វត្ថុបុរាណប្រាសាទចិន ត្រូវជនទុច្ចរិតលួ.ចទៅលក់ពាសពេញពិភពលោក
- ព្រះវិហារ
ខេត្តព្រះវិហារ ៖ ប្រាសាទចិន ស្ថិតនៅក្នុងរមណីយដ្ឋានប្រាសាទកោះកេរ កសាងនៅឆ្នាំ៩២៨ នៃគ្រឹស្តសករាជ ក្នុងរាជ្យព្រះបាទជ័យវរ្ម័នទី៤ ។ តាមរយៈសិលាចារឹក K.១៨២ ប្រាសាទចិនសាងដើម្បីឧទ្ទិសដល់ទេពឈ្មោះស្រី បតី ដែលជាឈ្មោះមួយរបស់ព្រះនារាយណ៍ ។
បើតាមនាយកដ្ឋានបុរាណវត្ថុ ប្រាសាទចិនមានតួប៉មបី សង់ពីថ្មបាយក្រៀមនៅលើខឿន តែមួយ បែរមុខទៅទិសខាងកើត និងមានបណ្ណាល័យពីរសង់ពីឥដ្ឋបែរមុខទៅទិសខាងលិចព័ទ្ធជុំវិញដោយ កំពែងថ្មបាយក្រៀមពីរជាន់មានខ្លោងទ្វារចូលពីខាងកើត និងខាងលិច ។
នៅក្នុងតួប៉មកណ្តាល មានតម្កល់បដិមាព្រះនារាយណ៍«ស្រីបតី» ដែលសព្វថ្ងៃឃើញមាននៅសល់បំណែកដងខ្លួន ។ ចំណែកនៅខ្លោងទ្វារខាងកើតមានតម្កល់បដិមាព្រះរាម ព្រះលក្សណ៍ ហនុមាន ពាលី ប្រយុទ្ធជាមួយសុគ្រីពក្នុងរឿងរាមកេរ្តិ៍ និងនរសិង្ហសម្លាប់ហិរណ្យកសីពុ ។
នៅខ្លោងទ្វារខាងលិចមានតម្កល់ បដិមាបង្ហាញពីការប្រយុទ្ធគ្នារវាងបងប្អូនជីដូនមួយនៃវង្សក្សត្របាណ្ឌព និងវង្សកៅរពនៃរឿងមហាភារត ដោយមានតួអង្គ ទុយោធន៍ ភីម យុធិស្ឋិរ អជ៌ុនកុល សហទេព ស្ធទ្យុម័ន ពលរាម និងក្រឹស្ណៈ ។
អំឡុងទសវត្សរ៍ឆ្នាំ១៩៧០មានសកម្មភាពលួចបដិមាដែលតម្កល់នៅក្នុងប្រាសាទចិន ហើយបានលក់ ចែកចាយទៅពាសពេញពិភពលោក ។ ដោយមានការប្រឹងប្រែងរបស់រាជរដ្ឋាភិបាលបដិមាមួយចំនួនដែលបានលួចពីប្រាសាទនេះត្រូវបានទាមទារត្រឡប់មកវិញជាបន្តបន្ទាប់ មានដូចជាបដិមាដែលតម្កល់នៅក្នុងខ្លោងទ្វារ ខាងកើត និងខាងលិច ៕
ចែករំលែកព័តមាននេះ