ប៊ី សុធារី ចំណាយពេលជាង១០ថ្ងៃដោយមិនសម្រាក មុនគ្រងមកុដ Miss Grand កំពង់ឆ្នាំង
- ភ្នំពេញ
រាជធានីភ្នំពេញ ៖ នៅទីបំផុត អតីត Miss Universe Cambodia ២០១៧ កញ្ញា ប៊ី សុធារី បានគ្រងម្កុដ
រាជធានីភ្នំពេញ ៖ នៅទីបំផុត អតីត Miss Universe Cambodia ២០១៧ កញ្ញា ប៊ី សុធារី បានគ្រងមកុដ Miss Grand Kampong Chhnang ដូចបំណងហើយ បន្ទាប់ពីការតស៊ូប្រកួតយ៉ាងស្វិតស្វាញជាមួយបេក្ខនារីជាច្រើនរូបនៅក្នុងវគ្គផ្តាច់ព្រ័តដែលបានធ្វើឡើងកាលពីថ្ងៃទី១០ ខែកុម្ភៈ ឆ្នាំ២០២៤ ។
ជ័យជំនះនាពេលនេះ ត្រូវបាន ប៊ី សុធារី ចាត់ទុកជាការចាប់ផ្តើមថ្មីមួយទៀតរបស់ខ្លួន នៅក្នុងដំណើរលើវិថីប្រកួតប្រជែងលើផ្នែកសម្រស់ ក្នុងពេលដែលនាងបានចំណាយពេលប្រមាណជាង១០ថ្ងៃដោយមិនសូវបានសម្រាក មុនពេលដែលនាងអាចមានឱកាសគ្រងម្កុដនាពេលនេះ ។
បន្ទាប់ពីកម្មវិធីបានបិទបញ្ចប់ជាមួយនឹងភាពជោគជ័យនៅក្នុងការគ្រងម្កុដនាពេលនេះ ប៊ី សុធារី បានបង្ហោះសារលើបណ្តាញសង្គមរបស់ខ្លួនថា មិនមែនជាកាបញ្ចប់ តែជាការចាប់ផ្ដើមថ្មីមួយទៀត រយៈពេល១៧ថ្ងៃពេញដែលនាងខ្ញុំមិនបានសម្រាក ដើម្បីកម្មវិធីប្រកួតមួយនេះ ។
នាងបញ្ជាក់ថា ទីបំផុតការខិតខំមួយនេះទទួលបានការតបស្នងវិញហើយ នាងខ្ញុំ ប៊ី សុធារី Miss Grand Kampong Chhnang 2024 សូមអរគុណទៅបងស្រី @kateis.11 ដែលជា PD នៃកម្មវិធីមួយនេះ ដែលបានខិតខំប្រឹងប្រែងរៀបចំកម្មវិធីមួយនេះអោយបានល្អ និងបានមើលថែពួកយើងទាំង១២រូបបានយ៉ាងល្អមិនថាខ្លួនឯងហត់ឈឺជាយ៉ាងណានោះទេ ។
នាងក៏សូមអរគុណទៅក្រុមការងារមួយចំនួនដែលបានបង្ហាញបង្ហាត់បង្រៀនពួកយើងទាំង១២រូប អរគុណដល់ក្រុមការងារទាំងអស់ដែលនៅពីក្រោយរូបភាពស្អាតៗ និងកម្មវិធីទាំងមូលយប់មិញនេះ ហើយក៏សូមអរគុណដល់អ្នកឧបត្ថមកម្មវិធីយើងទាំងអស់ដែលបានជួយអោយកម្មវិធីយើងដំណើរការទៅមុខបានយ៉ាងល្អបែបនេះ ។
ជាចុងក្រោយនាងខ្ញុំសូមអរគុណទៅដល់បណ្ដាលអ្នកគាំទ្ររូបនាងខ្ញុំទាំងអស់សម្រាប់ការស្រលាញ់ និងគាំទ្រដល់រូបនាងខ្ញុំ អ្នកទាំងអស់គ្នាគឺជាកំលាំងចិត្តដល់ធំសម្រាប់នាងខ្ញុំ ។
ជាការកត់សម្គាល់ មុនពេលចូលរួមប្រកួត និងគ្រងម្កុដ Miss Grand កំពង់ឆ្នាំងនាពេលនេះ ប៊ី សុធារី បានលើកឡើងតាមរយះបណ្តាញសង្គមថា«ឆ្នាំ 2024 នេះ សុំចូលរួមប្រកួតម្ដងទៀត។ ព្រោះពេលនេះ ប៊ី សុធារី មានឆន្ទៈ ខ្ពស់ និង មិនមែនជា ប៊ី សុធារី ដែលអ្នកគ្រប់គ្នាធ្លាប់ស្គាល់ពីមុនទៀតទេ។
នាងបញ្ជាក់ថា នាងខ្ញុំនឹងវិលត្រលប់មកវិញ ជាមួយនឹងគ្រប់យ៉ាងថ្មី ជាមួយមេរៀនដែលធ្លាប់ឆ្លងកាត់ ពេលនេះនាងខ្ញុំសុំកំលាំងចិត្តពីប្រជាជនកម្ពុជាគ្រប់រូប និងឱកាសពីគណៈកម្មការ អោយនាងខ្ញុំប្រើកម្លាំង និងបទពិសោធន៍គ្រប់យ៉ាងដើម្បីសម្រេចគោលដៅរួមគ្នា ជាមួយកម្ពុជាយើង។
កម្មវិធីលើកនេះ ជាកម្មវិធីដែល ប៊ី សុធារី ត្រលប់មកវិញ ជាមួយរឿងថ្មីគ្រប់យ៉ាង និងជាកម្មវិធីប្រកួតប្រជែងចុងក្រោយក្នុងវិស័យ Beauty Pageant ។ ដូច្នេះនាងខ្ញុំសង្ឃឹមថាបងប្អូនទាំងអស់គ្នានឹងនៅតែស្រលាញ់ និងបន្តគ្រាំទ្រដល់រូបនាងខ្ញុំ សូមអរគុណ» ។
គួរបញ្ជាក់ថាក្រោយគ្រងម្កុដនាពេលនេះ ប៊ី សុធារី នឹងត្រូវចូលរួមប្រកួតប្រជែងជាមួយបេក្ខនារីដែលពពេញដោយទេពកោសល្យ និងរូបសម្រស់ជាច្រើនរូបនៅក្នុងកម្មវិធីMiss Grand Cambodia ២០២៤ ដែលគ្រោងនឹងរៀបចំធ្វើឡើងនៅក្នុងពេលខាងមុខនេះ ៕
ចែករំលែកព័តមាននេះ