មហាជន ជាពិសេសបណ្តាអ្នកលេងបណ្តាញសង្គម បានបង្ហាញការចាប់អារម្មណ៍ និងភ្ញាក់ផ្អើលយ៉ាងខ្លាំង បន្ទាប់ពីឃើញវីដេអូឃ្លីបមួយបង្ហាញពីបេក្ខភាព Miss Grand Cambodia មួយរូប កំពុងតែបណ្តើរម៉ូតូរបស់ខ្លួននៅតាមដងផ្លូវមួយនាពេលរាត្រី មុលហេតុដោយសារតែ
រាជធានីភ្នំពេញ ៖ មហាជន ជាពិសេសបណ្តាអ្នកលេងបណ្តាញសង្គម បានបង្ហាញការចាប់អារម្មណ៍ និងភ្ញាក់ផ្អើលយ៉ាងខ្លាំង បន្ទាប់ពីឃើញវីដេអូឃ្លីបមួយបង្ហាញពីបេក្ខភាព Miss Grand Cambodia មួយរូប កំពុងតែបណ្តើរម៉ូតូរបស់ខ្លួននៅតាមដងផ្លូវមួយនាពេលរាត្រី មុលហេតុដោយសារតែអស់សាំង ហើយគ្មានលុយសម្រាប់ចាក់សាំង។
ស្រីស្អាត ម៉ូវ សុផាន់ គឺជាបេក្ខនារីតំណាងឱ្យខេត្តស្ទឹងត្រែង បានសម្រេចដាក់ពាក្យប្រឡងនៅក្នុងកម្មវិធីខាងលើ ដើម្បីសម្រេចក្តីស្រមៃរបស់ខ្លួន បើទោះបីជានាងមានជីវភាពខ្វះខាតក៏ដោយ។
តាមរយៈវីដេអូ Tik Tok មួយ ត្រូវបានទម្លាយសកម្មភាពរបស់បេក្ខនារីខាងលើនេះ ដោយអមជាមួយនឹងសារភ្ជាប់ថា «ជាក្មេងស្រីម្នាក់ ដែលមកពីជនបទ មានជីវភាពខ្វះខាត ប៉ុន្តែចង់ដើរតាមក្តីស្រមៃ មានតែបេក្ខភាពដូចគ្នាទេដែលដឹង ក្មេងស្រីម្នាក់នេះលំបាកប៉ុណ្ណា ពេលខ្លះទៅហ្វឹកហាត់ទាំងគ្មានលុយញ៉ាំបាយផង អ្នកក្រីក្រក៏អាចក្លាយជាបវរកញ្ញាបាន អោយតែយើងមានភាពតស៊ូ»។
ដោយឡែកសម្រាប់ផេកហ្វេសប៊ុក «Universe Pageant» ក៏ធ្វើការចែកចាយបន្តនូវរូបភាពវីដេអូខាងលើ ដោយអមជាមួយនឹងសារថា «មើលហើយមានអារម្មណ៍ថា អាណិត Miss Grand ស្ទឹងត្រែង ហើយក៏យល់ពីគាត់ដូចគ្នា ព្រោះគ្នាខំឡើងមកពីខេត្ដ ដើម្បីមកដាក់ពាក្យប្រកួតបវរកញ្ញា ក្នុងការតាមបំពេញក្ដីស្រមៃដែលខ្លួនចង់បាន តែជាក់ស្ដែងជីវភាពគ្នាទាល់ក្រ ទោះបីជាបានសម្រេចក្នុងការចូលរួមប្រឡង ប៉ុន្ដែគ្នាត្រូវចំណាយច្រើន សូម្បីពេលខ្លះមកហាត់ទាំងគ្មានលុយញ៉ាំបាយទៀតផង។ ជាក់ស្ដែងក្នុង Video នេះ មិនមែនមកពីគាត់មិនបានចាក់ទេ តែមកពីគ្មានលុយចាក់សាំងធ្វើដំណើរទៅផ្ទះ នេះហើយជាជីវិតគ្មាន នរណាចង់កើតមកក្រទេ តែក៏សូមសរសើរគាត់ដូចគ្នា ដែលមានការតាំងចិត្ដខ្ពស់ក្នុងចូលមកប្រកួត Miss Grand Cambodia 2023 ស៊ូស៊ូណា»។
យ៉ាងណា ក្រោយឃើញមានការផ្សព្វផ្សាយវីដេអូរបស់ខ្លួនខាងលើនេះ បេក្ខភាពមកពីខេត្តស្ទឹងត្រែង ស្រីស្អាតនាង ម៉ូវ សុផាន់ ក៏បានបង្ហោះសារខ្លីមួយនៅលើបណ្តាញសង្គមរបស់ខ្លួនថា «ខ្ញុំអរគុណច្រើនណាស់បង សម្រាប់ក្ដីស្រឡាញ់ និងការលើកទឹកចិត្ត ខ្ញុំនឹងខំប្រឹងបន្តទៀត ហើយក៏អរគុណដល់បងប្អូនទាំងអស់គ្នាដែលតែងតែគាំទ្រខ្ញុំរហូតមក»។ នាងបញ្ជាក់ថា «ខ្ញុំខំប្រឹង ខ្ញុំតស៊ូតាមលទ្ធភាព សមត្ថភាពរបស់ខ្ញុំ ខ្ញុំមិនចង់ឈ្នះអ្នកណាទេ តែខ្ញុំចង់ឈ្នះខ្លួនឯង»៕
ចែករំលែកព័តមាននេះ