សិល្បករ សិល្បការិនិមានក្របខណ្ឌជាមន្ដ្រីរាជការ ទាំងអ្នកសិល្បៈក្រៅប្រព័ន្ធប្រមាណជាង១ពាន់រូប បានទទួលគ្រឿងឥស្សរិយយសពីព្រះមហាក្សត្រ នៃព្រះរាជាណាចក្រកម្ពុជា ក្នុងពេលអ្នកសិល្បៈទាំងអស់នោះមានស្នាដៃល្អឆ្នើម និងបាន
រាជធានីភ្នំពេញ ៖ សិល្បករ សិល្បការិនិមានក្របខណ្ឌជាមន្ដ្រីរាជការ ទាំងអ្នកសិល្បៈក្រៅប្រព័ន្ធប្រមាណជាង១ពាន់រូប បានទទួលគ្រឿងឥស្សរិយយសពីព្រះមហាក្សត្រ នៃព្រះរាជាណាចក្រកម្ពុជា ក្នុងពេលអ្នកសិល្បៈទាំងអស់នោះមានស្នាដៃល្អឆ្នើម និងបានចូលរួមអភិវឌ្ឍសង្គមជាតិ។
អ្នកសិល្បៈចំនួន១៥០២នាក់ ត្រូវបានព្រះមហាក្សត្រ ប្រោសប្រទាននូវគ្រឿងឥស្សរិយយសតាមលំដាប់ថ្នាក់ បន្ទាប់ពីមើលឃើញអ្នកសិល្បៈទាំងអស់នោះ បានចូលរួមចំណែកអភិរក្ស ថែរក្សា និងលើកស្ទួយដល់វប្បធម៌សិល្បៈប្រពៃណី ក៏ដូចជាការរួមចំណែកក្នុងសកម្មភាពមនុស្សធម៌ផ្សេងៗជួយដល់សង្គមជាតិ ជាពិសេសការចូលរួមជាមួយរាជរដ្ឋាភិបាល ក្នុងការជំរុញផលិតកម្ម សិប្បកម្ម វប្បធម៌ ការបង្កើតស្នាដៃថ្មីៗ ការផ្សព្វផ្សាយអំពីផលិតផលវប្បធម៌ខ្មែរដ៏សម្បូរបែប និងការស្វែងរកទីផ្សារ សម្រាប់ផលិតផលវប្បធម៌របស់ប្រជាជន សំដៅរួមចំណែកកាត់បន្ថយភាពក្រីក្រជូនប្រជាជន និងផ្ដល់ការអប់រំដល់សង្គមជាតិទាំងមូល។
សម្រាប់គ្រឿងឥស្សរិយយសថ្នាក់ជាតូបការ គេឃើញមានសិល្បករជើងចាស់ផ្នែកចាប៉ីដងវែង ទទួលបាន គឺព្រឹទ្ធាចារ្យកោសល្យវោហា គង់ ណៃ ផងដែរ។
ចំណែកគ្រឿងឥស្សរិយយសព្រះរាជាណាចក្រកម្ពុជា ថ្នាក់មហាសេរីវឌ្ឍន៍ មានតារាចម្រៀងលោក ណូយ វ៉ាន់ណេត, តារាកំប្លែងលោក ជួង ជី ហៅ កុយ, ឧកញ៉ា ព្រាប សុវត្ថិ, អ្នកស្រី ណយ សំណាង, អ្នកនាង ម៉េង កែវពេជ្ជតា, លោក នូ ស៊ីប, លោកស្រី ហ៊ឹម ស៊ីវន, អ្នកស្រី សួន សំអឿន ហៅយាយ អឿន, លោក សុវណ្ណ រឹទ្ធី ហៅតាវ៉ិចទ័រ, លោក អ៊ូ ប៊ុនណារ៉ាត់ ហៅក្រឹម, អ្នកនាង ឱក សុគន្ធកញ្ញា, លោក ឆន សុវណ្ណរាជ និងលោក ណុប បាយ៉ារិទ្ធ ជាដើម។ល។
ចំណែកគ្រឿងឥស្សរិយយសមុនីសារាភ័ណ ថ្នាក់មហាសេរីវឌ្ឍន៍ គេឃើញមានតារាសម្តែងជើងចាស់ គឺលោកស្រី ឌី សាវ៉េត, លោក ចៅ ច័ន្ទណារី, ប្រធានសមាគមសិល្បករខ្មែរអ្នកនាង ចន ច័ន្ទលក្ខិណា, លោក មាស សារ៉ាន់, លោក ហម ឈរ៉ា, លោក អ៊ឹម ជីវ៉ា និងតារាចម្រៀងលោក នៅ ស៊ីនឿន ជាដើម ។ល។
គ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេនា គេឃើញមានអ្នកនាង ខាត់ សុឃីម, លោក ទេព រិនដារ៉ូ និងលោក ជា សំណាង ជាដើម។ល។
ដោយឡែកក៏មានគ្រឿងឥស្សរិយយសតាមថ្នាក់មួយចំនួនទៀត ក៏ត្រូវបានព្រះមហាក្សត្រ ប្រោសប្រទានចំពោះអ្នកសិល្បៈទាំងចាស់ទាំងថ្មីជាច្រើននាក់ទៀតផងដែរ៕
ចែករំលែកព័តមាននេះ