ខេត្តបាត់ដំបង ៖ ទីក្រុងបាត់ដំបងតែងទទួលបានជ័យលាភីស្ទើរគ្រប់វិញ្ញាសារ មិនថាការប្រកូតប្រជែងថ្នាក់តំបន់ ថ្នាក់ជាតិ ឬក្នុងប្រទេសអាស៊ានទាំង១០ឡើយ គឺធ្លាប់ទទួលបានជ័យលាភីផ្ការំដួល០៣ទង ជាប់ឈ្មោះជាទីក្រុងស្អាត ហើយកាន់តែអស្ចារ្យជាងនេះ គឺទីក្រុងបុរាណមួយនេះ ត្រូវដាក់បញ្ចូលឈ្មោះក្នុងបញ្ជី «បេតិកភ័ណ្ឌពិភពលោក»ទៀតផង ។
ប៉ុន្តែពេលនេះ ទីក្រុងស្អាតមួយនេះ បែរជារងការរិះគន់យ៉ាងពេញទំហឹងពីភ្ញៀវទេសចរជាតិ ឬអន្តរជាតិថា ជា«ទីក្រុងដែលគ្មានសណ្តាប់ធ្នាប់ទៅវិញ» បណ្ដែតបណ្ដោយឲ្យមានអ្នកលក់ដូរពាសពេញថ្នល់ ស្ទើរតែរកផ្លូវឲ្យភ្ញៀវទេសចរដើរលេងកម្សាន្ត ឬដើរទស្សនាអគារបេតិកភណ្ឌមិនកើត ។ មន្ត្រីសណ្តាប់ធ្នាប់ក្រុងមិនគិតគូររៀបចំសណ្តាប់ គិតតែពីនាំគ្នាដើរប្រមូលលុយពីអ្នកលក់ដូរជាថ្នូរនឹងការបិទភ្នែកបិទមាត់ ។
បើតាមស្ដាប់មតិរិះគន់នានាស្ទើរស្រគៀរត្រចៀករាល់ថ្ងៃ តំបន់ដែលភ្ញៀវជាតិ ឬភ្ញៀវអន្តរជាតិតែងរិះគន់ខ្លាំងជាងគេ គឺនៅលើដងផ្លូវនានានៅក្នុងតំបន់ «អគារបេតិកភ័ណ្ឌ»។ ដូចជួរផ្លូវលេខ១ លេខ២ និង លេខ៣ ហើយនិងសណ្តាប់ធ្នាប់ជុំវិញផ្សារធំបាត់ដំបង(ផ្សារណាត់) ។ ជាពិសេស ការលក់ដូរគ្មានសណ្តាប់ធ្នាប់នៅលើដងផ្លូវលេខ១ ជួរមាត់ស្ទឹងសង្កែ ដែលស្ថិតចំកណ្ដាលបេះដូងក្រុងបាត់ដំបងតែម្ដង ដែលអាជ្ញាធរក្រុង ហាក់មិនអើពើសោះចំពោះការលក់ដូរគ្មានយ៉ាងអនាធិប
តេយ្យនេះ ។ ដោយឡែក បើនិយាយពីកម្លាំងនគរបាលសណ្តាប់ធ្នាប់នៃអធិការក្រុងបាត់ដំបងវិញ ត្រូវបានគេលើកយកមកនិយាយដើមពេញៗមាត់ថា មិនខ្វល់ខ្វាយ ឬទើសភ្នែកពីរឿងសណ្តាប់ធ្នាប់នៅកណ្ដាលក្រុងស្អាតនៅឡើយ ។
ផ្ទុយទៅវិញ មន្ត្រីសណ្តាប់ធ្នាប់នេះ គិតតែពីដើរប្រមូលសំណែនប្រចាំថ្ងៃពីតាមរទេះអូសម៉ូតូរ៉ឺម៉កកង់បី ឬ រថយន្ត ដែលមានលក់ផ្លែឈើ ឬលក់ដូរចំណីអាហារផ្សេងៗនៅតាមដងផ្លូវ ។ កាលពីល្ងាចថ្ងៃទី០៥ មីនា ស្ត្រីម្នាក់លក់ចំណីអាហារតាមរទេះអូសនៅលើជួរផ្លូវលេខ១បានព្រលយដូច្នេះថា «ក្នុងមួយល្ងាច ខ្ញុំត្រូវបង់ប្រាក់ចំនួន៣០០០រៀលឱ្យប៉ូលិសសណ្តាប់ធ្នាប់ក្រុង និង១០០០រៀលទៀតបង់ឱ្យផ្នែកអនាម័យ» ។ គាត់បានបញ្ជាក់ដែរថា «នៅថ្ងៃខ្លះ ខ្ញុំបង់ប្រាក់ឲ្យគេរួចហើយ ស្រាប់តែបន្តិចក្រោយមក បែរជាមានមន្ត្រីមុខផ្សេងមកដេញមិនឲ្យលក់ បើទោះជាយើងតវ៉ាក៏គេមិនឲ្យយើងលក់ដែរ» ។
ស្ត្រីរូបនេះបានបញ្ជាក់ផងដែរថា ប៉ុន្មានខែកន្លងមកនេះ គេមិនដែលដេញទេ ឲ្យតែបង់ប្រាក់ ដូច្នេះហើយទើបពេលនេះមានអ្នកលក់កើនឡើងនៅលើដងផ្លូវលេខ១ ។ បើតាមការពិនិត្យជាក់ស្ដែង បច្ចុប្បន្ននៅលើជួរផ្លូវលេខ១ ចាប់ពីចុងស្ពានសម្ដេចក្រឡាហោ ស ខេង ត្រើយខាងលិច រហូតដល់ខាងមុខផ្សារណាត់ គេសង្កេតឃើញមានអ្នកលក់ដូរចំណីអាហារតាមរទេះ អ្នកលក់សម្ភារក្មេងលេង និងអ្នកលក់ផ្លែឈើតាមរថយន្ត បានចតត្រៀបត្រាលើចំណីផ្លូវ ។ អ្នកលក់ខ្លះចំណីអាហារ ខ្លះមានរៀបតុ លើដងផ្លូវលើចំណីផ្លូវ ធ្វើឲ្យភ្ញៀវទេសចរជួបការលំបាកក្នុងការធ្វើដំណើរកម្សាន្ត ។
ជុំវិញបញ្ហានេះ ប្រធានមន្ទីរទេសចរណ៍ខេត្ត លោក អ៊ុច អ៊ុំភីនីស្សារ៉ា បានថ្លែងប្រាប់កោះសន្តិភាពថា លោកក៏តែងទទួលរងនូវការរិះគន់អំពីបញ្ហាសណ្តាប់ធ្នាប់នេះពីភ្ញៀវទេសចរ ។ ហើយលោកក៏យល់ឃើញពីភាពគ្មានសណ្តាប់ធ្នាប់នៅតាមដងផ្លូវនានាក្នុងក្រុងបាត់ដំបងនេះដែរ ដែលបង្កឡើងដោយអ្នកលក់ដូរ ។
លោក ភីនីស្សារ៉ា បាននិយាយថា មួយរយៈចុងក្រោយនេះ អ្នកលក់ចំណីអាហារ លក់ផ្លែឈើតាមរថយន្ត និងអ្នកលក់ដូរផ្សេងៗនៅលើដងផ្លូវក្នុងក្រុងកាន់តែបង្កភាពរញ៉េរញ៉ៃ គ្មានសណ្តាប់ធ្នាប់ ដែលធ្វើឲ្យប៉ះពាល់យ៉ាងខ្លាំងដល់កេរ្តិ៍ឈ្មោះ ទីក្រុងស្អាត ទីក្រុងបេតិកភ័ណ្ឌ ឬកិត្តិយលខេត្តបាត់ដំបង ទាំងមូល និង ប៉ះពាល់ដល់ដំណើរទេសចរណ៍របស់ភ្ញៀវទេសចរជាតិ និងភ្ញៀវអន្តរជាតិ ដែលដើរកម្សាន្ត ឬដើរទស្សនាអគារបេតិកភណ្ឌនៅក្នុងក្រុង ។
លោកប្រធានមន្ទីរទេសចរណ៍រូបនេះបានកត់សម្គាល់ថា បើពិនិត្យលើទិដ្ឋភាពគ្មានសណ្តាប់ធ្នាប់នេះ គឺ ទើសភ្នែកជាងគេនៅជួរផ្លូវលេខ១ ជាប់មាត់ស្ទឹងតែម្ដង ដែលមានអ្នកលក់កាន់តែច្រើនឡើងៗ រហូតអ្នកដំណើរ ឬភ្ញៀវទេសចររកកន្លែងចតរថយន្តមិនកើត មានតែកន្លែងអ្នកលក់ដូរ ។
ស្ថិតក្នុងស្ថានភាពរញ៉េរញ៉ៃបែបនេះ លោក ភីនីស្សារ៉ា បានលើកឡើងថា ពេលនេះ យើងកំពុងប្រជុំពិភាក្សាជាមួយគណៈបញ្ជាការកងឯកភាពខេត្ត ដែលនិយាយអំពីការរៀបចំទីក្រុងស្អាត ដើម្បីចូលរួមប្រកួតប្រជែងនៅថ្ងៃខាងមុខ ។
ហើយកាលពីថ្ងៃទី០៥ មីនា លោកបានលើកយកបញ្ហានេះជូនអង្គប្រជុំគណៈបញ្ជាការនេះរួចហើយដែរ ដើម្បីស្នើឲ្យមានការចូលរួមដោះស្រាយអំពីបញ្ហាសណ្តាប់ធ្នាប់នេះ ។ លោកបាននិយាយថា ខាងមន្ទីររបស់លោក ពុំមានសិទ្ធិបញ្ជាទៅសាលាក្រុងទេអំពីរឿងនេះ ។ ប៉ុន្តែលោកសំណូមពរសុំឲ្យមានគិតគួចំពោះបញ្ហារញ៉េរញ៉ៃគ្មានរបៀបរបបនេះ ដើម្បីរៀបចំឲ្យមានសណ្តាប់ធ្នាប់នៅក្នុងក្រុងដែលជាតំបន់ស្នូលនៃវិស័យទេសចរណ៍ក្នុងខេត្តបាត់ដំបង ។
ឆ្លើយតបនឹងការលើកឡើងនេះរបស់ប្រធានមន្ទីរទេសចរណ៍ខេត្ត និងមតិរិះគន់ពីភ្ញៀវទេសចរ ពាក់ព័ន្ធនឹងការលក់ដូរគ្មានសណ្តាប់ធ្នាប់នៅក្នុងក្រុងបាត់ដំបង លោកលាង វាសនា អភិបាល
ក្រុងបុរាណមួយនេះ ហាក់ទទួលស្គាល់ថា ពិតជាមានការលក់ដូរតាមដងផ្លូវយ៉ាងរញ៉េរញ៉ៃ គ្មានសណ្តាប់ធ្នាប់មួយរយៈចុងក្រោយនេះ ។ ប៉ុន្តែលោកអភិបាលក្រុងបានពន្យល់ថា សព្វថ្ងៃនេះ លោក និងក្រុមការងារ បាននិងកំពុងធ្វើការងារ រៀបចំសណ្តាប់នេះយ៉ាងមមារញឹកបំផុត ។
លោកបានលើកឡើងដូច្នេះថា «ពេលនេះ ខ្ញុំកំពុងរៀបចំសណ្តាប់ធ្នាប់នេះឲ្យស្អាតសិន នៅម្ដុំរង្វង់មូល វិមានឯករាជ្យ ហើយនឹងធ្វើបន្តទៅជួរផ្លូវលេខ១ និងតាមដងផ្លូវដទៃទៀតនៅក្នុងក្រុងទាំងមូល» ។ នៅពេលសួរនាំពីរឿងមន្ត្រីនគរបាលសណ្តាប់ធ្នាប់ដើរប្រមូលលុយពីអ្នកលក់ដូរលើដងផ្លូវ លោកអភិបាលក្រុងហាក់មិនពន្យល់ក្បោះក្បាយទេ តែលោកហាក់ទទួលស្កាល់ថា ជារឿងចៀសមិនផុត ដែលអាចមានខ្លះៗហើយ ។
ចំពោះបញ្ហាសណ្តាប់ធ្នាប់ដែលកំពុងបង្កភាពរញ៉េរញ៉ៃពាសពេញលើដងផ្លូវនានា នៅក្នុងទីក្រុងបាត់ដំបង ឬទីក្រុងបេតិកភណ្ឌមួយនេះ បើតាមលោកលាង វាសនា បានព្រមានដដែលៗថា លោកនឹងចាត់វិធានក្ដៅ និងអាចឈានដល់អនុវត្តតាមផ្លូវច្បាប់ចំពោះអ្នកលក់ដូរទាំងឡាយណា ដែលមិនព្រមស្ដាប់បង្គាប់តាមការណែនាំរបស់សាលាក្រុង ហើយនៅតែបន្តលក់ដូរលើដងផ្លូវ បង្កឲ្យប៉ះពាល់ដល់សណ្ដាប់ធ្នាប់សាធារណៈ ។
យ៉ាងណាក្ដី មហារជនក៏ដូចភ្ញៀវទេសចរជាតិនិងអន្តរជាតិរំពឹងថា តាមរយៈការប្ដេជ្ញាចិត្តរបស់លោកអភិបាលក្រុងខាងលើនេះ ទីក្រុងបាត់ដំបង និងក្លាយជាទីក្រុងស្អាតល្អដាច់គេនាពេលដ៏ខ្លីខាងមុខនេះ មិនមែនជាទីក្រុងដែលគ្មានសណ្តាប់ធ្នាប់ ដូចមតិរិះគន់បានលើកឡើងក្នុងពេលនេះទៀតទេ ៕
ចែករំលែកព័តមាននេះ