ល្អហួស ព្រមអភ័យទោ.សដល់ស្ត្រីចិនដែលច្រាននាងទាំងកំពុងគ្រងឈុតអប្សរា
- ភ្នំពេញ
រាជធានីភ្នំពេញ ៖ មហាជនបានសម្តែងការភ្ញាក់ផ្អើល បន្ទាប់ពីតារាសម្តែង ជូរី ល្អហួស បានប្រកាសនៅលើបណ្តាញសង្គមថា នាងត្រូវបានស្ត្រីជាជនជាតិមួយរូបបានធ្វើការច្រានរូបនាងមួយទំហឹងនៅទីសាធារណះ ទាំងដែលនាងកំពុងគ្រងឈុតអប្សរា ។
ទោះបីជាយ៉ាងណា ល្អ ហួស មិនបានបញ្ចេញរូបភាព និងបញ្ជាក់ពីមូលហេតុដែលនាំអោយមានហេតុការណ៍ខាងលើនេះកើតឡើងឡើយ ដោយនៅក្នុងនោះនាងគ្រាន់តែបញ្ជាក់ថា សកម្មភាពខាងលើនេះបានកើតឡើងនៅកោះពេជ្រ ខណៈពេលនាងចូលរួមកម្មវិធីសែនព្រះខែ ។
តាមរយៈសំណេរបង្ហោះលើបណ្តាញសង្គម ល្អ ហួស បានលើកឡើងថា នាងខ្ញុំត្រូវនារីជនជាតិចិន រុញច្រាននាងខ្ញុំមួយទំហឹង នៅមុខមនុស្សគ្រប់គ្នា នៅក្នុងកម្មវិធីសែនព្រះខែ ទាំងដែលនាងខ្ញុំកំពុងតែគ្រោងឈុតអប្សរា នៅកោះពេជ្រ អគារD ។
ក្រោយឃើញការបង្ហោះសំណេរខាងលើពី ល្អ ហួស គេបានឃើញអ្នកគាំទ្ររូបនាងជាច្រើនបានចូលទៅខំមិន សួរនាំពីដើមហេតុ ខណៈអ្នកខ្លះបានសម្តែងការខឹងសម្បារ និងមិនពេញចិត្តចំពោះសកម្មភាពនេះឡើយ ចំណែកអ្នកខ្លះក៏បានជម្រុញ អោយនាងដាក់ពាក្យប្តឹងស្ត្រីជនជាតិចិននោះផងដែរ ។
ទោះជាយ៉ាងក៏ដោយ ក្រោយការបង្ហោះសំណេរខាងលើនេះ មិនបានប៉ុន្មានផងនោះ ល្អ ហួស ក៏បានបង្ហោះវីដេអូ បង្ហាញពីសកម្មភាពស្ត្រីជនជាតិចិនដែលបានច្រាននាង បានមកសុំទោសចំពោះមុខនាងដោយផ្ទាល់ ។
តាមរយះវីដេអូខាងលើ ស្ត្រីជនជាតិចិនបានសម្តែងការសុំទោសចំពោះសកម្មភាពមិនល្អរបស់ខ្លួនដែលធ្វើដាក់ ល្អ ហួស ហើយក៏សម្តែងការសោកស្តាយផងដែរ ។
ស្ត្រីជនជាតិចិនរូបនេះបានបញ្ជាក់ថា គាត់មិនមានចេតនាធ្វើដាក់ ល្អ ហួស បែបនេះឡើយ ដោយអ្វីៗកើតឡើងដោយសារការឆេវឆាវមួយភ្លេតចេញពីរូបគាត់ប៉ុណ្ណោះ ។
ស្ត្រីជនជាតិចិនរូបនេះក៏បានសន្យាថា ប្រសិនបើ ល្អ ហួស មានឱកាសចេញទៅសម្តែងសិល្បៈវប្បធម៌នៅប្រទេសចិននោះ គាត់និងគ្រួសារនឹងរង់ចាំទទួលស្វាគមន៍ ល្អ ហួស អោយបានកក់ក្តៅបំផុត ។
ជាការកត់សម្គាល់ បន្ទាប់ពីទទួលបានការសុំទោសដោយផ្ទាល់ពីស្ត្រីជនជាតិចិនខាងលើរួចមក ពេលនេះ ល្អ ហួស ក៏បានបង្ហោះសំណេរតាមបណ្តាញសង្គមថា សូមអរគុណដល់អ្នករៀបចំកម្មវិធីដែលបានជួយសម្រួល និងបកស្រាយហេតុផល ឥឡូវនេះ ល្អហួស បានទទួលការសុំទោសពីខាងបងស្រី (ស្ត្រីជនជាតិចិន) ហើយគាត់ទទួលកំហុសគ្របបែបយ៉ាង ដែលគាត់បានច្រាន ល្អហួស ក្នុងកម្មវិធីបុណ្យសែនព្រះខែកាលពីល្ងាចមិញនេះ ហើយនាងខ្ញុំក៏បានស្ដាប់ហេតុផលដែលគាត់បានធ្វើកំហុសនេះដែរ គាត់ក៏បានដឹងកំហុសរបស់គាត់ដែលបានធ្វើឡើងដោយអចេតនា ។
ល្អហួស បានបញ្ជាក់ថា បេះដូងខ្មែរតែងតែមានមនោសញ្ចេតនា និងភាពស្មោះត្រង់ និងការលើកលែងទោសកំហុស និងផ្ដល់ឱកាសឲ្យអ្នកដែលធ្វើខុសបានកែប្រែ ៕
ចែករំលែកព័តមាននេះ