រាជធានីភ្នំពេញ ៖ មហាជនទូទៅពិតជាមិនស្គាល់កញ្ញាខេង ស្រីលក្ខណ៍ ទេ ប៉ុន្តែសម្រាប់អ្នករស់នៅក្នុងខេត្តកំពង់ចាម ក្នុងស្រុកក្រូចឆ្មារពិតជាស្គាល់នាងយ៉ាងច្បាស់ ព្រោះនាងគឺជាអ្នកចម្រៀងមួយរូបប្រចាំក្រុមតន្ត្រីខេត្តកំពង់ចាម ដែលបានកសាងកេរិ៍្តឈ្មោះតាមរយៈទឹកដមសំនៀងដ៏ពីរោះសម្រាប់ពិធីមង្គលការ ។ នៅឆ្នាំ២០០៤ ស្រីលក្ខណ៍បានមករស់នៅទីក្រុងភ្នំពេញចាប់អាជីពជាអ្នកចម្រៀងនៅតាមភោជនីយដ្ឋាន និងថតសំឡេងចូលស៊ីឌីឱ្យផលិតកម្មក្រៅប្រទេសមួយចំនួន ។
ក្រៅពីច្រៀងនៅតាមភោជនីយដ្ឋាន ម្តងម្កាលនាងឡើងច្រៀងក្នុងកម្មវិធីប្រគំតន្ត្រីតាមស្ថានីយទូរទស្សន៍មួយចំនួន ។ ការចាប់អាជីពជាអ្នកចម្រៀង និងសម្តែងកាយវិការខារ៉ាអូខេពីមួយថ្ងៃទៅមួយថ្ងៃ នាងមានការរីកចំរើនទៅមុខជានិច្ច ជាក់ស្តែងក្នុងឆ្នាំ២០១១ នេះនាងបានបើកផលិតកម្មខ្លួនឯងមួយសម្រាប់ផលិតបទចម្រៀង និងខារ៉ាអូខេ ហើយថែមទាំងមានគម្រោងថតភាពយន្តទៀតផង ។
ស្រីលក្ខណ៍ ឱ្យដឹងថា ផលិតកម្មនាងបានចេញថតខារ៉ាអូខបានមួយវ៉ុលហើយ ហើយកំពុងត្រៀមចេញថតមួយវ៉ុលថ្មីទៀត។ នាងក៏ជាម្ចាស់ហាងអ៊ុតសក់មួយក្នុងរាជធានីភ្នំពេញផងដែរ ។ ក្នុងវ័យ២៩ឆ្នាំ ស្រីលក្ខណ៍និយាយថា «នាងខ្ញុំអាយុកាន់តែច្រើន សម្ផស្សកាន់តែចាស់ តែមិនទាន់គិតរឿងស្នេហាទេ ដោយជាប់រវល់ការងាររកស៊ីមមាញឹកពេក ក៏ភ្លេចរឿងស្នេហា ។ តែនាងខ្ញុំកំណត់ថា នៅឆ្នាំ ២០១២ នឹងគិតគូរបើកបេះដូងរកគូស្រករហើយ»។
កញ្ញាខេង ស្រីលក្ខណ៍មានស្រុកកំណើតនៅស្រុកក្រូចឆ្មារ ខេត្តកំពង់ចាម ។ នាងមានបងប្អូន៦នាក់ ក្នុងនោះប្រុស៣នាក់ ចំណែករូបនាងជាកូនពៅ ។ នាងតាំងចិត្តថា នឹងខិតខំធ្វើយ៉ាងណាឱ្យផលិតកម្មរបស់នាងល្បីឈ្មោះនៅក្នុងពិភពសិល្បៈដូចផលិតកម្មផ្សេងៗដែរ ៕
ចែករំលែកព័តមាននេះ