តារាសម្តែង និងបង្ហាញម៉ូដនាង ព្រីម លីហ្សា បានចេញមុខបញ្ជាក់រឿងរ៉ាវនៅពីក្រោយខ្នង ដែលនាងចូលចិត្តបង្ហាញរូបភាពបង្អួតសម្ភារៈនិយមនៅលើបណ្តាញសង្គម ក្រោយពីមានមហាជនមួយចំនួនបានធ្វើការរិះគន់មកលើរូបនាង ចំពោះរឿង
រាជធានីភ្នំពេញ ៖ តារាសម្តែង និងបង្ហាញម៉ូដនាង ព្រីម លីហ្សា បានចេញមុខបញ្ជាក់រឿងរ៉ាវនៅពីក្រោយខ្នង ដែលនាងចូលចិត្តបង្ហាញរូបភាពបង្អួតសម្ភារៈនិយមនៅលើបណ្តាញសង្គម ក្រោយពីមានមហាជនមួយចំនួនបានធ្វើការរិះគន់មកលើរូបនាង ចំពោះរឿងមួយនេះ។
ស្រីស្អាត ព្រីម លីហ្សា បានចាត់ទុកមតិនៃការរិះគន់ពីមហាជនមកលើរូបនាងចំពោះបញ្ហានេះ គឺដោយសារមិនបានដឹងរឿងពិត ខណៈពេលអ្វីដែលនាងបានធ្វើនេះ គឺក្នុងគោលបំណងចង់អោយមហាជនខ្មែរមានការចាប់អារម្មណ៍ និងងាកមកគាំទ្រ ព្រមទាំងស្ទួយវិស័យម៉ូដតែប៉ុណ្ណោះ។
ស្រីស្អាត ព្រីម លីហ្សា បានលើកឡើងថា «ខ្ញុំស្រឡាញ់វិស័យ Fashion ហើយគួបផ្សំជាមួយនឹងខ្ញុំបានឃើញអ្នកដែលរៀននៅក្នុងវិស័យច្នៃម៉ូដនៅក្នុងប្រទេសរបស់យើង សុទ្ធសឹងតែជាអ្នកដែលមានសមត្ថភាព ក៏ប៉ុន្តែមិនត្រូវបានការឲ្យតម្លៃ ហើយមិនមើលឃើញពីសមត្ថភាពរបស់ពួកគាត់»។
នាងបញ្ជាក់ថា «អ្វីដែលសំខាន់ មិនត្រូវបានការទទួលស្គាល់ពីមហាជន ចំណុចនេះគឺវាពិតជាសំខាន់ខ្លាំងណាស់ ទើបខ្ញុំតែងតែបង្ហាញពី fashion ផ្ទាល់ខ្លួនរបស់ខ្ញុំ ដើម្បីឱ្យពុកម៉ែបងប្អូនទាំងអស់គ្នាយល់ច្បាស់អំពីវិស័យមួយនេះ ហើយជួយជំរុញវិស័យមួយនេះឲ្យកាន់តែមានភាពរីកចម្រើននៅក្នុងប្រទេសរបស់យើងនាពេលបច្ចុប្បន្ន សូម្បីតែទស្សនាវដ្តីដែលនិយាយអំពីវិស័យម៉ូដក៏លែងផ្សព្វផ្សាយ លែងបោះពុម្ពអស់ដែរ»។
នាងថា «តើអ្នកទាំងអស់គ្នាគិតថា វិស័យមួយនេះមានភាពរីកចំរើនតទៅមុខបានដោយរបៀបណា? ខ្ញុំខំណាស់ ព្យាយាមណាស់ ធ្វើយ៉ាងណាឱ្យវិស័យមួយនេះ មានភាពរីកចម្រើននៅក្នុងប្រទេសរបស់យើង ឲ្យកាន់តែខ្លាំង តែបែរជាត្រូវបានពុកម៉ែបងប្អូនមួយចំនួនតូច គាត់គិតថា ខ្ញុំជាមនុស្សបង្អួត និងសម្ញែងពីសម្ភារៈនិយមទៅវិញ អញ្ចឹងហើយមានតែពេលវេលាតែប៉ុណ្ណោះ ទើបធ្វើឲ្យពុកម៉ែបងប្អូនទាំងអស់គ្នាយល់ច្បាស់អំពីអ្វីដែលខ្ញុំកំពុងតែធ្វើ តែក៏ខ្ញុំសូមអរគុណទៅកាន់ពុកម៉ែបងប្អូនដែលជាអ្នកគាំទ្ររបស់ខ្ញុំ ដែលតែងតែយល់អំពីអ្វីដែលខ្ញុំកំពុងធ្វើជានិច្ច»។
ស្រីស្អាត លីហ្សា បានឲ្យដឹងបន្ថែមថា« វិស័យម៉ូដ ដែលយើងអាចហៅថា ជាវិស័យ Fashion បច្ចុប្បន្នគឺមិនសូវមានភាពរីកចម្រើននោះទេ ហើយនាងចង់ឲ្យប្រទេសកម្ពុជា មានភាពរីកចំរើនខ្លាំង ព្រោះនាងស្រលាញ់វិស័យម៉ូដនេះខ្លាំងណាស់ ហើយហេតុដែលនាំឲ្យនាងស្លៀកពាក់បែប Fashion សិចស៊ីនេះ គឺព្រោះតែចង់បង្ហាញ និងបញ្ជាក់ឲ្យប្រិយមិត្តបានយល់ពីវិស័យម៉ូដផងដែរ» ។
តារាសាច់សខ្ចីរូបនេះ បានបន្ថែមថា «នាងចង់ឲ្យបងប្អូនចំណាយពេលវេលាបន្តិចក្នុងការមើលពីរូបភាពរបស់នាង ព្រោះវាសុទ្ធតែជារូបភាពបង្ហាញពីភាពរឹងមាំរបស់ស្ត្រីសម័យថ្មីនៅក្នុងឈុតសម្លៀកបំពាក់បែបប្លែកភ្នែក មិនមែនបង្ហាញឈុតសម្លៀកបំពាក់តែលើភាពសិចស៊ីមួយមុខនោះទេ។ ទាំងនេះហើយ ដែលនាងចង់ចែករំលែកឲ្យទាំងអស់គ្នាបានដឹង ព្រោះរាល់រូបភាពរបស់នាងតែងតែបញ្ជាក់ពីអត្ថន័យជានិច្ច»។
ស្រីស្អាត លីហ្សា បានបន្ថែមទៀតថា «ចំពោះការរៀបចំឈុតសម្លៀកបំពាក់បែបប្លែកភ្នែកនេះ នាងចំណាយពេលវេលា និងការហត់នឿយខ្លាំងណាស់ទំរាំតែបានមួយឈុតៗ ហើយអ្វីដែលសំខាន់នាងស្ទើរតែពេលខ្លះមិនបានគេង ហើយពេលខ្លះទៀតអាចឆ្លងដល់២ទៅ៣ថ្ងៃ ទម្រាំតែអាចរៀបចំសម្លៀកបំពាក់បាន ព្រោះតែចង់ឲ្យបងប្អូនទាំងអស់គ្នាបានឃើញពីឈុតសម្លៀកបំពាក់បែបប្លែកភ្នែកខ្លាំង ដែលផុសចេញពីគំនិតក្នុងការគិត និងការរៀបចំរបស់នាងផ្ទាល់»៕
ចែករំលែកព័តមាននេះ