សហគមន៍ចាប៉ីអមតៈបានផ្តួចផ្តើមបង្កើតចលនាចុះសួរសុខទុក្ខសិល្បករផ្នែកចាប៉ីដងវវែងជើងចាស់ដែលនៅរស់រានមានជីវិត នៅតាមបណ្តាខេត្តក្រុងនានាក្នុងប្រទេសកម្ពុជា ខណៈពេលដែលយុទ្ធនាការនេះនឹងរៀបចំធ្វើឡើងនៅថ្ងៃទី៣០ ខែវិច្ឆិកា ឆ្នាំ២០២៤ ខាងមុខនេះ នៅវត្តព្រះធាតុ រាជធានីភ្នំពេញ ។ លោក…
សហគមន៍ចាប៉ីអមតៈបានផ្តួចផ្តើមបង្កើតចលនាចុះសួរសុខទុក្ខសិល្បករផ្នែកចាប៉ីដងវវែងជើងចាស់ដែលនៅរស់រានមានជីវិត នៅតាមបណ្តាខេត្តក្រុងនានាក្នុងប្រទេសកម្ពុជា ខណៈពេលដែលយុទ្ធនាការនេះនឹងរៀបចំធ្វើឡើងនៅថ្ងៃទី៣០ ខែវិច្ឆិកា ឆ្នាំ២០២៤ ខាងមុខនេះ នៅវត្តព្រះធាតុ រាជធានីភ្នំពេញ ។
លោក ពេជ្ជ សារ៉ាត ប្រធានសហគមន៍ចាប៉ីអមតៈ បានលើកឡើងថា បច្ចុប្បន្នសិល្បៈជើងចាស់ផ្នែកចាប៉ីដងវែងនេះ ដែលមានវ័យ៦០ឆ្នាំឡើងទៅគឺមានមិនដល់១០០នាក់ឡើយ ក្នុងពេលដែលពួកគេគាត់ភាគច្រើនកំពុងរស់នៅក្នុងជីវភាពក្រលំបាក ។
លោកបញ្ជាក់ថា ពេលខ្លះពួកគាត់បានទាក់ទងមកលោកផ្ទាល់ ដើម្បីឲ្យជួយគាត់ផង ដោយសារគាត់កំពុងលំបាក ហើយលោកក៏មិនមានអ្វីច្រើនសម្រាប់ជួយគាត់ដែរ ប៉ុន្តែលោកនៅតែខំប្រឹងប្រែងខ្នះខ្នែងជួយពួកគាត់តាមលទ្ធភាព ។
យ៉ាងណាដោយ ឃើញស្ថានភាពបែបនេះ លោកក៏តែងតែរៀបចំព្រឹត្តការណ៍ស្វែងរកសប្បុរសនានា ដើម្បីជួយឧបត្ថម្ភ ចូលរួមជួយដល់ព្រឹទ្ធាចារ្យចាប៉ីដងវែងដែលពួកគាត់មានវ័យចំណាស់ និងកំពុងរស់នៅក្នុងស្ថានភាពលំបាក ។
លោកបន្ថែមថា ជាក់ស្តែងនាឆ្នាំនេះ សហគមន៍ចាប៉ីអមតៈ ក៏រៀបចំយុទ្ធនាការមួយដុល្លារឆ្ពោះទៅកាន់ព្រឹត្តិការណ៍អបអរសាទរខួបចាប៉ីដងវែងលើកទី៨ ក្រោមប្រធានបទ រំឮកដឹងគុណបុព្វបុរសខ្មែរចាប៉ីដងវែង ។
លោកបញ្ជាក់ថា គោលបំណងនៃការរៀបចំព្រឹត្តិការណ៍ខាងលើនាឆ្នាំគឺ ចូលរួមអបអរសាទរខួបលើកទី៨ ឆ្នាំនៃការដាក់ចាប៉ីដងវែង ចូលក្នុងបញ្ជីសម្បត្តិបេតិកភណ្ឌពិភពលោក អង្គការយូណេស្គូ ជាវេទិការផ្តល់ ឱកាសជូន សិល្បៈបុរាណខ្មែរចាប៉ីដងវែង កុមារ យុវវ័យ យុវជន ជំនាន់ក្រោយបានបង្ហាញទេពកោសល្យផ្នែកចាប៉ីដងវែង សម្តែងជាទំរង់ទោល ឆ្លងឆ្លើយ លក្ខណៈជាក្រុម និងសូឡូ តាមលំនាំពីបុរាណ ។
ព្រឹត្តការណ៍នេះ ក៏ជាវេទិការពិភាក្សាសិក្សាឈ្វេងយល់រៀនសូត្រទម្រង់ចាប៉ីដងវែង រួមចំណែកលើកស្ទួយអភិរក្ស ថែរក្សា សិល្បៈបុរាណខ្មែរអត្តសញ្ញាណជាតិ និង អភិវឌ្ឍន៍ បង្កើតស្នាដៃ ច្នៃប្រឌិតបង្កើតថ្មី ។
ជាពិសេសនោះ យុទ្ធនាការមួយដុល្លារ បន្ទាប់ពីបញ្ចប់ព្រឹត្តិការណ៍អបអរសាទរខួបចាប៉ីដងវែងលើកទី៨ ថវិកាដែលទទួលបានពីការចូលរួមរបស់ពុកម៉ែបងប្អូន និងសប្បុរសជននានា ក៍ជាចំណែកមួយ នៃកម្មវិធី ចុះសុខទុក្ខព្រឹទ្ធាចារ្យចាប៉ីដងវែងដែលលោកមានព្រះជន្មាយុចាប់ពី60ឆ្នាំឡើងទៅដែលកំពុងរស់នៅតាមបណ្តាខេត្តក្រុងនានា ជាមួយនឹងជីវភាពខ្វះខាត ។
បើតាមលោក ពេជ្ជ សារាត ក្រុមការងារស្មគ្រ័ចិត្តរៀបចំ និងសិល្បៈករសិល្បៈការនីបុរាណខ្មែរចាប៉ីដងវែង សូមគោរពគារវៈថ្លែងអំណរគុណយ៉ាងជ្រាលជ្រៅ ចំពោះ ទឹកចិត្តដ៏សប្បុរស របស់ ពុកម៉ែបងប្អូន ចូលរួមចំណែកបរិច្ចាគជាមួយ បុព្វហេតុ សេចក្តីស្រឡាញ់ លើកស្ទួយអភិរក្សថែរក្សា អត្តសញ្ញាណខ្មែរ បន្តជំនាន់ និរន្តរភាព ៕
ចែករំលែកព័តមាននេះ