បើទោះបីជាមិនបានគ្រងមកុដក៏ដោយ ប៉ុន្តែកូនស្រីរបស់តារាកំប្លែងនាង អ៊ីត គឺកញ្ញា ង៉ា ស្រីណាន ហៅ ណាន ណាន ក៏បានសម្តែងក្តីរីករាយផងដែរ ក្នុងពេលដែលនាងទទួលបានចំណាត់ថ្នាក់លេខ៣ នៃកម្មវិធី
រាជធានីភ្នំពេញ ៖ បើទោះបីជាមិនបានគ្រងមកុដក៏ដោយ ប៉ុន្តែកូនស្រីរបស់តារាកំប្លែងនាង អ៊ីត គឺកញ្ញា ង៉ា ស្រីណាន ហៅ ណាន ណាន ក៏បានសម្តែងក្តីរីករាយផងដែរ ក្នុងពេលដែលនាងទទួលបានចំណាត់ថ្នាក់លេខ៣ នៃកម្មវិធី «Miss Teen international Cambodia 2023» ដែលទើបនឹងបិទបញ្ចប់កាលពីពេលថ្មីៗនេះ។
ស្រីស្អាត ណាន ណាន បានសម្តែងក្តីរីករាយ ក្រោយពេលនាងជោគជ័យក្នុងជំហ៊ានដំបូងនៃការតស៊ូប្រឹងប្រែងលើវិថីសិល្បៈ តាមរយៈការទទួលលទ្ធផលល្អមួយនាពេលនេះ។ ក្រោយបញ្ចប់ការប្រកួត ស្រីស្អាត ណាន ណាន បានបង្ហោះសារនៅលើបណ្តាញសង្គមថា «ជាដំបូងនាងខ្ញុំ ង៉ា ស្រីណាន សូមអរគុណពុកម៉ែបងប្អូនទាំងអស់គ្នា ការប្រកួតត្រូវបានបញ្ចប់ហើយ នាងខ្ញុំទទួលបានជ័យលាភី 3rd runner up»។
នាងបញ្ជាក់ថា «នាងខ្ញុំរីករាយដែលខ្ញុំទទួលបានជ័យលាភីមួយនេះ ខ្ញុំមកដល់ចំណុចនេះហើយទោះបែបណា ក៏ជាការខិតខំរបស់នាងខ្ញុំ នាងខ្ញុំពិតជាអរគុណទៅដល់គ្រួសារម៉ាក់ប៉ាបងប្អូន អ៊ុំពូមីង ដែលតែងតែលើកទឹកចិត្តនាងខ្ញុំរហូតមកដល់វគ្គនេះ។ ជាចុងក្រោយ នាងខ្ញុំសូមអរគុណទៅដល់កម្មវិធី «Miss teen international Cambodia 2023» និងបងៗក្រុមការងារទាំងអស់ផងដែរ»។
ជាការកត់សម្គាល់ កូនស្រីតារាកំប្លែងនាង អ៊ីត គឺកញ្ញា ង៉ា ស្រីណាន ហៅ ណាន ណាន បានបង្ហាញគោលដៅ និងមហិច្ឆតាខ្ពស់លើវិថីសិល្បៈរបស់ខ្លួននាពេលអនាគត ក្នុងពេលដែលកញ្ញាកំពុងតែតែបញ្ជៀបខ្លួនចូលរួមកម្មវិធីប្រឡងនានាជាបន្តបន្ទាប់។ គោលដៅធំបំផុតនោះ ត្រូវបានតារាស្រីវ័យ១៨ឆ្នាំរូបនេះបញ្ជាក់ថា «ខ្លួនចង់មានភាពល្បីល្បាញនៅលើវិថីសិល្បៈទាំងការសម្តែងច្រៀង និងដើរម៉ូដ ដើម្បីតបស្នងគុណម្តាយ»។
កញ្ញា ង៉ា ស្រីណាន ធ្លាប់បានអះអាងប្រាប់កោះសន្តិភាពតាមសារអេឡិចត្រូនិចថា «ចាប់តាំងពីធំដឹងក្តីមក នាងពិតជាស្រឡាញ់វិស័យសិល្បៈនេះខ្លាំងណាស់ មិនថាការសម្តែង ច្រៀង និងការដើរម៉ូដនោះឡើយ»។ នាងបញ្ជាក់ថា «កន្លងមក នាងក៏ធ្លាប់បានចូលរួមការប្រឡងនានាជាបន្តបន្ទាប់ បើទោះបីជាការប្រឡងនោះ នាងនៅមិនទាន់សម្រេចគោលដៅណាមួយក៏ដោយ។ ប៉ុន្តែនាងមិនដែលអស់សង្ឃឹម ឬក៏ចុះចាញ់ឡើយ ពោលគឺនាងក៏នៅតែខិតខំអភិវឌ្ឍន៍ខ្លួនបន្ថែមទៀត ដើម្បីសម្រេចគោលដៅដែលនាងចង់បាន»។
ស្រីស្អាត ង៉ា ស្រីណាន បានលើកបន្ថែមថា «ការចូលសិល្បៈ និងការដាក់ពាក្យនៅក្នុងកម្មវិធីនានាពេលកន្លងមកនេះ គឺនាងតែងតែមានការលើកទឹកចិត្តពីម្តាយរបស់នាង (អ្នកនាង អ៊ីត) ជានិច្ច ហេតុនេះនឹងខិតខំប្រឹងប្រែង ដើម្បីអោយម្តាយរបស់នាងសប្បាយចិត្ត»។ នាងបញ្ជាក់ថា «ការខិតខំរបស់នាងនៅក្នុងវិស័យសិល្បៈនេះ គោលដៅសំខាន់នោះ គឺសាងភាពល្បីល្បាញ និងអោយម្តាយរបស់នាងសប្បាយចិត្ត ព្រោះម្តាយជាអ្វីៗគ្រប់យ៉ាងសម្រាប់នាង»។
នាងបញ្ជាក់ថា «នាងធ្លាប់ចូលរួមប្រឡងជាបន្តបន្ទាប់រួចហើយ ហេតុនេះនាងក៏មិនមានអារម្មណ៍ភ័យខ្លាចសម្រាប់ការប្រឡងនាពេលនេះឡើយ»។ នាងបន្ថែមថា «ការប្រឡងកម្មវិធីខាងលើនេះ គឺមានការហ្វឹកហាត់ និងបង្ហាត់បង្រៀនយ៉ាងយកចិត្តទុកដាក់ និងត្រឹមត្រូវតាមក្បួនខ្នាត»។
យ៉ាងណា បើតាមស្រីស្អាត ង៉ា ស្រីណាន ថា «ប្រសិនបើការប្រឡងលើកនេះ នាងមិនអាចទទួលបានលទ្ធផល នាងក៏មិនអស់សង្ឃឹមអ្វីឡើយ ដោយចាត់ទុកនេះថា នេះគឺជាបទពិសោធន៍ថ្មីមួយទៀតសម្រាប់នាង ហើយនាងនឹងខិតខំតស៊ូខ្លាំងបន្ថែមទៀតសម្រាប់កម្មវិធីក្រោយៗទៀត»៕
ចែករំលែកព័តមាននេះ