រាជធានីភ្នំពេញ ៖ លោកលឹម រដ្ឋា តារាសម្តែងកាយវិការខារ៉ាអូខេ និងជាតារាភាពយន្តថ្មីទើបរះឡើងកាលពីឆ្នាំ២០០៧។ ទោះបីជាមិនទាន់មានកេរ្តិ៍ឈ្មោះល្បី តែភាពលេចធ្លោខាងទេពកោសល្យសម្តែង ជាមួយបទពិសោធន៍ដ៏សំបូរបែបរយៈពេលជាង៤ឆ្នាំមកនេះ លោកបានចូលរួមសម្តែងកាយវិការខារ៉ាអូខេឱ្យផលិតកម្មទាំងក្នុង និងក្រៅប្រទេសជាច្រើន មិនតែប៉ុណ្ណោះបានចូលរួមសម្តែងក្នុងខ្សែភាពយន្តប្រមាណជាង១០រឿងហើយ ក្នុងនោះលោកមានកិត្តិយសចូលរួមសម្តែងថ្វាយព្រះមហាក្សត្របានជាច្រើនរឿង ដូចជារឿងលាហើយបូកគោ ជាដើម។
លោកទទួលបានការកោតសរសើរពីព្រះមហាក្សត្រ ហើយព្រះអង្គប្រទានមេដាយប្រាក់ និងមេដាយមាសអមដោយគ្រឿងឥស្សរិយយសទៀតផង។ តារាវ័យ២៨ឆ្នាំរូបនេះនិយាយថា ក្នុងនាមលោកជាតារាសម្តែងទោះបីមិនទាន់មានកេរ្តិ៍ឈ្មោះល្បីក្នុងពិភពសិល្បៈយ៉ាងណាក៏ដោយ ក៏លោកមានចិត្តសប្បាយរីករាយ និងមោទនភាពយ៉ាងខ្លាំងដោយបានចូលរួមសម្តែងភាពយន្តថ្វាយព្រះមហាក្សត្រ។ សព្វថ្ងៃក្រៅពីសម្តែងកាយវិការខារ៉ាអូខេ លោកបានចូលរួមសម្តែងជាតួមេទ័ពក្នុងខ្សែភាពយន្តភាគប្រវត្តិសាស្ត្ររឿង ឧកញ៉ារាមរាជតេជោយ៉ត ។ តាមរយៈការសម្តែងកាយវិការខារ៉ាអូខេ និងភាពយន្តកន្លងមកតាមរយៈរឿងចៅចាក់ស្មុគ រឿងព្រៃអាគម និងរឿងលាហើយបូកគោ ជាដើមដែលចាក់បញ្ចាំងនៅតាមរោងភាពយន្ត និងតាមកញ្ចក់ទូរទស្សន៍នោះប្រិយមិត្តទស្សនិកជនពិតជាបានឃើញទេពកោសល្យសម្តែងដ៏ល្អរបស់លោក ហើយពេញចិត្តជាក់ជាមិនខានឡើយ។ លោកលឹម រដ្ឋា មានស្រុកកំណើតនៅស្រុកកំពង់ត្របែក ខេត្តព្រៃវែង។ លោកមានបងប្អូន៨នាក់ ក្នុងនោះស្រី៥នាក់ ចំណែករូបលោកជា កូនពៅ ។
លោករដ្ឋាបានមកបន្តការសិក្សានៅភ្នំពេញនាឆ្នាំ២០០០ ហើយបានចូលប្រឡូកក្នុងវិស័យសិល្បៈសម្តែងនៅឆ្នាំ២០០៧។ តារាថ្មីរូបនេះថ្លែងថា «សព្វថ្ងៃខ្ញុំមានចិត្តសប្បាយរីករាយខ្លាំងណាស់ ព្រោះបានក្លាយជាអ្នកសិល្បៈដែលប្រិយមិត្តទស្សនិកជនទទួលស្គាល់ ជាពិសេសបានព្រះមហាក្សត្រផ្តល់កិត្តិយសឱ្យខ្ញុំទៀតផង» ៕
ចែករំលែកព័តមាននេះ