សម្រស់ទឹកធ្លាក់«តាំងយូរ»ឋានសួគ៌លាក់ខ្លួនលើខ្នងភ្នំត្បែង
- ព្រះវិហារ
ខេត្តព្រះវិហារ ៖ សម្រាប់ប្រិយមិត្តដែលនិយមការធ្វើដំណើរផ្សងព្រេង និងស្រឡាញ់ធម្មជាតិពិតៗ រមណីយដ្ឋានទឹកធ្លាក់ធម្មជាតិ«តាំងយូរ»ដែលលាក់ខ្លួនយ៉ាងអាថ៌កំបាំងនៅលើខ្នងភ្នំត្បែងមានជ័យ គឺជាគោលដៅទេសចរណ៍ដ៏គួរឱ្យទាក់ទាញបំផុតមួយ ក្នុងទឹកដីខេត្តព្រះវិហារ ។ ដើម្បីទៅដល់ឋានសួគ៌ដ៏ត្រជាក់ល្ហឹមមួយនេះ អ្នកទេសចរត្រូវឆ្លងកាត់ ដោយការដើរឡើងតាមកាំជណ្ដើររាប់រយកាំ ។
ទោះបីជាត្រូវចំណាយកម្លាំង និងហត់បន្តិចមែន ប៉ុន្តែភាពនឿយហត់ទាំងឡាយនឹងត្រូវរលាយបាត់ទៅវិញភ្លាមៗ ជំនួសមកវិញនូវភាពស្រស់ស្រាយ តាមរយៈម្លប់ព្រៃឈើបៃតងខ្ចី ។ ការធ្វើដំណើរស្ថិតក្រោមការគ្របដណ្តប់នៃដើមឈើធំៗ ផ្តល់ភាពត្រជាក់ត្រជុំពេញមួយផ្លូវជាមួយការដកដង្ហើមវែងៗ ស្រូបយកខ្យល់អាកាសធម្មជាតិ ដែលជួយលាងជម្រះភាពតានតឹងពីការងារ។
ក្រៅពីសម្រស់ធម្មជាតិពណ៌បៃតង សំឡេងបក្សាបក្សីយំឆ្លងឆ្លើយ និងសំឡេងស្លឹកឈើបក់រវិចៗ ជួយកំដអាទិករពេញមួយផ្លូវដើរ ។ សម្រាប់អ្នកដែលបានធ្វើដំណើរដ៏ស្វិតស្វាញមួយនេះ បានក្លាយជាបទពិសោធន៍ដ៏រីករាយ និងមិនអាចបំភ្លេចបាន មុនពេលយើងបានទៅដល់ និងប៉ះផ្ទាល់ជាមួយទឹកធ្លាក់ដ៏ត្រជាក់ល្ហឹមលាក់ខ្លួនលើកំពូលភ្នំ។
បច្ចុប្បន្ន រមណីយដ្ឋានទឹកធ្លាក់«តាំងយូរ»កំពុងតែទាក់ទាញចិត្តភ្ញៀវទេសចរជាតិ និងអន្តរជាតិជាច្រើន ដែលប្រាថ្នាចង់ជួបបទពិសោធន៍ថ្មី ជិតដិតនឹងធម្មជាតិ និងការបោះជំរុំ។ ប្រសិនបើអ្នកមានគម្រោងមកកម្សាន្តនៅខេត្តព្រះវិហារ កុំភ្លេចបន្ថែម«ទឹកធ្លាក់តាំងយូរ» ទៅក្នុងបញ្ជីធ្វើដំណើររបស់អ្នក ៕
ចែករំលែកព័តមាននេះ