ឃើញតែញញឹមមុខកាម៉េរ៉ា! Youtuber កូរ៉េដ៏ល្បី ទម្លាយរឿងឈឺចាប់ដែលត្រូវបានអតីតមិត្តប្រុសធ្វើបាប និងយកលុយដែលនាងរកបាន រយៈពេល៤ឆ្នាំ

(កូរ៉េ)៖ កាលពីពេលថ្មីៗនេះ Youtuber mukbang កូរ៉េដ៏ល្បី គឺនាង Tzuyang ដែលមានឈ្មោះពិត Park Jung-won បានចេញទម្លាយរឿងឈឺចាប់ដែលលាក់ទុករាប់ឆ្នាំដោយនាងលើកឡើងថា នាងត្រូវបានអតីតមិត្តប្រុសរបស់នាងធ្វើបាប គំរាមកំហែង បញ្ចេញឃ្លីបក្តៅសាច់ ហើយជននោះទៀតសោតបានបង្ខំឱ្យនាងធ្វើការជាអ្នកបម្រើនៅហាងស្រាមួយដើម្បីរកលុយឱ្យខ្លួនចាយ។

តារាយូធូបដ៏​ល្បី​បំផុត​របស់​កូរ៉េដែលមាន subscriber ជាង១០លាននាក់​រូបនេះបាន​និយាយ​ថា​នាង​បាន​ស្គាល់​មិត្ត​ប្រុស​នេះ​មុន​នឹង​ក្លាយ​​​ជា YouTuber ​។ ជន​នេះ​បាន​វាយ​ដំ​នាង​ជា​ច្រើន​ដង ហើយពេល Tzuyang ចង់បញ្ចប់ទំនាក់ទំនង ជនល្មើសបានគំរាមផ្សព្វផ្សាយឃ្លីបក្តៅសាច់ដែលជននោះបានលួចថតដោយសម្ងាត់។ នាងបានបន្តថាអតីតមិត្តប្រុសរបស់នាងបានយកលុយទាំងអស់ដែលនាងរកបាន។

នៅពេលដែល Tzuyang បើក ឆែននែលយូធូប ហើយកាន់តែល្បី អតីតមិត្តប្រុសនាង បានបង្កើតក្រុមហ៊ុនមួយ ហើយបង្ខំនាងឱ្យចុះកិច្ចសន្យាការងារមិនយុត្តិធម៌ ដោយជននោះយក៧០% នៃចំណូលដែលនាងរកបាន ពោលគឺនាងបានតែ៣០%ប៉ុណ្ណោះ។

ប្រភពបានបន្តទៀតថាដោយទ្រាំមិនបាន Tzuyang បានដាក់ពាក្យ​ប្ដឹង​អតីត​មិត្ត​ប្រុស​របស់​នាង ប៉ុន្តែ​ករណី​នេះ​ត្រូវ​បាន​បញ្ចប់​ ដោយនាងពុំបានរកនូវយុត្តិធម៌ ព្រោះតែ​អតីត​មិត្ត​ប្រុស​ចិត្តឃោរឃៅរូបនោះបានសម្លាប់ខ្លួនដើម្បីគេចវេសពីបញ្ហា។

នៅក្នុងវីដេអូនាងបានបន្តថា មូលហេតុដែលនាងចេញមុខនិយាយអំពីបញ្ហាទាំងនេះ ក៏ព្រោះតែមាន YouTubers មួយចំនួនកំពុងគម្រាមលាតត្រដាងជីវិតឯកជនរបស់នាង និងបង្ខូចកេរ្តិ៍ឈ្មោះនាងជុំវិញបញ្ហាអតីតកាលរបស់នាង៕ ប្រភព៖ Korea Times