ទឹកចិត្ត អុិន លក្ខិណា ចំពោះជនភៀសសឹកនៅភូមិរង់ចាំ
- ភ្នំពេញ
រាជធានីភ្នំពេញ៖ កញ្ញាអ៊ិន លក្ខិណា បានសម្តែងក្តីរំភើបរីករាយ បន្ទាប់ពីនាង និងក្រុមការងារបានទទួលការលើកសរសើរ និងគាំទ្រពីសម្តេចតេជោ ហ៊ុន សែន ចំពោះសកម្មភាពរបស់នាងទៅសួរសុខទុក្ខ និងចែកអំណោយដល់ប្រជាពលរដ្ឋភៀសសឹកនៅភូមិរង់ចាំ កាលពីពេល ថ្មីៗកន្លងមក ។
បន្ទាប់ពីទទួលបានការលើកទឹកចិត្តបែបនោះមក អ៊ិន លក្ខិណា បញ្ជាក់ថា រូបនាង និងក្រុមការងារ រួមជាមួយសប្បុរសជន នឹងខិតខំប្រឹងប្រែងដើម្បីចូលរួមអភិវឌ្ឍន៍ភូមិរស់នៅរបស់ជនភៀសសឹក និងផ្សព្វផ្សាយវប្បធម៌ ទេសចរណ៍ទៅកាន់ពិភពលោកបន្ថែមទៀត ។
ជាមួយនឹងសារសំឡេងរបស់សម្តេចតេជោហ៊ុន សែន បង្ហោះលើបណ្តាញសង្គម អ៊ិន លក្ខិណា នៅថ្ងៃទី២៨ កញ្ញា ២០២៦ បានភ្ជាប់ជាមួយនឹងសំណេរថា «សម្តេចតាប្រមុខរដ្ឋស្តីទី ជាទីគោរព និងដឹងគុណដ៏ខ្ពង់ខ្ពស់បំផុត ! ចៅ លោកឧកញ៉ាចិន សំណាង និងក្រុមការងារ មានសេចក្តីរំភើបឥតឧបមា ដែលបានស្តាប់ប្រសាសន៍ដ៏មានអត្ថន័យរបស់សម្តេចតាប្រមុខរដ្ឋស្តីទី ភូមិរង់ចាំជាបេសកកម្មទី២ បន្ទាប់ពីតំបន់ទេសចរណ៍កំពុងភ្លុក ក្រោយថ្ងៃដែលចៅបានត្រឡប់មកពីប្រកួតបវរកញ្ញាពិភពលោក ។
ចៅ និងក្រុមការងារ រួមជាមួយសប្បុរសជន នឹងខិតខំប្រឹងប្រែងដើម្បីចូលរួមអភិវឌ្ឍន៍ភូមិរស់នៅរបស់ជនភៀសសឹក និងផ្សព្វផ្សាយវប្បធម៌ ទេសចរណ៍ទៅកាន់ពិភពលោក ក្រោមការដឹកនាំដ៏ខ្ពង់ខ្ពស់ប្រកបដោយភាពឈ្លាសវៃ និងគតិបណ្ឌិតរបស់សម្តេចតាប្រមុខរដ្ឋស្តីទី សម្តេចធិបតីនាយករដ្ឋមន្ត្រី និងសម្តេចយាយកិត្តិបណ្ឌិត ប៊ុន រ៉ានី ហ៊ុន សែន និងលោកជំទាវបណ្ឌិត ជាទីគោរពដ៏ខ្ពង់ខ្ពស់បំផុត» ។
ទន្ទឹមនេះ អ៊ិន លក្ខិណា ថ្លែងអំណរគុណ លោកជំទាវញ៉ែម មរកត រដ្ឋលេខាធិការក្រសួងកិច្ចការនារី ដែលបានដឹកនាំក្រុមការងាររបស់នាងទៅចូលរួមធ្វើកិច្ចការងារសង្គមនោះ ។
ពេលទៅដល់ភូមិរង់ចាំកញ្ញាអ៊ិន លក្ខិណា លើកឡើងថា «ជាភូមិមួយដែលមិនមែនរង់ចាំតែជំនួយទេ ប៉ុន្តែកំពុងតែរង់ចាំដោយក្តីសង្ឃឹម មិនថា តែអាហារ ទឹកស្អាត របស់ប្រើប្រាស់ សម្ភារៈសិក្សា ពីជំនួយដ៏តិចរតួចរបស់ពួកយើង ប៉ុន្តែវាមិនតិចតួចសម្រាប់ពួកគាត់ឡើយ សម្រាប់គ្រួសារដែលកំពុងរង់ចាំ គឺពិតជាមានអត្ថន័យខ្លាំងណាស់សម្រាប់ពួកគាត់ដែលរស់នៅទីនោះផ្ទាល់ ។
នាងខ្ញុំពិតជារំភើបពេលបានជួបដោយផ្ទាល់ជាមួយប្រជាពលរដ្ឋដែលកំពុងរស់នៅភូមិរង់ចាំ ហើយនាងខ្ញុំសង្ឃឹមថា ពួកគាត់នឹងរស់នៅទីនេះដោយមានសុខសុវត្ថិភាព មានសុខភាពល្អ ហើយអាចឆ្លងកាត់ក្តីលំបាកមួយនេះ ដោយក្តីសង្ឃឹមផងដែរ» ។
អ៊ិន លក្ខិណា បានអំពាវនាវដល់សប្បុរសជននានាឱ្យជួយផ្តល់ជាសម្ភារៈសិក្សាដល់សិស្សរស់នៅទីនោះ ដោយនាងថា«ការសិក្សាគឺជារឿងសំខាន់យ៉ាងខ្លាំងព្រោះការសិក្សានឹងធ្វើឲ្យ ប្អូនៗជំនាន់ក្រោយអាចធ្វើអ្វីដែល ល្អៗបានច្រើន» ៕
ចែករំលែកព័តមាននេះ