ផលិតករប្រចាំផលិតកម្មហង្សមាស លោក អេកូ វ៉ាក់សង បានចេញមុខបញ្ជាក់មូលហេតុនៃការបាត់មុខពីវិស័យសិល្បៈរបស់តារាចម្រៀង សុខ ស្រីនាង ដែលកំពុងតែក្លាយជាចម្ងល់ពីសំណាក់ទស្សនិកជន ហើយក៏មានការចុះផ្សាយជាបន្តបន្ទាប់
រាជធានីភ្នំពេញ ៖ ផលិតករប្រចាំផលិតកម្មហង្សមាស លោក អេកូ វ៉ាក់សង បានចេញមុខបញ្ជាក់មូលហេតុនៃការបាត់មុខពីវិស័យសិល្បៈរបស់តារាចម្រៀង សុខ ស្រីនាង ដែលកំពុងតែក្លាយជាចម្ងល់ពីសំណាក់ទស្សនិកជន ហើយក៏មានការចុះផ្សាយជាបន្តបន្ទាប់ពីបណ្តាសារព័ត៌មាននៅក្នុងស្រុកនានាផងដែរ និងលើកឡើងពីការបាត់មុខរបស់តារាចម្រៀងស្រីរូបនេះ ដោយមិនមានមូលហេតុ ។
យ៉ាងណា ផលិតកររូបនេះបានទទួលស្គាល់ថា តារាចម្រៀងនាង សុខ ស្រីនាង ពិតជាបានដកឃ្លាពីវិស័យសិល្បៈពិតប្រាកដមែនក្នុងរយៈពេលចុងក្រោយនេះ ដោយសារតែនាងជាប់ដៃធ្វើជំនួញផ្ទាល់ខ្លួន ពោលគឺមិនមែនព្រោះតែនាងមានស្នេហាជាមួយបុរសរូបណាម្នាក់ ហើយបានហាមឃាត់នាងមិនឱ្យបន្តប្រឡូកក្នុងវិស័យសិល្បៈដូចការចុះផ្សាយព័ត៌មាននានានោះឡើយ។
តាមរយៈវីដេអូដែលបង្ហោះនៅលើបណ្តាញសង្គម លោក អេកូ វ៉ាក់សង បានលើកឡើងថា «មួយរយៈចុងក្រោយនេះ លោកបានឃើញសារព័ត៌មានជាច្រើនចុះផ្សាយពី សុខ ស្រីនាង ថា បានឈប់ពីសិល្បៈដោយសារទៅនេះទៅនោះ ឬមានអ្នកនេះ ឬមានអ្នកនោះជាដើម»។
លោកបញ្ជាក់ថា «តាមពិតការចុះផ្សាយនោះមិនមានប្រភពច្បាស់លាស់នោះឡើយ ពោលគឺអាចគ្រាន់តែជាការចុះផ្សាយឱ្យមានព័ត៌មានតែប៉ុណ្ណោះ»។ លោកថា «តាមពិត មុននឹងគាត់ (សុខ ស្រីនាង ) សម្រេចឈប់នោះ គាត់ក៏បានមកប្រាប់លោកដែរថា អ្នកផ្ទះគាត់ ចង់ឱ្យគាត់រកស៊ីជាង ព្រោះសិល្បៈពេលវ័យកាន់តែចាស់ យើងមិនមានអ្វីសម្រាប់ខ្លួនឯង ចឹងយើងត្រូវពង្រឹងមុខរបររកស៊ីសិន»។
លោកបន្តថា «ខ្ញុំតែងប្រាប់គាត់ជារឿយៗដែរថា ឱ្យនាងរើសតាមលទ្ធភាពទៅ បើមានពេលមកធ្វើ ហើយបើអត់ពេលវេលាគ្រប់គ្រាន់ក៏ធ្វើតិចៗទៅ តែកុំបោះបង់។ តែមួយរយៈចុងក្រោយនេះ គាត់ក៏មានការមមាញឹកខ្លាំងក្នុងការធ្វើជំនួញផ្ទាល់ខ្លួន គាត់ក៏សម្រេចចិត្តផ្អាកការងារសិល្បៈតែម្តង»។
ផលិតករ លោក អេកូ វ៉ាក់សង បានលើកឡើងបន្ថែមថា «បទចម្រៀងចុងក្រោយដែល សុខ ស្រីនាង បានថតនោះ គឺបទ «ស្នេហាខ្ញុំផ្លូវពីរ» ជាមួយតារាចម្រៀង ឱក សុគន្ធកញ្ញា។ ខណៈពេលលោកបានស្គាល់គ្នាជាមួយនឹង សុខ ស្រីនាង តាំងពីនៅថតរួមគ្នាក្នុងផលិតកម្មសាន់ដេមកម្ល៉េះ។ ហើយពេលដែលលោកផ្លាស់មកហង្សមាសនោះ លោកក៏ហៅនាងឱ្យមកទីនេះ ដើម្បីធ្វើការជាមួយគ្នាបន្តទៀត»។
លោកបញ្ជាក់ថា «កន្លងមក លោកបានឃើញមានព័ត៌មានខ្លះចុះផ្សាយថា សុខ ស្រីនាង មានស្នេហា ទើបបង្ខំឱ្យនាងឈប់ពីសិល្បៈជាដើម ដែលការចុះផ្សាយនោះ គឺជាការយល់ឃើញតែមួយជ្រុងតែប៉ុណ្ណោះ ដោយមិនមានប្រភពច្បាស់លាស់នោះឡើយ»។ យ៉ាងណា បើតាមលោក អេកូ វ៉ាក់សង ថា ទៅថ្ងៃមុខលោកសង្ឃឹមថា ប្រសិនបើតារាចម្រៀង សុខ ស្រីនាង មានពេលគ្រប់គ្រាន់ នាងអាចនឹងវិលត្រឡប់មកកាន់អាជីពសិល្បៈនេះជាថ្មីម្តងទៀត»៕
ចែករំលែកព័តមាននេះ