រាជធានីភ្នំពេញ ៖ ក្រុមប្រឹក្សាភិបាលសមាគមសិល្បករខ្មែរ លោកឧកញ៉ា ហេង ឡុង បានចេញមុខសំណូមពរដល់ក្រសួងវប្បធម៌ និងវិចិត្រសិល្បៈ កោះហៅអ្នកសិល្បៈរូបណាដែលបានប្រើប្រាស់ពាក្យសម្តីអសុរោះតាមបណ្តាញសង្គម ខណៈពេលករណីនេះបានកើតឡើងជាបន្តបន្ទាប់។ ការសំណូមពររបស់លោក ហេង ឡុង នាពេលនេះ បានធ្វើឡើង បន្ទាប់ពីមួយរយៈចុងក្រោយនេះ មានករណីអ្នកសិល្បៈមួយចំនួនបានយកបណ្តាញសង្គមធ្វើជាវេទិកាឆ្លើយឆ្លងគ្នា ដោយខ្លះបានប្រើប្រាស់ពាក្យសម្តីមិនសមរម្យផងដែរ។
លោក ហេង ឡុង បានបង្ហោះសារនៅលើបណ្តាញសង្គមថា «សំណូមពរក្រសួងវប្បធម៌ មានការប្រៀនប្រដៅចំពោះអ្នកសិល្បៈដែលប្រើពាក្យអសុរោះតាមបណ្ដាញសង្គម»។ បន្ថែមពីលើនេះ លោកក៏បានបញ្ជាក់ដែរថា «បងប្អូនដែលមានការងារពាក់ព័ន្ធនឹងសិល្បៈ ហើយប្រើប្រាស់បណ្ដាញសង្គមដោយគ្មានសីលធម៌ មិនចាត់ទុកថា ជាអ្នកសិល្បៈឡើយ!»។
តាមរយៈសំណេរដែលលោក ហេង ឡុង បានសរសេរខាងលើនេះ គេក៏បានឃើញមានមហាជន និងអ្នកសិល្បៈមួយចំនួនសម្តែងការគាំទ្រផងដែរ។
ជាការកត់សម្គាល់ នៅមុនពេលដែលមានការសំណូមពរពីលោក ហេង ឡុង ខាងលើនេះ គេឃើញមានអ្នកសិល្បៈចាស់មួយចំនួនក៏បានបញ្ចេញមតិ និងទស្សនៈផ្ទាល់ខ្លួនពាក់ព័ន្ធទៅនឹងពាក្យថា «តារា និងរៀបចំខ្លួនក្នុងនាមជាតារា»។
អ្នករៀបចំកម្មវិធីកម្សាន្ត លោក គួច ខេវិន ធ្លាប់បានបញ្ចេញទស្សនៈរបស់លោកថា «នៅក្នុងភាសាខ្មែរពាក្យថា តារា (តារាករ ឬតារានិករ) គឺគេសំដៅទៅលើផ្កាយដែលរះចិញ្ចែងចិញ្ចាចនៅលើមេឃា។ នៅក្នុងវិស័យសិល្បៈវប្បធម៌ខ្មែរយើង គេក៏បានផ្តល់ពាក្យថា តារានេះ សំដៅទៅលើសិល្បករ សិល្បការិនីណាដែលមានទេពកោសល្យ មានស្នាដៃឆ្នើម មានភាពល្បីល្បាញគ្មានអ្នកប្រៀបប្រដូចបាន ទាំងលើការសម្តែង និងច្រៀងជាដើម។ គេពុំដែលហៅពពួកមនុស្សឆើតឆាយ ចាយឬក ចាយរាង ហើយយកទូរស័ព្ទមកថតខ្លួនឯងសម្ញែងទាក់ប្រុស ទាញស្រី ដើម្បីបានការចាប់អារម្មណ៍ពីគេឯង ដើម្បីតែផលប្រយោជន៍បុគ្គលនោះថា ជាតារាឡើយ»។
លោក គួច ខេវិន បន្តថា «ប៉ុន្តែបច្ចុប្បន្ន ប្រភេទមនុស្សបែបនេះហាក់មានច្រើននៅក្នុងសង្គម Youtube Facebook TikTok Online ជាដើម។ ហើយក៏មានប្រភេទមនុស្សច្រើនគួរសមដែរ ដូចពួកប្រុសព្រាន ស្រីញៀននឹងភាពបង្អួតកេរ្តិ៍ម៉ែ តែងតែច្រឡំតាំងខ្លួនជាតារា និងយល់ច្រឡំចំពោះតារា ដែលនាំឲ្យអាប់ឱនកិត្តិយស ខូចខាតតម្លៃនៃវប្បធម៌សិល្បៈខ្មែរយ៉ាងធ្ងន់ធ្ងរ ជាពិសេសធ្វើឲ្យប៉ះពាល់ចំពោះអ្នកសិល្បៈពិតប្រាកដនោះតែម្តង។ ខ្ញុំចង់ឲ្យប្រុសព្រាន ញៀ.នស្រីញី និងពួកនារីចិត្តងាយតែងកាយទាក់ប្រុស ឈប់ប្រើពាក្យតារាហៅខ្លួនឯង និងយល់ច្រឡំចំពោះតារា ហើយប្រព្រឹត្តិអំពើស្មោកគ្រោកនាំឲ្យខូចពាក្យ «តារា» និងអាប់ឱនទៅដល់តម្លៃនៃសិល្បៈវប្បធម៌ខ្មែរតទៅទៀត»។
ដោយឡែកតារាចម្រៀងលោក ឃុំ ប៉ុណ្ណាដែត ក៏បានលើកឡើងដែរថា «គេបែងចែកអ្នកសិល្បៈជា៤ប្រភេទ គឺ ទី១- គឺសិល្បករ ៖ សិល្បករក្នុងន័យនេះ មិនសំដៅលើទម្រង់សិល្បៈណាមួយទេ ពោលគឺឱ្យតែមានចំណេះជំនាញក្នុងផ្នែកណាមួយនៃទម្រង់សិល្បៈទាំង៧ប្រភេទ គឺសិល្បៈស្ថាបត្យកម្ម សិល្បៈចម្លាក់ សិល្បៈគំនូរ សិល្បៈតន្ដ្រី សិល្បៈរបាំ អក្សរសិល្ប៍ និងភាពយន្ត។ ទី២- គឺអ្នកសម្ដែង ៖ អ្នកសម្ដែងសំដៅលើបុគ្គលដែលបានចូលរួមបញ្ចេញស្នាដៃ ឬលេចវត្តមានក្នុងការសម្រេចស្នាដៃសិល្បៈណាមួយ។ ឧទាហរណ៍ ៖ ដូចជាតួអមឆាកក្នុងវិស័យភាពយន្ដជាដើម។ ទី៣- គឺតួសម្ដែង ៖ តួសម្ដែងមានន័យថា បុគ្គលរូបណាដែលបានចូលរួមក្នុងវិស័យភាពយន្ដ ហើយមានឈ្មោះល្បីទទួលស្គាល់ពីមហាជន។ ទី៤- ជាងារដ៏ឧត្ដមបំផុតនោះ គឺពាក្យថា «តារា» ៖ តារា មានន័យថា ជាអ្នកដែលបានទទួលនូវងារដ៏កំពូលមួយ និងមានកេរ្តិ៍ឈ្មោះល្បីល្បាញខ្លាំង ហើយមានតម្លៃខ្ពស់។ គឺជាបុគ្គលដែលមានស្នាដៃ និងទេពកោសល្យខ្ពស់ រហូតក្លាយជានិមិត្តរូបក្នុងវិស័យសិល្បៈជាតិទាំងមូល»។
អ្នកសិក្សាស្រាវជ្រាវលើវិស័យសិល្បៈជំនាន់ដើមរូបនេះ បានបន្ដឱ្យដឹងថា «ដើម្បីឱ្យងារថា «តារា» មានតម្លៃ ទី១ គឺបុគ្គលខ្លួនឯងផ្ទាល់ត្រូវឱ្យតម្លៃលើខ្លួនឯង»។ លោកថា «ក្នុងនាមជាតារាត្រូវមានទាំងចរិយាសម្បត្តិ និងគុណសម្បត្តិ។ ទី២ គឺ មហាជន ក៏ដូចជាអ្នកសារព័ត៌មានត្រូវយល់ពីអត្ថន័យ និងបែងចែកឱ្យបានច្បាស់ថា បុគ្គលរូបណាជា «តារា» ពិតប្រាកដ ចៀសវាងលើកបន្ទុកអ្នកដែលគ្រាន់តែទទួលការចាប់អារម្មណ៍ក្នុងបណ្ដាញសង្គមត្រឹមតែរយៈពេលខ្លីថាជា «តារា» ដែលជាហេតុនាំឱ្យតម្លៃនៃ «តារា» ពិតប្រាកដមានការធ្លាក់ចុះ»។
ចំណែកផលិតករ លោក ខាំ ភូរិ ក៏បានធ្វើការចែកចាយព័ត៌មានដែលបានចុះផ្សាយនូវរឿងរ៉ាវរបស់ រ៉ូស និងលោក ឃុំ ប៉ុណ្ណាដែត ដោយអមជាមួយនឹងសំណេរថា «តម្លៃរបស់សិល្បករខ្មែរបានធ្លាក់ចុះយ៉ាងងាយ នៅពេលម្ចាស់ផលិតផល អ្នករៀបចំកម្មវិធីទូរទស្សន៍នានា សារព័ត៌មានមួយចំនួន បានលើកស្ទួយពួកបំពុលសង្គមអោយក្លាយជាតារា និងក្លាយជាទីចាប់អារម្មណ៍របស់សង្គម»។ លោកបញ្ជាក់ថា «សីលធម៌សង្គមក៏បានធ្លាក់ថែមទៀត នៅពេលយុវជនជំនាន់ក្រោយ បានឃើញរឿងទាំងនេះញឹកញាប់ទៅ»៕
ចែករំលែកព័តមាននេះ