បើទោះបីជាមិនទទួលបានជ័យជម្នះ នៅក្នុងការគ្រងមកុដ «Miss Global 2023» ក៏ដោយ ប៉ុន្តែ «Miss Global Cambodia» នាង លក្ខណ៍ មុនីអានីតា បានបង្ហាញមោទនភាពចំពោះខ្លួនឯង ចំពោះការសម្រេចបានភាពជោគជ័យចំនួន២ សម្រាប់ប្រទេសកម្ពុជា
រាជធានីភ្នំពេញ ៖ បើទោះបីជាមិនទទួលបានជ័យជម្នះ នៅក្នុងការគ្រងមកុដ «Miss Global 2023» ក៏ដោយ ប៉ុន្តែ «Miss Global Cambodia» នាង លក្ខណ៍ មុនីអានីតា បានបង្ហាញមោទនភាពចំពោះខ្លួនឯង ចំពោះការសម្រេចបានភាពជោគជ័យចំនួន២ សម្រាប់ប្រទេសកម្ពុជា នៅក្នុងការចូលរួមប្រកួតនៅលើឆាកជាលក្ខណៈអន្តរជាតិនាពេលនេះ ។
រឿងចំនួន២ ដែលនាងបានធ្វើសម្រាប់ប្រជាជាតិកម្ពុជានោះ គឺទី១- នាងបានឱកាសតំណាងឱ្យព្រះរាជាណាចក្រកម្ពុជា ដ៏អស្ចារ្យមួយនេះ និងជោគជ័យដ៏ធំទី២- នោះ គឺនាងបាននាំយក Top 13 មកជូនប្រជាជាតិកម្ពុជា។
ស្រីស្អាត លក្ខណ៍ មុនីអានីតា បានបង្ហោះសារនៅលើបណ្តាញសង្គមថា «សម្រាប់ប្រជាជាតិកម្ពុជានៃខ្ញុំ នេះ ខ្ញុំបានខិតខំអស់ពីសមត្ថភាពហើយ ជោគជ័យទី១ របស់រូបនាងខ្ញុំ គឺបានតំណាងឱ្យព្រះរាជាណាចក្រកម្ពុជាដ៏អស្ចារ្យមួយនេះ ហើយជោគជ័យដ៏ធំទី២ របស់រូបនាងខ្ញុំ គឺបាននាំយក Top 13 មកជូនប្រជាជាតិកម្ពុជារបស់ខ្ញុំវិញ»។
នាងបញ្ជាក់ថា «ឈរតំណាងឱ្យប្រទេសកម្ពុជា ជាមួយនឹងបណ្ដាប្រទេសអន្តរជាតិផ្សេងទៀត ៨០ប្រទេស ជោគជ័យមួយនេះ គឺពិតជាធំធេងណាស់សម្រាប់រូបនាងខ្ញុំ និងសម្រាប់អ្នកគាំទ្រទាំងអស់គ្នានៃខ្ញុំ ។ នាងខ្ញុំ សូមអរគុណដល់លោកពូ In Sophin ដែលបានផ្ដល់ឱកាសដ៏ធំធេងមួយនេះ សម្រាប់រូបនាងខ្ញុំ នឹងអាចទទួលស្វាគមន៍កម្មវិធីលំដាប់អន្តរជាតិមួយនេះ ជាម្ចាស់ផ្ទះដ៏អស្ចារ្យសម្រាប់ឆ្នាំ២០២៣/២០៣៤ នេះ អរគុណដល់ក្រុមការងារគ្រប់ជាន់ថ្នាក់ទាំងអស់ សម្រាប់ការយកចិត្តទុកដាក់មកលើនាងខ្ញុំ នឹងបេក្ខភាពយើងទាំងអស់ ដោយអស់ពីចិត្ត»។
នាងបញ្ជាក់ទៀតថា « ជាចុងក្រោយ នាងខ្ញុំសូមអរគុណដល់កម្លាំងចិត្តយ៉ាងធំធេងពីបណ្ដាអ្នកគាំទ្រ និងប្រជាជនកម្ពុជាទាំងអស់ ដែលផ្តល់សំឡេងគាំទ្រ ផ្ដល់ភាពកក់ក្ដៅយ៉ាងខ្លាំងមកកាន់នាងខ្ញុំ ជាការគាំទ្រមួយដែលនាងខ្ញុំមិនអាចបំភ្លេចបាននៅក្នុងជីវិតមួយនេះ នាងខ្ញុំមានមោទនភាពជាខ្លាំងដែលធ្លាប់ជាបវរកញ្ញាតំណាងឱ្យកម្ពុជា ហើយនឹងមានមោទនភាពជាខ្លាំងដែលមានអ្នកទាំងអស់គ្នាជាអ្នកគាំទ្រផងដែរ»។
គួរបញ្ជាក់ផងដែរថា «Miss Global 2023» ដែលធ្វើឡើងនៅក្នុងប្រទេសកម្ពុជា និងប្រទេសវៀតណាម បានបិទបញ្ចប់កាលពីរាត្រីថ្ងៃទី១៨ ខែមករា ឆ្នាំ២០២៤ ម្សិលម៉ិញនេះ ដោយក្នុងនោះម្ចាស់មកុដបានទៅលើបេក្ខនារី មកពីប្រទេស Puerto Rico មានឈ្មោះថា «Ahsley Melendez» ។ ដោយឡែកសម្រាប់លំដាប់រងទី១ បានទៅលើបេក្ខនារីមកពីប្រទេស Samo, លំដាប់រងទី២ បានទៅលើបេក្ខនារីប្រទេសថៃ, លំដាប់រងទី៣ បានទៅលើបេក្ខនារីប្រទេសហ្វីលីពីន និងលំដាប់រងទី៤ បានទៅលើបេក្ខនារីមកពីប្រទេសវៀតណាម ៕
ចែករំលែកព័តមាននេះ