ប្រាសាទ ដាវីន ទទួលបាន Top2 Voice for Change នៃកម្មវិធី Miss Universe 2024
នៅទីបំផុត បេក្ខភាពតំណាងឲ្យកម្ពុជា ប្រាសាទ ដាវីន ទទួលបាន Top 2 Voice for Change…
នៅទីបំផុត បេក្ខភាពតំណាងឲ្យកម្ពុជា ប្រាសាទ ដាវីន ទទួលបាន Top 2 Voice for Change នៃកម្មវិធី Miss Universe 2024 ក្រោយពីមហាជនខ្មែរជាច្រើនរូបបានចំណាយពេល និងថវិកាផ្ទាល់ខ្លួនចូលរួមបោះឆ្នោតគាំទ្ររហូតទទួលបានជោគជ័យនាពេលនេះ ។ នេះបើតាមការប្រកាសឲ្យដឹងពីផេកហ្វេសប៊ុក Universe Pageant នៅថ្ងៃទី១២ ខែវិច្ឆិកា ឆ្នាំ២០២៤ ។
សម្រាប់វគ្គ Top 2 Voice for Change ប្រាសាទ ដាវីន Miss Universe Cambodia 2024 👑🇰🇭បានជាប់ Top 2 ខណៈពេលដែរប្រទេស Eritrea 🇪🇷 ជាប់នៅក្នុងចំណាប់ថ្នាក់លេខ១ ក្នុងចំណោមបេក្ខនារីដែលមកពី១០០ប្រទេសជាងនៅលើពិភពលោក ។ កម្មវិធី Vote Voice for Change នៃកម្មវិធី Miss Universe គឺតម្រូវប្រទេស៣ដែលទទួលបានការបោះឆ្នោតច្រើនបំផុត នឹងត្រូវជ្រើសរើសដោយស្វ័យប្រវត្តិទៅកាន់ Top 10 នៃការប្រកួត Voice For Changeហើយ សម្រាប់៧ប្រទេសផ្សេងទៀតនឹងត្រូវជ្រើសរើសដោយគណៈកម្មការ ។
គណៈកម្មការទាំងអស់នឹងផ្ដល់ពិន្ទុបូករួមនិងពិន្ទុពីការបោះឆ្នោតដើម្បីវាយតម្លៃថា សកម្មភាពសង្គមណាដែលល្អបំផុត មានតម្រូវការបំផុតចំគោលដៅ និងមាននិរន្តរភាពទៅអនាគត ។ ជាការកត់សម្គាល់ សម្រាប់វគ្គនៃការបោះឆ្នោតខាងលើនេះ គេឃើញមានមហាជន ជាពិសេសតារាល្បីៗ អ្នករកស៊ីអនឡាញល្បីៗបាននាំគ្នាយ៉ាងសស្រាក់សស្រាំពួតដៃគ្នាចូលរួមគាំទ្រ និងថវិកាផ្ទាល់ខ្លួនលើការបោះឆ្នោតនេះ រហូតធ្វើឲ្យបេក្ខភាពតំណាងប្រទេសកម្ពុជា ប្រាសាទ ដាវីន ទទួលបានជោគជ័យនាពេលនេះ ។
ក្រោយទទួលបានជោគជ័យនាពេលនេះ ស្ថាប័ន Miss Universe Cambodia បានបញ្ចេញសារបង្ហោះលើបណ្តាញសង្គម ដោយបានសម្ដែងនូវអំណរគុណយ៉ាងជ្រាលជ្រៅចំពោះបងប្អូនប្រជាជនខ្មែរទាំងអស់ ដែលបានចូលរួមយ៉ាងសកម្មគាំទ្របោះឆ្នោតទៅកាន់សកម្មភាពសង្គមរបស់បេក្ខភាពកម្ពុជា អ្នកនាង ប្រាសាទ ដាវីន រហូតបានស្ថិតក្នុងចំណោម Top ២ នៃការបោះឆ្នោត។ យើងរង់ចាំបន្តទៀតនូវលទ្ធផលចុងក្រោយ ដែលនឹងប្រកាសនៅលើវេទិកាផ្ដាច់ព្រ័ត្រនៃកម្មវិធី Miss Universe លើកទី៧៣។
ដោយឡែក សម្រាប់ ប្រាសាទ ដាវីន ក៏បានបញ្ចេញវីដេអូខ្លីមួយលើបណ្តាញសង្គមថា នាងមិននឹកស្មានមានបងប្អូនប្រជាជនខ្មែរយើងជាច្រើនបានជួយបោះឆ្នោតដល់រូបនាងឡើយ ដែលធ្វើឲ្យនាងមានការរំភើបចិត្តយ៉ាងខ្លាំង ។ បេក្ខភាពរូបនេះ បាននិយាយទាំងអួលដើម.កថា កម្លាំងរួមសាមគ្គីមួយនេះ គឺពិតជាអស្ចារ្យមែនទែន ហើយនាងមិនស្មានដល់ថ្នាក់នេះឡើយ ក្នុងពេលដែលនាងពិតជាអរគុណយ៉ាងខ្លាំងសម្រាប់ការជួយមួយនេះ ។
នាងបញ្ជាក់ថា ប្រជាជនកម្ពុជា អ្នកពិតជាអស្ចារ្យណាស់🙏 កម្លាំងសាមគ្គីរបស់មហាគ្រួសារខ្មែរពិតជាខ្លាំងក្លា ពិតជាមានអត្ថន័យខ្លាំងណាស់ អរគុណបងប្អូនដែលតែងតែនៅក្បែរនិងបន្តជ្រោមជ្រែងរហូតមកប្រទេសយើងតូច ប៉ុន្តែយើងបានបង្ហាញពីកម្លាំងរួមសាមគ្គីគ្នាដោយមិនចាញ់ប្រទេសគេនោះទេ ។
គួរបញ្ជាក់ថា អ្នកនាង ប្រាសាទ ដាវីន បានធ្វើដំណើរចាកចេញពីប្រទេសកម្ពុជាទៅចូលរួមប្រកួតកម្មវិធី Miss Universe 2024 នៅប្រទេសម៉ិចស៊ី កាលពីល្ងាចថ្ងៃទី២៧ ខែតុលា ឆ្នាំ តាមច្រកចូលអាកាសយាន្តដ្ឋានអន្តរជាតិភ្នំពេញ ។
មុនការចាកចេញបវរកញ្ញាតំណាងជាតិកម្ពុជារូបនេះ ក៏បានឱ្យដឹងពីការត្រៀមខ្លួនផ្សេងៗ រួមទាំងភាពជឿជាក់ឆ្ពោះទៅការបើកទ្វារប្រវត្តិសាស្ត្រនាំកម្ពុជាចូលទៅក្នុងវគ្គ Top ចុងក្រោយនៃការប្រកួតបវរកញ្ញាធំជាងគេបង្អស់លើពិភពលោក។
ទោះជាយ៉ាងណា ប្រាសាទ ដាវីន នៅតែចង់បានការគាំទ្របន្ថែមពីបណ្តាអ្នកគាំទ្រ និងប្រជាជនកម្ពុជា ដើម្បីឱ្យនាងមានលទ្ធភាពឈានចូលទៅក្នុងវគ្គ Top ចុងក្រោយតាមការរំពឹងទុក ៕
ចែករំលែកព័តមាននេះ