រាជធានីភ្នំពេញ ៖ ពិធីការិនីរូបស្រស់ថ្ពាល់ខួច ញញឹមមានមន្តស្នេហ៍ ពេជ្រ សេរីរ័ត្ន បានបដិសេធចំពោះព័ត៌មានដែលលេចឮថា នាងត្រៀមចាកចេញពីស្ថានីយទូរទស្សន៍បាយ័ន ទៅបម្រើឱ្យស្ថានីយផ្សេងទៀត។ នាងបញ្ជាក់ថា នាងនឹងអវត្តមានរយៈពេល៣ខែពីស្ថានីយទូរទស្សន៍បាយ័ន ព្រោះតែនាងត្រូវចាកចេញទៅ
រាជធានីភ្នំពេញ ៖ ពិធីការិនីរូបស្រស់ថ្ពាល់ខួច ញញឹមមានមន្តស្នេហ៍ ពេជ្រ សេរីរ័ត្ន បានបដិសេធចំពោះព័ត៌មានដែលលេចឮថា នាងត្រៀមចាកចេញពីស្ថានីយទូរទស្សន៍បាយ័ន ទៅបម្រើឱ្យស្ថានីយផ្សេងទៀត។ នាងបញ្ជាក់ថា នាងនឹងអវត្តមានរយៈពេល៣ខែពីស្ថានីយទូរទស្សន៍បាយ័ន ព្រោះតែនាងត្រូវចាកចេញទៅសម្តែងនៅសហរដ្ឋអាមេរិករួមជាមួយសិល្បករ-សិល្បការិនីជាច្រើនទៀតក្នុងឱកាសអបអរសាទរបុណ្យភ្ជុំបិណ្ឌប្រពៃណីខ្មែរនាឆ្នាំនេះ ។
ពេជ្រ សេរីរ័ត្ន បញ្ជាក់ថា នាងបានសុំច្បាប់ឈប់សម្រាកពីស្ថានីយទូរទស្សន៍បាយ័នរយៈពេល៣ខែ គិតចាប់ពីពាក់កណ្តាលខែកញ្ញា ឆ្នាំ២០១១ ដែលជាពេលវេលានាងត្រូវចាកចេញទៅសម្តែងនៅអាមេរិក។ បន្ទាប់ពីវិលត្រឡប់មកពីក្រៅប្រទសវិញ រូបនាងនឹងបង្ហាញមុខក្នុងស្ថានីយទូរទស្សន៍បាយ័នបន្តទៀត ព្រោះនាងគ្រាន់តែសុំសម្រាកច្បាប់ ហើយគ្មានាទំនាស់ ឬអាក់អន់ស្រពន់ចិត្តអ្វីទាំងអស់ជាមួយថ្នាក់ដឹកនាំ និងសហការីរួមអាជីព។ ម្យ៉ាងទៀត ស្ថានីយទូរទស្សន៍បាយ័នគឺជាទ្រនំស្តុកស្តម្ភសម្រាប់រូបនាង និងអាជីពរបស់នាង ។ ដូច្នេះគ្មានពេលណាមួយដែលនាងត្រូវសម្រេចចិត្តដើរចេញដោយងាយៗទេ ។
ពាក់ព័ន្ធទំនាក់ទំនងរវាងនាងជាមួយលោកគង់ វិសាល ដែលកន្លងមកមានសារព័ត៌មានខ្លះចុះផ្សាយថា ជាទំនាក់ទំនងស្នេហានោះ កញ្ញាពេជ្រ សេរីរ័ត្ន បញ្ជាក់ជាថ្មីម្តងទៀតថា រវាងរូបនាងនិងលោកគង់ វិសាល គឺរាប់អានគ្នាជាធម្មតាប៉ុណ្ណោះ មិនបានឈានដល់ស្នេហាដូចការលេចឮតាមសារព័ត៌មានទេ។ ទន្ទឹមនោះនាងបានប្រកាសថា បេះដូងរបស់នាងនៅតែរក្សាភាពទំនេរ និងពោរពេញដោយសេរីភាព គ្មានចំណងអ្វីទាំងអស់ ហើយការនិយាយនេះគឺស្មោះអស់ពីបេះដូង ។
ទោះជាយ៉ាងណាក្តី រូបថតរបស់នាង និងលោកគង់ វិសាល ដែលគេធ្លាប់ឃើញតាមរយៈសារព័ត៌មានកន្លងមកគឺក្នុងលក្ខណៈស្និទ្ធស្នាលជាគូស្នេហា មិនមែនមិត្តភាពឡើយ ។
ចំពោះការទៅសម្តែងនៅសហរដ្ឋអាមេរិក ពេជ្រ សេរីរ័ត្ន បានចុះកិច្ចសន្យាជាមួយសមាគមខ្មែរមួយនៅទីនោះ ដើម្បីចេញទៅសម្តែងរយៈពេល៣ខែរួមជាមួយសិល្បករ-សិល្បការិនីចំនួន៥រូបទៀត ហើយនោះជាការចេញទៅសម្តែងជាលើកទី១ សម្រាប់រូបនាង ។ ពេជ្រ សេរីរ័ត្ន បាននិយាយថា វាគឺជាឱកាសដែលរូបនាងបានទៅស្គាល់ពិភពលោកខាងក្រៅ និងស្វែងយល់អំពីវប្បធម៌ អរិយធម៌ ព្រមទាំងដកស្រង់បទពិសោធន៍សម្រាប់អាជីពផងដែរ ។
ពេជ្រ សេរីរ័ត្ន បានបង្ហាញនូវទឹកចិត្តសប្បាយរីករាយពេលដែលមានឱកាសចេញទៅសម្តែងនៅសហរដ្ឋអាមេរិកជាលើកដំបូងនេះ ។ កញ្ញាពេជ្រ សេរីរ័ត្ន បានចូលប្រឡូកក្នុងវិស័យសិល្បៈអំឡុងឆ្នាំ២០០៧ ហើយទទួលបានប្រជាប្រិយភាពខ្លាំងនៅស្ថានីយទូរទស្សន៍បាយ័នតាមរយៈកម្មវិធីរាត្រីពណ៌ស្វាយ និងតន្ត្រីយុវវ័យ រួមទាំងកម្មវិធីមួយចំនួនទៀត ។ ក្រៅពីទទួលបានប្រជាប្រិយភាពលើវិស័យសិល្បៈនោះពេជ្រ សេរីរ័ត្ន គឺជាពិធីការិនីដែលមានរូបសម្រស់គួរឱ្យចាប់អារម្មណ៍ ហើយព្រោះតែបែបនេះហើយទើបកន្លង់ជាច្រើនតែងតែឆ្វែលចុះឆ្វែលឡើងក្រឡឹងបុប្ផាមួយទងនេះផ្សងសំណាងតាមភ្ជាប់និស្ស័យជាមួយនាង ៕
ចែករំលែកព័តមាននេះ