តារាសម្តែងលោក សាយ សៀរ៉ា បានការលើកឡើងថា មួយរយៈចុងក្រោយនេះ ការងារសិល្បៈសម្រាប់រូបលោក និងអ្នកសិល្បៈមួយចំនួនទៀត គឺស្ងាត់ ពោលគឺមិនមានផលិតកម្មណាហៅថតនោះឡើយ ខណៈពេលការពឹងលើចំណូលមួយនេះ
រាជធានីភ្នំពេញ ៖ តារាសម្តែងលោក សាយ សៀរ៉ា បានការលើកឡើងថា មួយរយៈចុងក្រោយនេះ ការងារសិល្បៈសម្រាប់រូបលោក និងអ្នកសិល្បៈមួយចំនួនទៀត គឺស្ងាត់ ពោលគឺមិនមានផលិតកម្មណាហៅថតនោះឡើយ ខណៈពេលការពឹងលើចំណូលមួយនេះរបស់លោកហាក់ស្ទើរតែដាច់បាយទៅហើយ។
ធ្លាប់ជាតារាដែលមានឈ្មោះបោះសម្លេងមួយរូប កាលពីពេលកន្លងទៅ ប៉ុន្តែមួយរយៈចុងក្រោយនេះ លោក សាយ សៀរ៉ា ហាក់ស្ងប់ស្ងាត់មិនបានបង្ហាញវត្តមានសម្តែងថ្មីៗទៀតឡើយ ក្នុងពេលតារារួមជំនាន់របស់លោកមួយចំនួននៅតែមានទីផ្សារសិល្បៈជាបន្តបន្ទាប់។
តារាសម្តែងរូបនេះ ក៏បានទទួលស្គាល់ថា «រូបលោកពិតជាស្ងប់ស្ងាត់ក្នុងអាជីពសិល្បៈពិតប្រាកដមែនមួយរយៈនេះ ខណៈពេលដែលលោកបានងាកមកចាប់មុខរបរថ្មី គឺការលក់ផលិតផលផ្សេងៗតាមអនឡាញ»។ តារាសម្តែងលោក សាយ សៀរ៉ា បានលើកឡើងតាមរយៈសំណេរដែលបង្ហោះលើបណ្តាញសង្គមថា «ជីវិតនឹងការងារ. មួយរយៈនេះស្ងាត់ដូចយប់ បើនិយាយពីសិល្បៈវិញចប់. និយាយមិនចេញ. រឿងក៏ស្ងាត់ ខារ៉ាអខេក៏ស្ងាត់ តួរខ្លះដាច់បាយហើយដូចជារូបខ្ញុំជាដើម. ល្អមើលតែមិនល្អស៊ី»។
ជាការកត់សម្គាល់ ពាក់ព័ន្ធទៅនឹងបញ្ហាខាងលើនេះ កន្លងមក តារាសម្តែងលោក សាយ សៀរ៉ា ក៏ធ្លាប់ចេញមុខរិះគន់ទៅកាន់ផលិតកម្ម និងផលិតករមួយចំនួនដែលបានទម្លាក់ចោលតួចាស់ ហើយផ្តល់ឱកាសអោយតែតារាជំនាន់ក្រោយ។ ដោយលោកធ្លាប់បានលើកឡើងថា «ម្ចាស់ផលិតកម្ម ឬផលិតករ បានផ្ដល់ឱកាសដល់ក្មេងជំនាន់ក្រោយខ្លាំងពេក ស្ទើរតែផាត់ចោលតារាសម្ដែងចាស់ៗ ដែលមានសមត្ថភាព ហើយមហាជនធ្លាប់ស្គាល់ច្រើន កំពុងត្រូវការទីផ្សារការងារសិល្បៈដូចក្មេងៗស្រកក្រោយដែរ»។
លោក សាយ សៀរ៉ា បញ្ជាក់ថា «បច្ចុប្បន្នលោកត្រូវពឹងលើចំណូលពីការ Live លក់ផលិតផលឲ្យគេ ធ្វើជាពិធីករ និងចម្រៀងតាមរោងការបន្ដិចបន្ដួចតែប៉ុណ្ណោះ តែសម្រាប់ទីផ្សារសម្ដែងក្នុងខ្សែភាពយន្ដ ឬស្ពតពាណិជ្ជកម្មមិនសូវមានឡើយ»។
យ៉ាងណាបើតាមលោក សាយ សៀរ៉ា ថា «ផលិតករ ឬម្ចាស់ផលិតកម្ម នៅតែអាចទទួលយកពួកគាត់ទៅថតបានដូចដើម ដោយគេគ្រាន់តែដាក់តួពួកលោកទៅជា តួបងប្រុស ឪពុក ឬតួផ្សេងៗ ដែលមានវ័យចំណាស់ គឺដាក់បានដូចតែគ្នាឲ្យតែចង់ផ្ដល់ឱកាស»៕
ចែករំលែកព័តមាននេះ