(ឥណ្ឌា)៖ យោងតាម ​​Indian Express ពិធីមង្គលការរបស់លោក Anant Ambani កូនប្រុសពៅមហាសេដ្ឋីឥណ្ឌា Mukesh Ambani បានក្លាយជាពិធីមង្គលការដែលមានតម្លៃថ្លៃជាងគេបំផុតក្នុងពិភពលោក ដោយចំណាយថវិកាអស់ប្រមាណ ៦០០លានដុល្លារអាមេរិក។

លោក Anant Ambani កូនប្រុសរបស់មហាសេដ្ឋីឥណ្ឌា Mukesh Ambani បានរៀបចំពិធីមង្គលការជាផ្លូវការនៅថ្ងៃទី១២ ខែកក្កដា ដែលជាថ្ងៃបញ្ចប់នៃពិធីមង្គលការដ៏ប្រណីតដែលមានរយៈពេលជិត ៧ខែ។ ពិធីមង្គលការនេះបានធ្វើឱ្យពិភពលោកទាំងមូលភ្ញាក់ផ្អើល ដោយផ្តោតការយកចិត្តទុកដាក់លើទ្រព្យសម្បត្តិដ៏ច្រើន និងឥទ្ធិពលរបស់បុរសមានបំផុតនៅអាស៊ី។

អ្វីដែលគួរឱ្យចាប់អារម្មណ៍នោះ មហាសេដ្ឋីរូបនេះបានផ្តល់កាដូដល់ភ្ញៀវពិសេស និងអ្នកកំដរការរបស់ខ្លួនចំនួន១០នាក់ នូវនាឡិកា Audemars Piguet (limit edition) តម្លៃប្រហែល ១០៥,០០០ដុល្លារ ។

នាឡិការនេះមានកម្រាស់ ៩.៥ មីលីម៉ែត្រ ស្រោមមាស៤១មីលីម៉ែត្រ  ជាមួយនឹងគ្រីស្តាល់ត្បូងកណ្តៀង។ នាឡិកានេះធន់នឹងទឹករហូតដល់ ២០ម៉ែត្រ។ នៅលើ Instagram កូនកំលោះបានចែករំលែកវីដេអូដែលបង្ហាញពីអំណោយដ៏ប្រណិតនេះ។

ពិធីមង្គលការដ៏អស្ចារ្យតម្លៃរាប់រយលានដុល្លាររបស់កូនប្រុសមហាសេដ្ឋីអាស៊ី បានប្រារព្ធឡើងចាប់ពីថ្ងៃទី ១២-១៤ ខែកក្កដា ក្នុងទីក្រុងបុមបៃ។

ព្រឹត្តិការណ៍​នេះ​នាំ​មក​នូវ​ភ្ញៀវ​ល្បីៗ និង​មាន​ឥទ្ធិពល​ក្នុង​វិស័យ​កម្សាន្ត កីឡា ជំនួញ និង​នយោបាយ។ បងប្អូនស្រីត្រកូល Kim និង Khloé Kardashian, Nick Jonas និង Priyanka Chopra អតីតនាយករដ្ឋមន្ត្រីអង់គ្លេស Boris Johnson , John Cena, Ivanka Trump… បានបង្ហាញខ្លួនចូលរួមនិងស្លៀកពាក់យ៉ាងប្រណិតក្នុងពិធីមង្គលការ។

យោងតាម ​​Reuters មហាសេដ្ឋី Mukesh បានជួលយន្តហោះចំនួន ១០០គ្រឿង រួមទាំងយន្តហោះ Falcon-2000 ចំនួន ៣គ្រឿង ដើម្បីដឹកជញ្ជូនភ្ញៀវទៅចូលរួមពិធីមង្គលការ៕ ប្រភព៖ preview.ph