លោក LEON PANETTA បានធ្វើសច្ចាប្រណិធានកាលពីថ្ងៃទី១ កក្កដា កន្លងមកនេះ ចូលកាន់តំណែងជារដ្ឋមន្ត្រីការពារប្រទេសអាមេរិកជំនួសលោករ៉ូប៊ែត ហ្គេត។
ក្នុងពិធីមួយដែលរៀបចំធ្វើនៅមន្ទីរប៉ង់តាហ្គោន លោក PANETTA បានសន្យាធ្វើបែបណាឱ្យកងទ័ពអាមេរិកនៅតែរក្សាឧត្តមភាពជាកងទ័ពដែលខ្លាំងជាងគេបំផុតលើពិភពលោកទោះបីជាមានការគាបសង្កត់នានាដើម្បីកាត់បន្ថយថវិការបស់មន្ទីរប៉ង់តាហ្គោនក៏ដោយ។
លោកមានប្រសាសន៍ថា ក្នុងពេលដែលសហរដ្ឋអាមេរិកកំពុងតែប្រឈមមុខនឹងបញ្ហាថវិកាក៏ដោយ ដរាបណាខ្ញុំនៅកាន់តំណែងនេះ នោះកងទ័ពរបស់យើងនឹងមិនចុះខ្សោយដាច់ខាត។ ក្នុងឋានៈជាប្រមុខរបស់មន្ទីរប៉ង់តាហ្គោនខ្ញុំនឹងខិតខំធ្វើឱ្យប្រទេសរបស់យើងបន្តមានកងទ័ពដែលទទួលការហ្វឹកហ្វឺនខ្ពស់ ប្រដាប់ដោយឧបករណ៍ទំនើបៗ និងជាកងទ័ពដែលខ្លាំងជាងគេបំផុតនៃពិភពលោក។
លោក PANETTA ជាអតីតនាយករបស់ CIA ថ្លែងទៀតថា ក្រសួងការពារប្រទេសអាមេរិកនឹងបន្តការខិតខំប្រឹងប្រែងរាំងខ្ទប់ កំទេច ហើយទីបំផុតយកឈ្នះលើអាល់កៃដា។ ស្តីពីអាហ្វហ្គានីស្ថានលោកមានប្រសាសន៍ថា កងទ័ពអាមេរិកនឹងបន្តធ្វើការជាមួយកងកម្លាំងសន្តិសុខអាហ្វហ្គានីស្ថាន និងបណ្តាដៃគូនៃក្រុមចម្រុះលើការផ្ទេរការទទួលខុសត្រូវខាងសន្តិសុខដល់អាហ្វហ្គានីស្ថានចាប់ពីពេលនេះរហូតដល់ឆ្នាំ២០១៤។ ទិសដៅគឺធ្វើយ៉ាងណាកុំឱ្យអាហ្វហ្គានីស្ថានក្លាយជាថ្មីទៅជាជម្រករបស់ពួកភេរវករ ៕
ចែករំលែកព័តមាននេះ