នៅពេលនិយាយទៅដល់អតីតតារាចម្រៀង លោក ទិត្យ វិច្ឆិកា មហាជនដែលជាអ្នកគាំទ្រក្នុងចន្លោះឆ្នាំ២០០៤ អាចនឹងស្គាល់លោកហើយ តាមរយៈបទចម្រៀងជាច្រើនរបស់លោក មានដូចជា
រាជធានីភ្នំពេញ ៖ នៅពេលនិយាយទៅដល់អតីតតារាចម្រៀង លោក ទិត្យ វិច្ឆិកា មហាជនដែលជាអ្នកគាំទ្រក្នុងចន្លោះឆ្នាំ២០០៤ អាចនឹងស្គាល់លោកហើយ តាមរយៈបទចម្រៀងជាច្រើនរបស់លោក មានដូចជា ៖ បទ «ស្ទឹងថែស្នេហ៍ខ្ញុំ», បទ«កុំត្រាប់កាកី» និងបទជាច្រើនទៀតដែលច្រៀងទៅទទួលបានការគាំទ្រយ៉ាងខ្លាំងកាលពីជំនាន់នោះ។
ប្រាកដណាស់ កាលពីកន្លងទៅថ្មីៗនេះ អតីតតារាចម្រៀងរូបនេះ បានបង្ហោះរូបភាពមួយសន្លឹកជាមួយកូនស្រីបណ្តូលចិត្តរបស់លោកដែលទើបនឹងកើត អបជាមួយសំណេរយ៉ាងខ្លីថា «ចង់និយាយថា ភ្នែកប៉ាប៉ាខ្មៅដូចផានដាហើយ»។
តាមរយៈរូបភាពមួយសន្លឹកនេះ ធ្វើអោយមហាជនសម្តែងការអបអរសាទរជាខ្លាំង ក្រោយពេលឃើញលោកទទួលបានកូនស្រីម្នាក់ទៀត។ ក្នុងនោះផងដែរ ជាការកត់សម្គាល់ អតីតតារាចម្រៀង លោក ទិត្យ វិច្ឆិកា បានបំពេញតួរនាទីយ៉ាងល្អជាឪពុកមើលថែកូន បើទោះបីជាលោកជាបុរសភេទក៏ដោយ ពោលគឺតួនាទីជាស្វាមីល្អ ជាប៉ាប៉ាដ៏ល្អ ក្នុងការថ្នាក់ថ្នមប្រពន្ធនិងកូន។
តាមរយៈបទសម្ភាសន៍ជាមួយសារព័ត៌មានកោះសន្តិភាព អតីតតារាចម្រៀងលោក ទិត្យ វិច្ឆិកា បានជម្រាបជូនថា «នាពេលបច្ចុប្បន្ននេះ លោកមានសុខទុក្ខធម្មតានោះទេ ហើយកាលដែលបាត់មុខពីសិល្បៈមួយខ្យល់ធំនេះ លោកក៏មានការនឹករលឹកមហាជនជាខ្លាំងណាស់ដែរ»។
បើតាមការបង្ហើបបន្តរបស់អតីតតារាចម្រៀងរូបនេះ បានបន្តថា «លោកបានប្រឡូកក្នុងវិស័យសិល្បៈនេះចាប់តាំងពីឆ្នាំ២០០៤ ដោយកាលនោះសុំគេច្រៀងតាមកន្លែងផ្សេងៗ។ លុះមកដល់ឆ្នាំ២០០៥ លោកក៏បានចូលច្រៀងក្នុងផលិតកម្មមួយ ចេញជា CD ចម្រៀងជាបន្តបន្ទាប់ ដូចជាបទ «ស្ទឹងថែស្នេហ៍ខ្ញុំ» និងបទ «កុំត្រាប់កាកី» សុទ្ធតែជាបទដែលលោកទទួលបានការគាំទ្រខ្លាំង និងមានឈ្មោះបោះសម្លេង»។
នាពេលបច្ចុប្បន្ន តារាចម្រៀង លោក ទិត្យវិច្ឆិកា ដែលជាតារាចម្រៀងក្នុងដួងចិត្តបងប្អូននោះ លោកបានបន្តថា «សម្រាប់ការងារសិល្បៈ គឺលោកមិនប្រឡូកវិញនោះឡើយ ព្រោះវាដូចជាហួសពេលហើយសម្រាប់រូបលោកផ្ទាល់ ដោយឆ្នាំនេះលោកមានអាយុជាង៤០ប្លាយទៅហើយ លោកទុកអោយប្អូនៗស្រករក្រោយទៅចុះ តែអ្វីដែលជាការផ្តាំផ្ញើរបស់លោក សូមរួបរួមគ្នាជាធ្លុងមួយធ្វើអោយសិល្បៈរីកចម្រើនទៅមុខ ព្រោះកាលពីជំនាន់លោក ពុំងាយនឹងទទួលភាពល្បីល្បាញនោះឡើយ ត្រូវសាងកេរ្តិ៍រាប់សិបឆ្នាំ»។
គួររម្លឹកផងដែរថា កាលពីឆ្នាំ២០០៦ តារាចម្រៀង លោក ទិត្យ វិច្ឆិកា រងការរិះគន់យ៉ាងខ្លាំងទាក់ទងនឹងបទ «សុរិយាអស្តង្គត» ដែលជាសំនៀងរបស់លោក ស៊ីន ស៊ីសាមុត ដែលលោកបានលើកយកមកបកស្រាយម្តងទៀតនោះ។
គួរបញ្ជាក់ដែរថា អតីតតារាចម្រៀងលោក ទិត្យវិច្ឆិកា បានបម្រើការក្នុងវិស័យយោធា ឬទ័ពពិសេសនេះ មុនពេលចូលសិល្បៈទៅទៀត ហើយនាពេលបច្ចុប្បន្ននេះ អតីតតារាចម្រៀងរូបនេះមានកូន៤នាក់ទៅហើយ ក្នុងនោះស្រី២នាក់ និងប្រុស២នាក់៕ ដោយ ៖ លីហួ គីមឆាយ
ចែករំលែកព័តមាននេះ