ស្ត្រីទើបឆ្លងទន្លេ មានជីវភាពទីទាល់ក្រ ជួបទុ.ក្ខប្តីឆ.ក់ត្រី ជួបគ្រោះអកុស.ល ទទួលបានការឧបត្ថម្ភពីព្រះសង្ឃ សប្បុរសជន និងអាជ្ញាធរឃុំគគីរធំ
- កណ្តាល
ខេត្តកណ្តាល ៖ ដោយមើលឃើញនូវទុក្ខលំបាករបស់បងប្អូនប្រជាពលរដ្ឋ និងតាមរយៈភ្នាក់ងារសារព៌តមានកោះសន្តិភាព បានចុះផ្សាយអំពីគ្រួសារមួយមានជីវភាពខ្វះខាត បុរសជាប្តីបានបង្ខំចិត្តទៅឆក់ត្រីទាំងដែលខ្លួនមិនដែលចេះឆក់ត្រី បណ្តាលអោយភ្លាត់ស្នៀតឆក់ខ្លួនឯងស្លាប់ចោលប្រពន្ធទើបឆ្លងទន្លេ និងកូនតូចៗ៣នាក់ទៀត នាល្ងាចថ្ងៃទី៦ ខែកញ្ញា ឆ្នាំ២០២៦ ព្រះសង្ឃ និងក្រុមការងារសប្បុរសធ៌ម ឃុំគគីរធំ រួមសហការជាមួយអាជ្ញាធរឃុំ បាននាំយកអំណោយទេយ្យទាន ជាគ្រឿងឧបភោគ បរិភោគទៅចូលរួមរំលែកទុក្ខលំបាកជាមួយប្រជាពលរដ្ឋចំនួន២គ្រួសារ នៅក្នុងឃុំគគីរធំ ស្រុកកៀនស្វាយ ខេត្តកណ្តាល។ គួររំលឹកឡើងវិញថា អាសូរណាស់! មិនចេះឆ.ក់ត្រី តែជីវភាពខ្វះខាតពេក ក៏ទៅឆ.ក់ ស្រាប់តែជួបគ្រោះអកុស.ល ចោលប្រពន្ធទើបឆ្លងទន្លេ និងកូនតូចៗ ៣នាក់
លោក ហួត សុផេងប្រធានក្រុមការងារសប្បុរសធ៌ម បានលើកឡើងថា អំណោយដែលយកមកចូលរួមរំលែកទុក្ខលំបាករបស់បងប្អូនប្រជាចំនួន២គ្រួសារនាពេលនេះ រួមមាន ៖ ទី១-គ្រួសារស្ត្រីទើបឆ្លងទន្លបានជាង៤ខែ ឈ្មោះ សុខ សុប៊ុន អាយុ២៩ឆ្នាំ ជួបទុក្ខ ដោយបុរសជាប្តីទៅឆក់ត្រី ភ្លាត់ស្នៀតឆក់ខ្លួនឯងស្លាប់ បង្កការភ្ញាក់ផ្អើលកើតឡើង កាលពីវេលាម៉ោងប្រហែល៩យប់ថ្ងៃទី៥ ខែកញ្ញា ឆ្នាំ២០២៦ នៅត្រង់ចំណុចវាលខាងលិចផ្លូវជាតិលេខ១ ចម្ងាយពីផ្ទះជនរងគ្រោះប្រហែលជាង១គីឡូដី ស្ថិតក្នុងភូមិពោធិ៍មៀវ ឃុំគគីរធំ ស្រុកកៀនស្វាយ ខេត្តកណ្តាល ទទួលបានអំណោយរួមមាន អង្ក១បេ ស្មើនឹងទម្ងន់៥០គីឡូក្រាម ទឹកសុទ្ធ៥០យួរ គ្រឿងឧបភោគ បរិភោគ សម្ភារ:ប្រើប្រាស់ និងថវិកាចំនួន៤៥ម៉ឺនរៀល។
ទី២-គ្រួសារស្ត្រីម្នាក់មានសត្តិមិនល្អ មានជីវភាពខ្វះខាតខ្លាំង រស់នៅភូមិគគីរធំ២ ឃុំគគីរធំ ស្រុកកៀនស្វាយ ខេត្តកណ្តាល ទទួលអង្ក១បេ ស្មើទម្ងន់៥០គីឡូក្រាម ទឹកសុទ្ធ គ្រឿងឧបភោគបរិភោគ សម្ភារ:ប្រើប្រាស់ និងថវិកាចំនួន២០ម៉ឺនរៀលផងដែរ ។
លោក ហួត សុផេង ប្រធានក្រុមការងារសប្បុរសធ៌ម ឃុំគគីរធំ បានលើកឡើងបន្តថា អង្ករ គ្រឿងឧបភោគបរិភោគ សម្ភារ:ប្រើប្រាស់ និងថវិកាដែលបានយកមកចូលរួមរំលែកទុក្ខជាមួយគ្រួសារបងប្អូនមានជីវភាពខ្វះខាតជួបការលំបាកនិងមានទុក្ខជាតម្ងន់នៅពេលនេះ គឺមានការជួយជ្រោមជ្រែងចូលរួមពីព្រះគ្រូចៅអធិការវត្តគគីរធំ ហៅវត្តចាស់ ព្រះនាម ញឹម វណ្ណអូន និងព្រះគុណម្ចាស់ វ៉ែន ណុល ព្រះគ្រូសូត្រស្តាំ ព្រមទាំងលោកស្រី ហួត សុផល និងក្រុមគ្រួសារ និងការរៃអង្គាសគ្នាពីបងប្អូនក្រុមការងារសមាជិកសប្បុរសធ៌ម ឃុំគគីរធំទាំងអស់គ្នាទៅតាមលទ្ធភាពប្រកបដោយទឹកចិត្តសន្ធាជ្រះថ្លា ក្នុងនោះដែរ ថវិកាផ្ទាល់ខ្លួនរបស់លោក ផន ណារ័ត្ន មេឃុំគគីរធំចូលរួមចំនួន ១០ ម៉ឺនរៀលផងដែរ។
ស្ត្រីឈ្មោះ សុខ សុប៊ុន ទើបឆ្លងទន្លេកូនទី៣ បានជាង៤ខែ ដែលត្រូវជាប្រពន្ធបុរសទៅឆក់ត្រីភ្លាត់ស្នៀតឆក់ខ្លួនឯងស្លាប់នាពេលថ្មីៗនេះ ដែលមានជីវភាពទីទាល់ក្រខ្វះខាតខ្លាំង នៅពេលទទួលបានអំណោយខាងលើរួចមក គាត់សម្តែងក្តីរំភើបឥតឧបមារហូតអួរដើមក ហូរទឹកភ្នែករលីងរលោង និយាយមិនចង់ចេញ នៅពេលឃើញព្រះសង្ឃ ក្រុមការងារសប្បុរសធ៌ម និងអាជ្ញាធរឃុំយកថវិកានឹងសម្ភារ:ប្រើប្រាស់ គ្រឿងឧបភោគបរិភោគ មកចូលរួមរំលែកទុក្ខលំបាកដល់គ្រួសារគាត់ កំពុងមានទុក្ខលំបាកនេះ។
ស្ត្រីឈ្មោះសុខ សុប៊ុន បានបន្តថា គ្រួសារគាត់មានជីវភាពទីទាល់ក្រខ្វះខាតខ្លាំងណាស់ រាល់ថ្ងៃរស់ពឹងលើប្តីដើរស៊ីឈ្នួលអោយគេរកប្រាក់ចំណូលយកមកផ្គត់ផ្គង់រ៉ាប់រងជីវភាពគ្រួសារប្រចាំថ្ងៃ ។ ឥឡូវប្តីរបស់គាត់បានស្លាប់បាត់ទៅហើយ តើអោយគាត់នឹងកូនតូចៗរំពឹងអ្វីទៀត បើគ្រួសារគាត់ទីទាល់ក្រ សូម្បីតែដីក៍សុំគេធ្វើរោងប្រក់ដែកស័ង្កសី បាំងតង់ម្ខាងដាក់១គ្រែស្នាក់នៅបណ្តោះអាសន្នដែរ ជាពិសេសនោះ សូម្បីតែលុយជួលមេរុបូជាជូនដំណើរសពប្តីជាលើកចុងក្រោយ ក៍គាត់គ្មានលទ្ធភាពដែរ ។ ហេតុដូចនេះហើយទើបបងប្អូនប្រជាពលរដ្ឋ និងចាស់ៗក្នុងភូមិ រៀបចំដើមចេកបូជាសពប្តីគាត់។
ឆ្លៀតក្នុងឱកាសនោះដែរ លោកផន ណារ័ត្ន មេឃុំគគីរធំ ទើបឡើងកាន់តំណែងថ្មី ក៍បានណែនាំអោយស្ត្រីឈ្មោះ សុខ សុប៊ុន ក្រោយពីរៀបចំពិធីបុណ្យសពប្តីរួចរាល់ សូមអញ្ជើញទៅសាលាឃុំ ដើម្បីធ្វើបណ្ណ័ក្រីក្រ ដោយសារកាលពីមុននៅមេឃុំចាស់ គ្រួសារគាត់ធ្លាប់មានប័ណ្ណហ្នឹងដែរ តែផុតកំណត់ហើយ ។ ឥឡូវក្រោមការគិតគូរយកចិត្តទុកដាក់ដល់ប្រជាពលរដ្ឋ មេឃុំឡើងកាន់តំណែងថ្មី បានណែនាំអោយគាត់ទៅសាលាឃុំ ដើម្បីបន្តធ្វើប័ណ្ណក្រីក្រឡើងវិញ។
បន្ទាប់ពីប្រុគល់អំណោយរួច ព្រះគ្រូសូត្រស្តាំ វ៉ែន ណុល តំណាងអោយលោគ្រូ ចៅអធិការវត្ត ញឹម វណ្ណអូន និងលោកមេឃ ព្រមទាំងលោក ហួត សុផេង ប្រធានក្រុមការងារសប្បុរសធម៌ ឃុំគគីរធំ ក៍បាននិយាយលើកទឹកចិត្ត និងពន្យល់ណែនាំដល់ស្ត្រីជាប្រពន្ធ កុំអោយគិតច្រើនពេក កាត់ចិត្តទៅ ធ្វើម្តេចនិស្ស័យជួបគ្នាជាប្តីប្រពន្ធបានត្រឹមហ្នឹង មានរូបមានទុក្ខ អ្នកស្លាប់គាត់ទៅផុតហើយ នៅឡើយអ្នកនៅរស់ កុំគិតច្រើនពេក សរសៃខ្ចីទើបឆ្លងទន្លេរួច ប្រយ័ត្នទាស់ ត្រូវខិតខំថែរក្សាសុខភាព និងមើលថែកូនតូចៗទាំង៣នាក់អោយបានល្អ៕
ចែករំលែកព័តមាននេះ