ខេត្តបាត់ដំបង ៖ តាមរយៈសកម្មភាពដ៏វិសេសវិសាល អ្នកឧកញ៉ាអគ្គមហាឧបាសិការធម្មបណ្ឌិត ញ៉ឹក ប៊ុនថា ស្ថាបនិកមជ្ឈមណ្ឌលវប្បធម៌ ព្រះពុទ្ធសាសនាកម្ពុជា (ម.វ.ព.ក) បាននាំយកអំណោយ…
ខេត្តបាត់ដំបង ៖ តាមរយៈសកម្មភាពដ៏វិសេសវិសាល អ្នកឧកញ៉ាអគ្គមហាឧបាសិការធម្មបណ្ឌិត ញ៉ឹក ប៊ុនថា ស្ថាបនិកមជ្ឈមណ្ឌលវប្បធម៌ ព្រះពុទ្ធសាសនាកម្ពុជា (ម.វ.ព.ក) បាននាំយកអំណោយ ជូនដល់វីរកងទ័ពនៃកងពលលេខ ៥៣ យោធភូមិភាគទី ៥ នៅភ្នំសំពៅ ក្នុងស្រុកបាណន់ ខេត្តបាត់ដំបង កាលពីថ្ងៃទី ១២ ខែមករា ឆ្នាំ ២០២៦ មកនេះ ។
ទន្ទឹមនឹងនេះ អ្នកឧកញ៉ាអគ្គ ញ៉ឹក ប៊ុនថា បានមានប្រសាសន៍ថា ៖ «តំណាងឱ្យប្រជាជនពុទ្ធបរិស័ទទាំងអស់ បាននាំយកថវិកា និងសម្ភារនានា នៃមជ្ឈមណ្ឌលជូនវីរកងទ័ព ។ ប្រជាជនបានដឹងយ៉ាងច្បាស់ថា វីរកងទ័ពតែងតែពលី និងលំបាកជានិច្ច ដើម្បីការពារបូរណភាពទឹកដីកម្ពុជា ។ ជីវិតខ្ញុំក្តី ប្រជាជនកម្ពុជាក្តីសុទ្ធតែពឹងលើយោធាយើងនៅសមរភូមិមុខដែលលះបង់ជីវិត នេះគឺជាគុណដ៏វិសេសវិសាល ដែលមិនអាចកាត់ថ្លៃបាន» ។
ជាមួយគ្នានេះផងដែរ លោក វរសេនីយត្រី ប៉ែន សុឃឿន ជាតំណាងដ៏ខ្ពង់ខ្ពស់ ឯកឧត្តម ឧត្តសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ ៥៣ បានថ្លែងអរគុណយ៉ាងជ្រាលជ្រៅ ចំពោះអ្នកឧកញ៉ាអគ្គ និងពុទ្ធបរិស័ទ ព្រមទាំងសប្បុរសជនទាំងអស់ ដែលបានចូលរួមផ្តល់ថវិកាក៏ដូចជាសម្ភារនានា សម្រាប់កងទ័ពយើង ។ តាមរយៈអំណោយទាំងនេះ យើងខ្ញុំនឹងបញ្ចូនទៅខាងកងទ័ពឱ្យបានលឿនបំផុតតាមតម្រូវការចាំបាច់សម្រាប់កងទ័ពយើង ។
លោក យឿន ចាន់សុធារិទ្ធ អភិបាលរងនៃគណៈអភិបាលស្រុកបាណន់ បានឱ្យដឹងថា ៖ «ក្នុងនាមរដ្ឋបាលស្រុក ក្រុមប្រឹក្សាស្រុក និងខ្លួនខ្ញុំផ្ទាល់ សូមគោរពថ្លែងអំណរគុណ ចំពោះអ្នកឧកញ៉ាអគ្គ ញឹក ប៊ុនថា ដែលបានប្រគល់អំណោយពីមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដល់វីរកងទ័ព នៃកងពលលេខ ៥៣ យោធភូមិភាគទី ៥ នៅវត្តភ្នំសំពៅ ដែលមានដូចជា ៖ ថវិកា (៣លានរៀល), ម៉ាស់ការពារផ្សែងពុល (12កេះ ៦០០ម៉ាស់), បាយកំប៉ុងសាច់ជ្រូកផាត់ ៦០០កំប៉ុង, នំស្រូវសាឡី ៥កេះ, នំព្រិល ៥កេះ, ក្រមា ៣០០ ទឹកសុទ្ធ ៣០០កេះ ត្រីងៀត ១០០គីឡូ មី ៣កេះ និងខ្ទឹម ៣បាវ» ។
បន្ថែមពីនេះ លោក យឿន ចាន់សុធារិទ្ធ បានរាយការណ៍អំពីស្ថានភាពទូទៅក្នុងកំឡុងសង្គ្រាមឈ្លានពាន ២១ថ្ងៃក្នុងមូលដ្ឋានស្រុក សម្រាប់ប្រជាពលរដ្ឋភៀសសឹក មុនពេលបទឈប់បាញ់ថ្ងៃទី ២៧ ខែធ្នូ ឆ្នាំ ២០២៥ មានចំនួន ៥៤២គ្រួសារ មនុស្សរាយ ១,៨៥៨ អង្គ/នាក់ ដែលគង់នៅក្នុងវត្តទ្រុងមាន់ វត្តកំប៉ូវ និងស្នាក់នៅជាមួយបងប្អូនតាមផ្ទះក្នុងមូល ដ្ឋានឃុំទាំង ៨ ផ្សេងទៀត ។
សូមជម្រាបផងដែរថាថ្មីៗនេះ តាមរយៈសកម្មសប្បុរសធម៌ អ្នកឧកញ៉ាអគ្គ ញ៉ឹក ប៊ុនថា បានបរិច្ចាគថវិកាផ្ទាល់ខ្លួន និងការបង្កើតមូលនិធិ ដើម្បីជួយដល់ជនភៀសសឹក និងវីរកងទ័ពជួរមុខ និងបានចុះជួបជនភៀសសឹក និងវីរកងទ័ពជួរមុខដោយផ្ទាល់ នៅតាមបណ្តាមន្ទីរពេទ្យ និងតាមបណ្តាខេត្តមួយចំនួន។ សកម្មភាពសប្បុរសធម៌ទាំងនេះ បានបង្ហាញយ៉ាងច្បាស់ ពីការគិតគូរ និងយកចិត្តទុកដាក់ ក៏ដូចជាការដឹងគុណដល់វីរកងទ័ព សម្រាប់ភាពអង់អាចក្លាហាន និងការលះបង់ ដើម្បីការពារបូរណភាពទឹកដីពីសត្រូវឈ្លានពាន ៕
ចែករំលែកព័តមាននេះ