តារាចម្រៀងលោក ខេម បានចេញមុខស្នើដល់ក្រុមយុវវ័យកម្ពុជាទាំងអស់ អោយរក្សាភាពថ្លៃថ្នូរ និងអត់ធ្មត់ នៅពេលដែលប្រមូលផ្តុំគ្នាទៅលេងកំសាន្តនៅក្នុងបរិវេណប្រាសាទបុរាណដែលកំពុងមានជម្លោះជាមួយប្រទេសជិតខាង ។
ការចេញមុខស្នើសុំពីតារាចម្រៀងរូបនេះបានធ្វើឡើង បន្ទាប់ពីនៅលើបណ្តាញសង្គមមួយរយៈចុងក្រោយនេះ បានបង្ហាញរូបភាពឃ្លីបវីដេអូពីការប្រមូលផ្តុំគ្នារវាងយុវវ័យកម្ពុជា និងយុវវ័យថៃដែលគ្រងជួបមុខគ្នានៅប្រាសាទតាមាន់ធំនាពេលឆាប់ៗខាងមុខ ។
យ៉ាងណា ក្នុងនាមជាតារាចម្រៀងមួយរូបលោកបានចាត់ទុកការប្រមូលផ្តុំរបស់យុវវ័យកម្ពុជាទៅលេងប្រាសាទបុរាណនាពេលនេះ គឺបង្ហាញពីឆន្ទះដ៏ត្រឹមត្រូវ និងការស្រឡាញ់ការពារសម្បត្តិវប្បធម៌របស់ជាតិ ប៉ុន្តែក៏ត្រូវប្រកាន់ភាពថ្លៃថ្នូរ អត់ធ្មត់ ដើម្បីបញ្ជាក់ថា យើងជាម្ចាស់ទឹកដីដ៏ពិតប្រាកដ ។
តាមរយៈសំណេរដែលបង្ហោះលើបណ្តាញសង្គម តារាចម្រៀង ខេម បានលើកឡើងថា មួយរយៈនេះឃើញបងប្អូនយុវវ័យប្រមូលគ្នាទៅលេងប្រាសាទនិងតំបន់ដែលកំពុងមានជម្លោះ ត្រឹមត្រូវណាស់ដែលយើងមានឆន្ទ:ទៅលេងប្រាសាទ និងបារម្ភស្រលាញ់នូវសម្បត្តិទឹកដីយើង។ ប៉ុន្តែសូមប្អូនៗទៅលេងរក្សានូវសេចក្តីថ្លៃថ្នូរអត់ធ្មត់ បង្ហាញផ្ទះលេខ២ថា យើងជាម្ចាស់ទឹកដី ផ្តល់នូវគំរូល្អ ពីព្រោះយើងដឹងហើយថា ខាងផ្ទះលេខ២គេក៏មានក្រុមក្មេងស្ទាវគេឡើងមកដែរ ហើយខាងផ្ទះលេខ២កំពុងតែចាំមើលពេលមានបញ្ហាណាមួយកើតឡើង ដែលគេអាចចាប់កំហុសយើងបាននោះគេ និងបង្កជាបញ្ហាភ្លាម ។
លោកបញ្ជាក់ថា ក្នុងនាមជាតារាចម្រៀងចេញពីការស្រលាញ់ការគាំទ្ររបស់បងប្អូនសូមដាស់តឿន និងក្រើនរំលឹកបងប្អូនអោយត្រៀមខ្លួនអោយបានល្អនិងជៀសវាងបញ្ហាជន្លោះដោយប្រការណាមួយដោយមិនបានព្រៀងទុក។
លោកបន្តថា ប្រាកដណាស់ខ្មែរតែងប្រកាន់គោលជំហសន្តិភាពជាមួយប្រទេសជាប់ភូមិផងរបងជាមួយជានិច្ច ប៉ុន្តែក៏មិនអនុញ្ញតអោយអ្នកណាមកទន្ទ្រានឈ្លានពានទឹកដីរបស់យើងដែរ ជូនពរបងប្អូនជនរួមជាតិជោគជ័យសំណាងល្អ យើងនឹងឈ្នះក្នុងពេលវេលាដ៏តានតឹងពេលនេះ ខ្មែរស្រលាញ់ខ្មែរ ៕
ចែករំលែកព័តមាននេះ