ស្លុ.តចិត្ត! តារាសម្តែងកំពូលសម្រស់ហុងកុងម្នាក់ស្លា.ប់ សង្ស័យមូលហេតុមួយ
ហុងកុង ៖ តារាសម្ដែងហុងកុង និងជាម្ចាស់ជ័យលាភីរងជើងឯកការប្រកួតបវរកញ្ញាអាស៊ីឆ្នាំ ១៩៩៥
ហុងកុង ៖ តារាសម្ដែងហុងកុង និងជាម្ចាស់ជ័យលាភីរងជើងឯកការប្រកួតបវរកញ្ញាអាស៊ីឆ្នាំ ១៩៩៥ លោកស្រី Bonnie Lai ដែលជាអតីតភរិយារបស់តារាក្បាច់គុន និងតារាសម្ដែង លោក Ken Low បានស្លាប់បាត់បង់ជីវិតក្នុងអាយុ៤៦ឆ្នាំ ដោយសង្ស័យថាធ្វើអត្តឃា.ត។
យោងតាមប្រព័ន្ធផ្សព្វផ្សាយហុងកុងបានរាយការណ៍ថា លោកស្រី Bonnie Lai ត្រូវបានប្រទះឃើញសន្លប់នៅក្នុងផ្ទះល្វែងរបស់លោកស្រីនៅតំបន់ North Point ភាគខាងកើតនៃទីក្រុងហុងកុង ដោយស្វាមីបច្ចុប្បន្នលោកស្រី ដែលជាវេជ្ជបណ្ឌិតកែសម្ផស្សគឺ លោក Angus Hui នៅម៉ោងប្រហែល១រសៀល ថ្ងៃទី២៦ ខែធ្នូ កន្លងទៅ។ ប៉ូលិសកំពុងស៊ើបអង្កេតករណីនេះ ដោយសង្ស័យការធ្វើអត្តឃា.ត។
ប្រព័ន្ធផ្សព្វផ្សាយហុងកុងបានរាយការណ៍ថា លោកស្រី Bonnie Lai មានជំងឺធ្លាក់ទឹកចិត្តអស់រយៈពេលប្រហែល២០ឆ្នាំមកហើយ ហើយទទួលបានការព្យាបាលជាប្រចាំ។ ជារឿយៗ លោកស្រីតែងបង្ហោះវីដេអូខ្លីៗនៃជីវិតប្រចាំថៃ្ងលើបណ្តាញសង្គម ហើយកាលពីថ្ងៃទី២៥ ខែធ្នូ កន្លងទៅ លោកស្រីទើបតែបានចែករំលែករូបនៃពិធីជប់លៀងជាមួយមិត្តភក្តិ និងក្រុមគ្រួសារយ៉ាងសប្បាយរីករាយលើបណ្តាញសង្គមផងដែរ។
ទោះយ៉ាងណាក៏ដោយ លោកវេជ្ជបណ្ឌិត Angus Hui ដែលត្រូវជាស្វាមីបានទទួលសារ WhatsApp ពីភរិយារបស់លោកនៅព្រឹកថ្ងៃទី២៦ ខែធ្នូ ដោយសរសេរ «ជួបគ្នាជាតិក្រោយ» ភ្លាមៗនោះ លោក Hui បានប្រញាប់ធ្វើដំណើរទៅផ្ទះ ហើយបានឃើញប្រពន្ធសន្លប់បាត់ទៅហើយ។ ការស្លាប់របស់លោកស្រី Angus Hui ត្រូវបានប្រកាសដោយលោក Ken Low អាយុ៦៤ឆ្នាំ នៅពេលគាត់ត្រូវបានប្រព័ន្ធផ្សព្វផ្សាយហុងកុងទាក់ទងចង់ដឹងការពិត។ លោក Ken Low គឺជាអតីតសមាជិកក្រុមវាយប្រយុទ្ធរបស់កំពូលតារាសម្តែងហុងកុង លោក Jackie Chan បានថ្លែងថា លោកបាននិយាយគ្នាចុងក្រោយជាមួយនឹងលោកស្រី Lai តាមទូរស័ព្ទកាលពី២សប្តាហ៍មុន។
សូមជម្រាបថា លោកស្រី Bonnie Lai បានប្រឡូកក្នុងវិស័យសិល្បៈបន្ទាប់ពីចូលរួមក្នុងការប្រកួតបវរកញ្ញាអាស៊ីក្នុងឆ្នាំ ១៩៩៥ ដោយបានបញ្ចប់ក្នុងនាមរងជើងឯកបន្ទាប់ពីលោកស្រី Kristy Yang ឈ្នះជើងឯក។ លោកស្រី Lai បានបង្ហាញខ្លួនជាលើកដំបូងក្នុងខ្សែភាពយន្តហុងកុងរឿង Young And Dangerous 3 ឆ្នាំ ២៩៩៦ និងបន្តលេខវត្តមានក្នុងខ្សែភាពយន្តភ័យរន្ធត់ Bio-Zombie ឆាំ្ន១៩៩៨ ។
លោកស្រី Bonnie Lai បានរៀបការជាមួយលោក Ken Low ក្នុងឆ្នាំ ១៩៩៨ ដោយមានកូនប្រុសពីរនាក់។ ប្តីប្រពន្ធ១គូនេះបានលែងលះគ្នានៅឆ្នាំ ២០០៦ ដោយលោក Low បានសិទ្ធិថែទាំកូន។ លោកស្រី Bonnie Lai បានឃ្លាតចេញពីអាជីពសិល្បៈ បន្ទាប់ពីរៀបការជាមួយលោកវេជ្ជបណ្ឌិត Angus Hui ក្នុងឆ្នាំ ២០០៧ ហើយពួកគេមានកូនប្រុសពីរនាក់ ប៉ុន្តែចំណងអាពាហ៍ពិពាហ៍អ្នកទាំងពីរត្រូវបានរាយការណ៍ថា រកាំរកូសក្នុងរយៈពេល១០ឆ្នាំចុងក្រោយនេះ។
ប៉ុន្មានឆ្នាំចុងក្រោយនេះ លោកស្រី Bonnie Lai បានចែករំលែករូបគ្រួសារជាញឹកញាប់លើបណ្តាញសង្គម ប៉ុន្តែមិនបានបង្ហោះរូបភាពណាមួយជាមួយស្វាមីនោះទេ។ រូបចុងក្រោយរបស់ទាំងពីរជាមួយគ្នាត្រូវបានបង្ហោះក្នុងថ្ងៃខួបកំណើតរបស់លោកស្រីកាលពីខែកក្កដា ឆ្នាំ ២០២២ កន្លងទៅ។
លោកស្រី Bonnie Lai បានត្រឡប់មកសម្ដែងវិញនៅឆ្នាំ ២០២៣ ដោយបានបង្ហាញខ្លួនជាតួសម្តែងនៅក្នុងរឿងភាគច្បាប់ហុងកុង Legal Affair ។ លោកស្រីត្រូវបានរាយការណ៍ថា បានបើកហាងលក់គ្រឿងអលង្ការមួយកន្លែងក្នុងខែមិថុនាកន្លងទៅ ហើយបានប្រកាសលើបណ្តាញសង្គមមួយខែក្រោយមកថា លោកស្រីបានបញ្ចប់វគ្គសិក្សាជំនាញផ្នែកត្បូងពណ៌ថែមទៀតផង៕ (ប្រភព ៖ The Straits Times)
ចែករំលែកព័តមាននេះ