រាជធានីភ្នំពេញ ៖ បន្ទាប់ពីសម្រាកព្យាបាលអស់រយៈពេលបីថ្ងៃនៅមន្ទីរពេទ្យខេត្តតាកែវរួចមក លោកព្រឹទ្ធាចារ្យភិរម្យប្រាជ្ញ ឈួន ហៅលោកតាចាប៉ីដងវែងត្រូវបានគ្រូពេទ្យបញ្ជូនមកមន្ទីរពេទ្យកាល់ម៉ែតកាលពីរសៀលថ្ងៃទី២១ ខែមិថុនា ឆ្នាំ២០១១ ដើម្បីធ្វើការវះកាត់ដុំសាច់ដុះនៅតម្រងនោម
រាជធានីភ្នំពេញ ៖ បន្ទាប់ពីសម្រាកព្យាបាលអស់រយៈពេលបីថ្ងៃនៅមន្ទីរពេទ្យខេត្តតាកែវរួចមក លោកព្រឹទ្ធាចារ្យភិរម្យប្រាជ្ញ ឈួន ហៅលោកតាចាប៉ីដងវែងត្រូវបានគ្រូពេទ្យបញ្ជូនមកមន្ទីរពេទ្យកាល់ម៉ែតកាលពីរសៀលថ្ងៃទី២១ ខែមិថុនា ឆ្នាំ២០១១ ដើម្បីធ្វើការវះកាត់ដុំសាច់ដុះនៅតម្រងនោម ។
ភរិយាលោកព្រឹទ្ធាចារ្យភិរម្យប្រាជ្ញ ឈួន មានប្រសាសន៍ទាំងទឹកមុខក្រៀមក្រំថា លោកតាប្រាជ្ញ ឈួន មានជំងឺប្រចាំកាយលើសឈាម បណ្តាលឲ្យស្លាប់មួយចំហៀងខ្លួន ហើយបានមកពេទ្យព្យាបាលច្រើនលើកក្រោមការជួយឧបត្ថម្ភយ៉ាងយកចិត្តទុកដាក់ពីសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសប្បុរសជនជិតឆ្ងាយជាច្រើនទៀតធ្វើឲ្យលោកតាចាប៉ីដងវែងជាសះស្បើយវិលត្រលប់ទៅស្រុកកំណើតវិញនៅភូមិស្រម៉ ឃុំខ្វាវ ស្រុកទ្រាំង ខេត្តតាកែវ។ ក៏ប៉ុន្តែនៅថ្ងៃទី១៨ ខែមិថុនា ស្រាប់តែលោកតាចាប់ផ្តើមឈឺចុកចាប់ពេញខ្លួនខុសប្លែកពីធម្មតា ទើបកូនចៅបញ្ជូនទៅមន្ទីរពេទ្យខេត្តតាកែវ ដេកសម្រាកនៅទីនោះអស់រយៈពេលបីថ្ងៃក្រោមការយកចិត្តទុកដាក់ពីគ្រូពេទ្យ ។ ក្រោយពីពិនិត្យឃើញលោកព្រឹទ្ធាចារ្យភិរម្យប្រាជ្ញ ឈួន ដុះដុំសាច់នៅក្នុងតម្រងនោមដែលត្រូវតែវះកាត់គ្រូពេទ្យក៏សម្រេចបញ្ជូនគាត់មកកាន់មន្ទីរពេទ្យកាល់ម៉ែត ។
លោកព្រឹទ្ធាចារ្យភិរម្យប្រាជ្ញ ឈួន ហៅលោកតាចាប៉ីដងវែង នឹងត្រូវធ្វើការវះកាត់នៅព្រឹកថ្ងៃទី២៣ ខែមិថុនា ឆ្នាំ២០១១ នៅមន្ទីរពេទ្យកាល់ម៉ែត ។ នេះបើតាមការឲ្យដឹងពីក្រុមគ្រួសាររបស់លោកតា។ នៅលើគ្រែដែកក្នុងមន្ទីរពេទ្យកាល់ម៉ែត លោកតាព្រឹទ្ធាចារ្យភិរម្យប្រាជ្ញ ឈួន បានថ្លែងទាំងដកដង្ហើមធំនិងយកដៃគងថ្ងាសថា ពេលនេះប្រៀបដូចជាសត្វលង់ទឹក កាលសម្រាកព្យាបាលនៅមន្ទីរពេទ្យខេត្តតាកែវបានការជួយឧបត្ថម្ភពីកាកបាទក្រហមខេត្តទាំងថ្លៃព្យាបាល និងថវិកាធ្វើដំណើរមកមន្ទីរពេទ្យកាល់ម៉ែត។
នៅមន្ទីរពេទ្យកាល់ម៉ែតក៏មានការខ្វះខាតច្រើនដែរតែទោះជាយ៉ាងណាលោកតាសង្ឃឹមយ៉ាងមុតមាំទៅលើសម្តេចអគ្គមហាសេនាបតីតេជោ ហ៊ុន សែន និងលោកជំនាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មិនមើលរំលងនោះទេ ហើយសប្បុរសជនជិតឆ្ងាយនឹងជួយស្រោចស្រង់ជីវិតលោកតាមិនខានឡើយ ៕
ចែករំលែកព័តមាននេះ