ខេត្តបាត់ដំបង ៖ ផ្ទាំងគំនូរសហសម័យ ឬគំនូរសហវត្សដែលគូរដោយក្រុមសិល្បៈ«ហ្វាពន្លឺសិល្បៈ «ខេត្តបាត់ដំបងបាន និងកំពុងទាក់ទាញចំណាប់អារម្មណ៍យ៉ាងខ្លាំងពីមហាជន បើទោះជាផ្ទាំងគំនូរនេះមើលទៅក្រវេមក្រវ៉ាមដូចកូនក្មេងគូលេងក្ដីតែវាមានបង្កប់នូវ «ខ្លឹមសារ និងអត្ថន័យ» យ៉ាងជ្រាលជ្រៅទៅតាមរូបភាពនីមួយៗ…
ខេត្តបាត់ដំបង ៖ ផ្ទាំងគំនូរសហសម័យ ឬគំនូរសហវត្សដែលគូរដោយក្រុមសិល្បៈ«ហ្វាពន្លឺសិល្បៈ «ខេត្តបាត់ដំបងបាន និងកំពុងទាក់ទាញចំណាប់អារម្មណ៍យ៉ាងខ្លាំងពីមហាជន បើទោះជាផ្ទាំងគំនូរនេះមើលទៅក្រវេមក្រវ៉ាមដូចកូនក្មេងគូលេងក្ដីតែវាមានបង្កប់នូវ «ខ្លឹមសារ និងអត្ថន័យ» យ៉ាងជ្រាលជ្រៅទៅតាមរូបភាពនីមួយៗ ។
គំនូរ «សហសម័យ ឬសហសវត្ស» មិនស្អាត មិនល្អមើល ក្រវេមក្រវ៉ាម មើលមិនយល់ តែផ្ទាំងគំនូរនីមួយៗបានបង្កប់ទៅដោយ«ខ្លឹមសារ និងអត្ថន័យ» យ៉ាងជ្រាលជ្រៅទៅតាមផ្ទាំងគំនូរនីមួយៗដែលបញ្ជាក់ពីការរស់នៅរបស់មនុស្ស សត្វ ធម្មជាតិ ដែលកើតមាននៅក្នុងសង្គម និងនៅលើលោកនេះ ។ នេះបើតាមការពន្យល់របស់ជាងគំនូរសហសម័យ ។ គំនូរ«សហសម័យ» ផ្ទុយពីផ្ទាំងគំនូរធម្មតាដែលវិចិត្រករ បានគូរំលេចនូវពណ៌ចម្រុះបង្ហាញពីសម្រស់ធម្មជាតិ ទេសភាពល្អឥតខ្ចោះដែលជាគោលដៅរបស់វិចិត្រករចង់បង្ហាញពីមនោសញ្ចេតនាដ៏ជ្រាលជ្រៅទៅលើ«ទិដ្ឋភាពដ៏ស្រស់បំព្រង» និង«ទឹកដៃ» មិនធម្មតានៅលើផ្ទាំងគំនូរនីមួយៗ ។
ផ្ទាំងគំនូរ«សហសម័យ ឬសហសវត្ស» ជាច្រើនផ្ទាំង និងមានទម្រង់រូបភាពផ្សេងៗគ្នាដែលគេដឹងថា ជាទឹកដៃរបស់ក្រុមសិល្បៈ«ហ្វាពន្លឺសិល្បៈ» នៅខេត្តបាត់ដំបងត្រូវបានគេយកមកដាក់តាំងបង្ហាញជាសាធារណៈ នៅក្នុងកម្មវិធី«មហោស្រពសិល្បៈជំនោរART» កាលពីចុងសប្ដាហ៌មុន នៅលើទីធ្លាសួនច្បារសម្ដេចក្រឡាហោម ស ខេង ក្នុងក្រុងបាត់ដំបង ដែលមានមនុស្សរាប់រយនាក់ចោមរោមទស្សនា ។
នៅក្នុងរាត្រីសម្ដែងសិល្បៈរបស់ក្រុម«មហោស្រពសិល្បៈជំនោរART» វិចិត្រករផ្នែកគំនូរ «សហសម័យ ឬ សហសវត្ស» របស់អង្គការ«ហ្វាពន្លឺសិល្បៈ» គឺលោក ឃួន ចន្ទរស្មី បាននាំយកគំនូរសហសម័យជាច្រើនផ្ទាំង ដែលជាស្នាដៃគូដោយផ្ទាល់របស់លោក យកមកដាក់បង្ហាញជូនមហាជនទស្សនា ។
ជាមួយនឹងការតាំងបង្ហាញផ្ទាំងគំនូរដ៏ក្រវេមក្រវ៉ាមមើលស្ទើរមិនយល់សោះនេះ គេសង្កេតឃើញ លោក ឃួន ចន្ទរស្មី ដែលជាម្ចាស់គំនូរ បានព្យាយាមបកស្រាយផ្ទាំងគំនូរនីមួយៗ ដើម្បីពន្យល់អ្នកសួរនាំចង់ដឹង ចង់យល់ពីអត្ថន័យ នៃផ្ទាំងគំនូរដ៏ក្រវេមក្រវ៉ាមនោះ ។ នៅចំពោះមុខមហាជន វិចិត្រការគំនូរ«សហសម័យ» រូបនេះបានព្យល់មួយៗ និងយ៉ាងលម្អិតដូច្នេះថា «តាមពិតទៅគំនូរសហសម័យនេះ បើយើងមើលនឹងភ្នែកពិបានបាកយល់ណាស់ បើអ្នកគូរគំនូរនេះមិនបកស្រាយ ។ វាមិនស្អាត មិនល្អ គ្មានសម្រស់ទេ តែវាមានបង្កប់នូវខ្លឹមសារ និងអត្ថន័យជ្រាលជៅបំផុត នៅក្នុងរូបភាពនៃផ្ទាំងគំនូរនីមួយៗ»។
លោក ចន្ទរស្មី បានពន្យល់ពីខ្លឹមសារពិតលើផ្ទាំងគំនូរដ៏រញ៉េរញ៉ៃមួយដែលលោកបានពណ៌រនាពីស្នាមញញឹម និងសេចក្ដីសុខក្នុងគ្រួសារមួយដែលមានសមាជិកច្រើន ។ វិចិត្រកររូបនេះបានពន្យល់ដូច្នេះថា « រូបនេះ បើមើលនឹងភ្នែកមិនយល់ទេ ។ មិនដឹងថា ខ្ញុំចង់គូរពីរូបអ្វីទេ ។ ប៉ុន្តែរូបនេះខ្ញុំចង់បង្ហាញពីជីវភាពរស់នៅដែលមានតែស្នាមញញឹម និងក្ដីសុខសាន្ត ពេលជួបជុំគ្នានៅក្នុងគ្រួសារមួយ ដែលមានសមាជិកច្រើននាក់» ។
មនុស្សរាប់រយនាក់ បានដើរកម្សាន្ត និងទស្សនា វត្ថុតាងអនុស្សាវរីយ៌ ឬទំនិញនានា ដែលដាក់តាំងតាមតូបតាំងពិព័រណ៌ក្នុងរាត្រី «មហោស្រពសិល្បៈជំនោរART»។ ក្នុងរាត្រីពិព័រណ៌នោះផ្ទាំងគំនូរ«សហសម័យ» ជាគោលដៅដ៏គួរឲ្យចាប់អារម្មណ៍យ៉ាងខ្លាំងសម្រាប់អ្នកដើរទស្សនា ។ មនុស្សជាច្រើនបានឈរមើលផ្ទាំងគំនូរដ៏ក្រវេមក្រវ៉ាមនោះ ។ អ្នកមើលខ្លះគ្រវីក្បាល ពេលសួរនាំ ។ អ្នកខ្លះបានឈរបង្ហាញនូវស្នាមញញឹមជាមួយនឹងការអ៊ួតសរសើរពីភាពប៉ិនប្រសព្វនៃអ្នកគូររូបដែលមើលស្ទើរមិនយល់ទាំងនោះ ។ ប៉ុន្តែក្នុងនោះ អ្នកឈរមើលស្ទើរ៥០% ហាក់បង្ហាញពីការយល់ដឹងពី«ខ្លឹមសារ និង អត្ថន័យ» នៅក្នុងរូបភាព។
ក្នុងចំណោមអ្នកឈរមើលផ្ទាំងគំនូរ យុវជនម្នាក់បាននិយាយយ៉ាងខ្លីដូច្នេះថា«ពីមុនខ្ញុំមើលគំនូរនេះមិនយល់ទេ ។ មិនដឹងគេចង់គូរពីអ្វីឡើយ ។ មើលទៅដូចក្រវេមក្រវ៉ាមណាស់មើលមិនយល់សោះ ។ ប៉ុន្តែពេលអ្នកគូរបានពន្យល់ពីខ្លឹមសារនៃគំនូរនីមួយៗទើបខ្ញុំយល់ខ្លះ ។ ពេលនេះខ្ញុំអាចស្វែងយល់ដោយខ្លួនខ្លះៗហើយក្រោយបានពិនិត្យយ៉ាងល្អិតល្អន់លើផ្ទាំងគំនូរ និងតាមការពន្យល់ពីជាងគំនូរ» ។ គំនូរ«សហសម័យ ឬសហសវត្ស» ត្រូវបានក្រុមសិល្បៈរបស់អង្គការ«ហ្វាពន្លឺសិល្បៈ» ដើរគូរតាមជញ្ជាំងសំណង់សាធារណៈ ឬតាមសំណង់ជញ្ជាំងផ្ទះនានា ដែលគេទុកចោល ។ គំនូរទាំងនោះភាគច្រើនគេគូរពណ៌រនាពីមនុស្ស សត្វ ឬធម្មជាតិ ដែលមានលក្ខណៈស្រដៀងគ្នាទៅនឹងគំនូរ«ជីវចល» ប៉ុន្តែកម្រមានអ្នកមើលយល់ណាស់ ។ អ្នកឈរមើលបានត្រឹមតែជ្រួញចិញ្ចើមឆ្ងល់តែប៉ុណ្ណោះ ។ ប៉ុន្តែប៉ុន្មានឆ្នាំចុងក្រោយនេះ មនុស្សជាច្រើនបានចាប់អារម្មណ៌ និងស្វែងយល់ពីគំនូរដ៏ក្រវេមក្រវ៉ាមនេះ ។
លោក ឃួន ចន្ទរស្មី បានលើកឡើងថា គ្រប់ផ្ទាំងគំនូរ«សមហសម័យ» សុទ្ធមានបង្កប់នូវ«ខ្លឹមសារ និង អត្ថន័យ» ដ៏ជ្រាលជ្រៅនៅក្នុងរូបភាព ។ វិចិត្រករជំនាញគូររូបក្រវេមក្រវ៉ាមរូបនេះបានទទួលស្គាល់ថា កាលពីឆ្នាំមុនពិតជាមិនសូវមានអ្នកមើលយល់មែន ចំពោះរូបគំនូរ«សហសម័យ»នេះ តែមកដល់សព្វថ្ងៃ មានអ្នកស្វែងយល់ច្រើន ។
លោក ឃួន ចន្ទរស្មី បានបញ្ជាក់ថា ពេលនេះក្រុមការងាររបស់លោកបានគូររូបប្លែកៗផុសចេញពីគំនិតដ៏ប៉ិនប្រសព្វ ដែលមានគោលដៅជាក់លាក់ទៅលើកម្មវត្ថុដែលពួកគេរកឃើញ និងបានស្វែងយល់ ។ ភាគច្រើននៃផ្ទាំងគំនូរបានដាក់បង្ហាញជាសាធារណៈនៅតាមកម្មវិធីប្រគុំតន្ត្រីសម្ដែងសិល្បៈ ឬពិធីតាំងពិព័រណ៌ផ្សេងៗ ដើម្បីឲ្យមហាជនបានឃើញ និងស្វែងយល់ពីខ្លឹមសារ និងអត្ថន័យពីផ្ទាំងគំនូរ«សហសម័យ ឬ សហសវត្ស» ដែលគូរដោយក្រុមសិល្បៈរបស់អង្គការ«ហ្វាពន្លឺសិល្បៈ» ប្រចាំខេត្តបាត់ដំបង ៕
ចែករំលែកព័តមាននេះ