រាជធានីភ្នំពេញ ៖ នៅក្នុងពិធីក្រុងពាលីសែនព្រេនសុំបើកកាមេរ៉ាចេញថតរឿង «ចាំថ្ងៃវិលវិញ» កាលពីរសៀលថ្ងៃទី ២៧ តុលា ឆ្នាំ២០១១ នៅផ្ទះលេខ២៤ ភូមិសន្សំកុសល សង្កាត់បឹងទំពុន ខណ្ឌមានជ័យ លោកទេព សុខ ចាងហ្វាងផលិតកម្មមានប្រសាសន៍ថា កន្លងមកនិងបច្ចុប្បន្នភាពយន្តខ្មែរមិនទាន់រីកចម្រើន និងធ្លាក់ចុះទេ ព្រោះថា ការរស់ឡើងវិញនៃភាពយន្តខ្មែរមិនទាន់ដល់ស្តង់ដាណាមួយនៅលើឆាកអន្តរជាតិទទួលស្គាល់ថាមានគុណភាពល្អអាចឈរលើលំដាប់ណាមួយគេទទួលយកបាន។
លោកទេព សុខ ចាងហ្វាងផលិតកម្មមានប្រសាសន៍ថា ចំពោះផលិតកម្មរបស់លោករៀបចំក្រុងពាលីសែនព្រេនសុំបើកកាមេរ៉ាចេញថតភាពយន្តថ្មីរឿង «ចាំថ្ងៃវិលវិញ» នេះគឺចង់ចូលរួមផ្សព្វផ្សាយភាពយន្តខ្មែរឱ្យប្រជាជនខ្មែរ និងនៅលើឆាកអន្តរជាតិបានឃើញបានស្គាល់ស្នាដៃខ្មែរ។ រឿងនេះជាភាពយន្តបែបមនោសញ្ចេតនាមានឧត្តមគតិវប្បធម៌ខ្ពស់ដែលមានលោកជា សាណារ៉ា ជាអ្នកនិពន្ធ និងដឹកនាំរឿងដោយលោកលឹម សាខន។ មានតារាចាស់ថ្មីជាច្រើនរូបចូលរួមសម្តែងដូចជាលោកញ៉ែម សុគន្ធ តួឯកប្រុសនិងអ្នកនាងឌុច សុភា តួឯកស្រី ព្រមទាំងលោកអៃ សារឹម លោកខ្លូត រតនា និងអ្នកស្រី ឌី សាវ៉េតជាដើម ។
លោកចាងហ្វាងផលិតកម្មបន្តថា រឿង «ចាំថ្ងៃវិលវិញ» ក្រុមការងារផលិតរបស់លោកនឹងខិតខំប្រឹងប្រែងថតទាំងយប់ទាំងថ្ងៃក្នុងរយៈពេលពីមួយខែទៅ២ខែ ហើយធ្វើយ៉ាងណាឱ្យអស់ពីសមត្ថភាពដើម្បីឱ្យមានកម្រិតស្តង់ដាដែលទស្សនិកជនខ្មែរ និងអន្តរជាតិបានទស្សនា ហើយទទួលយកបាន ។
លោកលឹម សាខន អ្នកដឹកនាំរឿងមានប្រសាសន៍ថា នេះជាស្នាដៃលើកទី៤ហើយបន្ទាប់ពីលោកដឹកនាំលើកទី១ រឿង «អ្នកទោសដួងចិត្ត» ទី២ រឿង «សាងស្នេហ៍ក្នុងសុបិន» ទី៣ រឿង «ស៊ូស្លាប់ក្រោមទង់៦ពណ៌» និងរឿងទី៤ ដំណើរការថតចាប់ពីពេលនេះទៅ គឺរឿង «ចាំថ្ងៃវិលវិញ» ជារឿងបែបមនោសញ្ចេតនា កាច់កុង កំប្លែងដោយក្រុមការងារជ្រើសរើសទីតាំងថតនៅខេត្តកំពង់ស្ពឺ កំពង់សោម កណ្តាល ភ្នំពេញ និងខេត្តតាកែវ ។
លោកលឹម សាខន មានប្រសាសន៍ថា លោកជ្រើសរើសអ្នកនាងឌុច សុភា និងលោកញ៉ែម សុគន្ធ ឱ្យចូលរួមសម្តែងជាតួឯកក្នុងរឿងចាំថ្ងៃវិលវិញនេះ ព្រោះចរិតឫកពារបស់អ្នកទាំង២មានលក្ខណៈសមរម្យនៅក្នុងសាច់រឿង តែនៅថ្ងៃក្រុងពាលី អ្នកទាំង២ជាប់រវល់មិនបានមកចូលរួមទេ៕
ចែករំលែកព័តមាននេះ