ទីក្រុងបាងកក៖ មានហេតុការណ៍គួរឱ្យភ្ញាក់ផ្អើលមួយកើតឡើងកាលពីយប់ថ្ងៃអង្គារនៅសណ្ឋាគារទីក្រុងបាងកក ប្រទេសថៃនៅពេលសមត្ថកិច្ចរកឃើញសាកសពជនជាតិអាមេរិកដើមកំណើតវៀតណាម២នាក់ និងជនជាតិវៀតណាម៤នាក់។ ពួកគេត្រូវថ្នាំពុលបែកពពុះមាត់ស្កុល។ សមត្ថកិច្ចទទួលដំណឹងនេះនៅម៉ោង៥:៣០ល្ងាច ហើយក៏ចាត់កម្លាំងចុះទៅសណ្ឋាគារហ្គ្រេន ហ៊ីយ៉ាត អេរ៉ាវ៉ាន់ (Grand…
ទីក្រុងបាងកក៖ មានហេតុការណ៍គួរឱ្យភ្ញាក់ផ្អើលមួយកើតឡើងកាលពីយប់ថ្ងៃអង្គារនៅសណ្ឋាគារទីក្រុងបាងកក ប្រទេសថៃនៅពេលសមត្ថកិច្ចរកឃើញសាកសពជនជាតិអាមេរិកដើមកំណើតវៀតណាម២នាក់ និងជនជាតិវៀតណាម៤នាក់។ ពួកគេត្រូវថ្នាំពុលបែកពពុះមាត់ស្កុល។ សមត្ថកិច្ចទទួលដំណឹងនេះនៅម៉ោង៥:៣០ល្ងាច ហើយក៏ចាត់កម្លាំងចុះទៅសណ្ឋាគារហ្គ្រេន ហ៊ីយ៉ាត អេរ៉ាវ៉ាន់ (Grand Hyatt Erawan)។ ទៅដល់ឃើញសពបុរសបីនាក់ និងនារីបីនាក់នៅក្នុងបន្ទប់តែមួយ។
យោងតាមការពិនិត្យនៅក្នុងបន្ទប់ និងភិនភាគជនរងគ្រោះ, គ្មានការប្រើប្រាស់អំពើហិង្សាទេ។ ឥវ៉ាន់របស់ពួកគេស្ថិតនៅមាត់ទ្វារចូល។ សមត្ថកិច្ចឆែកមើលកាមេរ៉ាសុវត្ថិភាព និងសាកសួរសាក្សីមួយចំនួនដើម្បីបានជាតម្រុយក្នុងការស៊ើបអង្កេត។ គ្រូពេទ្យកោសល្យវិច័យបញ្ជាក់ថាពួកគេស្លាប់ដោយសារថ្នាំបំពុល។ ប៉ុន្តែគេមិនដឹងថាតើជនរងគ្រោះដាក់ថ្នាំបំពុលខ្លួនឯងឱ្យស្លាប់ជាលក្ខណៈធ្វើអត្តឃាត? ឬក៏ត្រូវថ្នាំបំពុលរបស់អ្នកផ្សេងជាលក្ខណៈមនុស្សឃាត? សមត្ថកិច្ចរកឃើញថាពួកគេបានផឹកតែ និងកាហ្វេនៅក្នុងបន្ទប់។ សារព័ត៌មានក្នុងស្រុកផ្សាយថាជនរងគ្រោះស្លាប់ដោយសារថ្នាំពុលស្យានីត (cyanide)។
យោងតាមស្នងការនគរបាលទីក្រុងបាងកក, ភ្ញៀវ៧នាក់ចូលស្នាក់នៅ៥បន្ទប់ នៅជាន់ទី៧បួនបន្ទប់ និងជាន់ទី៥មួយបន្ទប់កាលពីចុងសប្ដាហ៍កន្លងទៅនេះ។ អ្នកស្នាក់នៅជាន់ទី៧ត្រូវចាកចេញនៅល្ងាចថ្ងៃចន្ទ។ វ៉ាលីរបស់ពួកគេបានរៀបចំរួចរាល់អស់ហើយនៅមាត់ទ្វារ។ ប៉ុន្តែមុននឹងចាកចេញ, ពួកគេចុះទៅបន្ទប់គ្នារបស់គេម្នាក់ទៀតនៅជាន់ទី៥ដើម្បីញ៉ាំអាហារជុំគ្នា។
លោកស្នងការរូបនេះយល់ថាជនរងគ្រោះប្រហែលជាស្លាប់ដោយសារគេដាក់ថ្នាំបំពុល។ អាហារដែលបុគ្គលិកសណ្ឋាគារលើកទៅឱ្យពួកគេបរិភោគនោះនៅសល់ទាំងអស់ មិនទាន់បានបរិភោគសូម្បីតែ១ម៉ាត់។ ចំណែកតែ និងកាហ្វេមុនដំបូងប្រហែលជាចាក់ពេញពែង។ បន្ទាប់មក ត្រូវពួកគេផឹកអស់រលីង ហើយមានបន្សល់ទុកកាកម្សៅនៅបាតពែង។ ឥឡូវនេះ សមត្ថកិច្ចកំពុងតាមរកជនជាតិវៀតណាមម្នាក់ដែលមិនដឹងថាស្ថិតនៅទីណាពិតប្រាកដទេ។ ប៉ុន្តែច្បាស់ណាស់ថាតិច ឬច្រើនបុគ្គលរូបនេះត្រូវតែជាប់ពាក់ព័ន្ធ។
នៅក្នុងចំណោមអ្នកទាំង៦នោះមានតែម្នាក់ប៉ុណ្ណោះដែលមានស្នាមនៅលើផ្ទៃមុខ។ ប៉ុន្តែសមត្ថកិច្ចយល់ថាស្នាមនេះមិនមែនជាអំពើហិង្សាទេ។ ប្រហែលជាជនរងគ្រោះដួលប៉ះចំវត្ថុអ្វីមួយត្រូវចំមុខរបស់គាត់។ បើតាមកាយវិការមុនពេលស្លាប់ ជនរងគ្រោះ២នាក់ ម្នាក់ជាស្ត្រី និងម្នាក់ទៀតជាបុរសទំនងជាខំប្រឹងប្រវេប្រវាទៅរកទ្វារបន្ទប់ដើម្បីសូមឱ្យគេជួយ។ អគ្គស្នងការនគរបាលជាតិថៃថ្លែងថានៅពេលសមត្ថកិច្ចទៅដល់កន្លែងកើតហេតុឃើញបន្ទប់នោះជាប់គន្លឹះពីខាងក្នុង។
យោងតាមកាសែតវៀតណាមអ៊ិចប្រែសដែលដកស្រង់ប្រភពសូមមិនបញ្ចេញឈ្មោះ, ជនរងគ្រោះទាំងនោះបែកពពុះមាត់។ កាសែតដដែលនេះបាននិយាយយោងទៅតាមសេចក្ដីប្រកាសរបស់ក្រសួងការបរទេសដែលថាជនរងគ្រោះ៥នាក់ស្លាប់នៅក្នុងបន្ទប់សណ្ឋាគារ។ រីឯម្នាក់ទៀតស្លាប់នៅខាងក្រៅបន្ទប់។ ដំណឹងនេះបានលេចឮដល់នាយករដ្ឋមន្ត្រីថៃ លោកសេដ្ឋា ថាក់វិស៊ីន។ លោកចុះទៅកន្លែងកើតហេតុទាំងយប់។ លោកថ្លែងថាជនរងគ្រោះបានស្លាប់ប្រហែល២៤ម៉ោងមុនពេលសមត្ថកិច្ចចុះទៅដល់។
«យើងត្រូវតែវះកាត់សាកសពដើម្បីពិនិត្យមើលថាតើមានសារធាតុអ្វីនៅក្នុងខ្លួនរបស់ជនរងគ្រោះ។ ប៉ុន្តែលោកសូមច្រានចោលពាក្យចចាមអារ៉ាមដែលនិយាយថាជនរងគ្រោះស្លាប់ដោយសារអំពើប្លន់ ឬអំពើបាញ់ប្រហារ។ លោកយល់ថាហេតុការណ៍នេះជាអ្វីដែលហួសពីការស្មាន។ ប៉ុន្តែសង្ឃឹមថាមិនប៉ះពាល់អារម្មណ៍របស់អ្នកទេសចរទេ។ លោកបានបញ្ជាឱ្យមន្ត្រីក្រោមឱវាទចាត់វិធានការពង្រឹងសតិអារម្មណ៍របស់សាធារណជនឡើងវិញដើម្បីកុំឱ្យពួកគេមានអារម្មណ៍ភ័យខ្លាច។
ករណីស្លាប់ជនជាតិបរទេសអាចនឹងប៉ះពាល់វិស័យទេសចរណ៍ ហើយអាចនឹងប៉ះពាល់មុខមាត់របសប្រទេសថៃទៀតបើរឿងនេះកើតឡើងញឹកញាប់ពេក។ គេនៅចាំបានថាកាលពីប៉ុន្មានថ្ងៃមុននេះក៏មានករណីសម្លាប់នារីទេសចរជនជាតិចិនម្នាក់ឈ្មោះយ៉ាន រួយមីន (Yan Ruimin) អាយុ៣៨ឆ្នាំ។ នារីរូបនោះត្រូវជនសង្ស័យល្បួងឱ្យជិះឡានជាមួយខ្លួន។ បន្ទាប់មក ជនសង្ស័យទាក់ទងទៅក្រុមគ្រួសាររបស់នារីរងគ្រោះដើម្បីជំរិតទារលុយ១លានយ័ន្ត ឬស្មើនឹងជាង១៣ម៉ឺនដុល្លារ។ បើមិនដូច្នេះទេ ពួកគេរង់ចាំទទួលសាកសពរបស់នាងទៅចុះ។ កន្លងផុតទៅបានប៉ុន្មានថ្ងៃ សមត្ថកិច្ចរកឃើញសាកសពរបស់នារីនោះត្រូវជនដៃដល់យកទៅកប់ចោល៕
សូមរំលឹកថា នារីចិនម្នាក់ត្រូវចិនដូចគ្នាចា.ប់ជំ.រិតនៅលើទឹកដីថៃមិនដឹងស្លា.ប់ ឬរស់
ចែករំលែកព័តមាននេះ