រាជធានីភ្នំពេញ ៖ អតីតតារាសម្តែងជើងចាស់ អ្នកនាង នារី រ័ត្នគន្ធា បានចាប់ផ្តើមធ្វើជំនួញនៅលើទឹកដីកំណើតជាបណ្តើរៗហើយ បន្ទាប់ពីអ្នកនាងធ្លាប់បានបង្ហាញបំណងនឹងវិលមករស់នៅស្រុកខ្មែរវិញនៅក្នុងអំឡុងពេលណាមួយ ក្រោយចាកចេញទៅរស់នៅសហរដ្ឋអាមេរិកអស់ជាច្រើនឆ្នាំមកនេះ ។…
រាជធានីភ្នំពេញ ៖ អតីតតារាសម្តែងជើងចាស់ អ្នកនាង នារី រ័ត្នគន្ធា បានចាប់ផ្តើមធ្វើជំនួញនៅលើទឹកដីកំណើតជាបណ្តើរៗហើយ បន្ទាប់ពីអ្នកនាងធ្លាប់បានបង្ហាញបំណងនឹងវិលមករស់នៅស្រុកខ្មែរវិញនៅក្នុងអំឡុងពេលណាមួយ ក្រោយចាកចេញទៅរស់នៅសហរដ្ឋអាមេរិកអស់ជាច្រើនឆ្នាំមកនេះ ។
ជំនួញដែលអតីតតារាសម្តែងរូបនេះកំពុងបើកដំណើរការនោះគឺជាប្រភេទរីស៊ត ដែលមានកន្លែងកំសាន្ត និងមានបន្ទប់ស្នាក់នៅតាមបែបបុរាណ ដែលមានទីតាំងក្នុងភូមិតារស់ សង្កាត់ក្របីរៀល ក្រុងសៀមរាប ខេត្តសៀមរាប ។
តារាសម្តែងរួមជំនាន់ និងជាមិត្តភក្តិដ៏ជិតស្និទ្ធិរបស់អ្នកនាង នារី រ័ត្នគន្ធា គឺអ្នកនាង អ៊ឹម សុវណ្ណផល្លា បានអះអាងប្រាប់កោះសន្តិភាពថា ជាជំហានដំបូង ក្នុងផ្ទះសំណាក់របស់អ្នកនាង នារី រ័ត្នគន្ធា គឺបើកកន្លែងស្នាក់នៅជាលក្ខណៈគ្រួសារ ហើយទីកន្លែងនេះ ក៏មានការជួលសម្រាប់ផលិតករនានា ដែលមានគោលបំណងថតជាភាពយន្តបែបបុរាណ ឬក៏ថតស្ពតពាណិជកម្មផ្សេងៗផងដែរ ។
អ្នកនាងបញ្ជាក់ថា បច្ចុប្បន្ន ផ្ទះស្នាក់នៅរបស់អ្នកនាងនារី រ័ត្នគន្ធា ទើបតែបើកដំណើរការបានប្រហែលជា៤ទៅ៥បន្ទប់ប៉ុណ្ណោះ ហើយទៅថ្ងៃអនាគត អ្នកនាងមានគម្រោងបើកជាផ្ទះលំហែតូចៗអាចទៅដល់ជាង១០បន្ទប់ ដោយនៅក្នុងនោះក៏មានការរៀបចំជាសួនច្បារផងដែរ ។
អ្នកនាងបន្ថែមថា មូលហេតុដែលអ្នកនាង នារី រ័ត្នគន្ធា សម្រេចបើករីស៊ត និងកន្លែងស្នាក់នៅតាមបែបបុរាណ គឺដោយសារអ្នកនាងគឺជាអ្នកសិល្បៈម្នាក់ដែលចូលចិត្ត ការអភិរក្សបែបបុរាណ និងការស្រឡាញ់បែបប្រពៃណីខ្មែរ ។
អ្នកនាងក៏បានទិញនូវវត្ថុបុរាណជាច្រើនយកមកស្តុកទុក ក្នុងគោលបំណងរៀបចំជាស្ទីឌីយោ សម្រាប់ជួលឲ្យផលិតករនានាថតភាពយន្តបែបបុរាណ និងមហាជនដែលមានបំណងថតបែបប្រពៃណីបុរាណខ្មែរផងដែរ ។
បើតាមអ្នកនាង អ៊ឹម សុវណ្ណផល្លា សម្រាប់មុខជំនួញមួយនេះ អ្នកនាង នារី រ័ត្នគន្ធា គឺជាអ្នកគ្រប់គ្រងដោយផ្ទាល់ បើទោះបីជាអ្នកនាងរស់នៅក្រៅប្រទេសក៏ដោយ ពោលអ្នកនាងនឹងធ្វើដំណើរចុះឡើង ដោយសារតែអ្នកនាងក៏មានមុខរបរទាំងនៅអាមេរិក និងនៅស្រុកខ្មែរ ។
អ្នកនាងបន្ថែមថា នៅអាមេរិកអ្នកនាង នារី រ័ត្នគន្ធា ក៏មានបើកហាងលក់វត្ថុអនុស្សាវរិយ៍បុរាណ និងសម្លៀកបំពាក់ប្រពៃណីខ្មែរដែរ ហេតុនេះដោយសារចិត្តស្រឡាញ់ និងមិនចោលស្រុកខ្មែរបានទើបនាងសម្រេចមកបើកជំនួញជាផ្ទះសំណាក់បែបបុរាណ និងជារីស៊តនៅលើទឹកដីកំណើតនាពេលនេះ ។
គួរបញ្ជាក់ថា នារី រ័ត្នគន្ធា គឺជាតារាសម្ដែងល្បីឈ្មោះជំនាន់អ្នកនាង អម្ពរ ទេវី និងសុខ ស្រីមុំ ជាដើម នៅមុនពេលអ្នកនាងចេញទៅរស់នៅសហរដ្ឋអាមេរិក ។ អ្នកនាងធ្លាប់បានសាងស្នាដៃក្នុងរឿងជាច្រើនដូចជា «កំលោះឆ្នាំ៩១» «បុប្ផាភ្នំពេញ» និងរឿង«ផ្លូវបែកជាបី»ជាដើម។
អ្នកនាង រ័ត្នគន្ធា បានចាកចេញទៅរស់នៅសហរដ្ឋអាមេរិកតាំងពីឆ្នាំ២០០១ បន្ទាប់ពីបានអាពាហ៍ពិពាហ៍ជាមួយស្វាមី ជាទាហានធ្វើការលើកប៉ាល់ ខណៈពេលអ្នកនាង និងស្វាមីទទួលបានចំណងដៃកូនពីរនាក់ និងកំពុងរស់នៅក្នុងរដ្ឋអាយលែនសហរដ្ឋអាមេរិក ក្នុងពេលលើទឹកដីមហាអំណាចនេះអ្នកនាងក៏មានមុខរបរបើកហាងមួយយីហោ «នារី រ័ត្នគន្ធា New Collection»ដែលមានលក់សំលៀកបំពាក់ខ្មែរ និងវត្ថុបុរាណខ្មែរជាច្រើនមុខផងដែរ ។
កន្លងមក អ្នកនាង នារី រ័ត្នគន្ធា ធ្លាប់បានគូសបញ្ជាក់ថា នៅទីនោះ (អាមេរិក) ឯកាណាស់ ខ្ញុំមិននៅទីនោះរហូតទេ រឿងត្រឡប់មកប្រទេសយើងវិញ គឺដឹងតែមកហើយ គ្រាន់តែមិនដឹងថា អាចមកឆាប់ៗនេះ ឬពេលណា ប៉ុន្តែត្រូវតែមកស្រុកកំណើតវិញឲ្យបាន ៕
ចែករំលែកព័តមាននេះ