ្ងរ មិនអាចបន្តការងារនៅស្ថានីយទូរទស្សន៍នេះបាន។
ប៉ុន្តែមុនការចាកចេញគឺលោកបានរៀបចំឱ្យមានអ្នកស្នងរួចរាល់អស់ហើយ។ ដូច្នេះក្រោយការចាកចេញកម្មវិធីដែលលោកធ្លាប់គ្រប់គ្រងនេះ គឺអាចបន្តដោយប្រក្រតី និងទទួលបាននូវការគាំទ្រដដែល។ ការចាកចេញនេះគឺរវាងលោក និងស្ថានីយទូរទស្សន៍បាយ័នមិនមានបញ្ហាអ្វីទាំងអស់ តែជាការចាកចេញដោយខ្លួនឯង ផ្ទុយពីពាក្យចចាមអារ៉ាមខ្លះនិយាយថា លោកត្រូវគេបណ្តេញចេញ។
លោកលាន សូនី បានរំលឹកអតីតកាលដែលលោកធ្វើជាពិធីករនៅស្ថានីយទូរទស្សន៍បាយ័ននិងធ្វើឱ្យកេរ្តិ៍ឈ្មោះល្បីល្បាញក្នុងជីវិតសិល្បៈនោះគឺលោកបានចូលរួម និងធ្វើពិធីករក្នុងកម្មវិធីធំៗមួយចំនួនដូចជាកម្មវិធីតន្ត្រីស្រុកស្រែពិភពរីករាយ រាត្រីពណ៌ស្វាយ ប្រភពវប្បធម៌ខ្មែរជាដើម។ លោកមិនភ្លេចគុណបំណាច់ស្ថានីយទូរទស្សន៍បាយ័នដែលបានលើកស្ទួយកិត្តិយស និងប្រជាប្រិយភាពលោកក្នុងវិស័យសិល្បៈឡើយ។
តាមប្រវត្តិលោកលាន សូនី បានចូលរួមក្នុងវិស័យសិល្បៈអំឡុងឆ្នាំ១៩៩៧ ខណៈពេលដែលលោកកំពុងសិក្សានៅឡើយ។ បន្ទាប់មកលោកបានចូលរួមក្នុងកម្មវិធីប្រឡងសិល្បៈបុរាណនៅស្ថានីយទូរទស្សន៍ទូរទស្សន៍ជាតិ ជាប់ចំណាត់ថ្នាក់ល្អ គ្រាន់បើ។ ចាប់ពីពេលនោះមក ជីវិតរបស់លោកអាចនិយាយបានថា ផ្ញើលើវិស័យសិល្បៈតែម្តង សំខាន់ចាប់ពីឆ្នាំ១៩៩៧ មក ក្នុងពេលដែលវិស័យសិល្បៈចាប់ផ្តើមទទួលបានការគាំទ្រ ។
លោកលាន សូនី មានអាយុ៣៩ឆ្នាំ និងមានកូនប្រុសស្រីចំនួន៤នាក់ ក្នុងនោះកូនស្រីច្បងទើបប្រឡងជាប់សញ្ញាប័ត្រមធ្យមសិក្សាទុតិយភូមិក្នុងឆ្នាំ២០១១នេះ ។
លោកលាន សូនី មិនមានបំណងបណ្តុះបណ្តាលកូនឱ្យចូលប្រឡូក្នុងវិស័យសិល្បៈទេ ដោយលោកលើកឡើងថា តាមនិស្ស័យកូនទាំង៤នាក់ គឺមិនបានបង្ហាញចំណង់ចំណូលចិត្តចូលរួមក្នុងវិស័យសិល្បៈឡើយ ៕
ចែករំលែកព័តមាននេះ