ខេត្តកំពង់ចាម ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានរំលឹកថា កាលផ្ទុះជំងឺសារ និងជំងឺកូវីដ-១៩ កម្ពុជាជាអ្នកផ្គត់ផ្គង់សំលៀកបំពាក់របស់គ្រូពេទ្យ…
ខេត្តកំពង់ចាម ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានរំលឹកថា កាលផ្ទុះជំងឺសារ និងជំងឺកូវីដ-១៩ កម្ពុជាជាអ្នកផ្គត់ផ្គង់សំលៀកបំពាក់របស់គ្រូពេទ្យ និងម៉ាស់ធំជាងគេបំផុតសម្រាប់ការនាំចេញទៅក្រៅប្រទេស ។
ថ្លែងនាឱកាសអញ្ជើញចុះជួបសំណេះសំណាល និងសួរសុខទុក្ខដល់កូនក្មួយកម្មករកម្មការិនី នៅរោងចក្រឡឺក្រោន ស៊ូ អ៊ិនដាសស្ត្រី (LECROWN SHOES INDUSTRY) នៅស្រុកជើងព្រៃ ខេត្តកំពង់ចាម នាព្រឹកថ្ងៃទី១៦ ខែមិថុនា ឆ្នាំ២០២៣ សម្ដេចតេជោ ហ៊ុន សែន បានលើកឡើងថា កាលពីឆ្នាំ២០០៣ កម្ពុជាជាអ្នកផ្គត់ផ្គង់អាវពេទ្យ សម្រាប់នាំចេញទៅក្រៅប្រទេស ដើម្បីព្យាបាលជំងឺសារ ។
សម្ដេចតេជោ នាយករដ្ឋមន្ត្រីបានគូសបញ្ជាក់ថា «នៅពេលជំងឺសារផ្ទុះឡើងនៅឆ្នាំ២០០៣ កុំភ្លេចថា កម្ពុជាជាអ្នកផ្គត់ផ្គង់ធំជាងគេទៅលើសំលៀកបំពាក់សម្រាប់គ្រូពេទ្យការពារជំងឺសារ គឺនាំចេញពីកំពង់ចាម ទៅផ្គតផ្គង់» ។
លើសពីនេះ សម្ដេចនាយករដ្ឋមន្ដ្រី លើកឡើងទៀតថា ដោយឡែកកាលផ្ទុះជំងឺកូវីដ-១៩ កម្ពុជាក៏ជាអ្នកផ្គត់ផ្គង់ម៉ាស់ធំជាងគេសម្រាប់នាំចេញទៅក្រៅប្រទេសផងដែរ ។
សម្ដេច គូសបញ្ជាក់ទៀតថា «នៅពេលចាប់ផ្ដើមផ្ទុះកូវីដ ស្រុកខ្មែរ គឺជាប្រទេសនាំចេញម៉ាស់សម្រាប់ផ្គតផ្គង់ឲ្យក្រៅប្រទេស ដែលនាំចេញពីខេត្តកំពង់ចាមផង នាំចេញពីស្វាយរៀងផង និងតាមរោងចក្រខេត្តមួយចំនួនទៀត» ។
នាឱកាសនោះ សម្ដេចតេជោ ហ៊ុន សែន បានលើកឡើងថា ជាចក្ខុវិស័យរបស់រាជរដ្ឋាភិបាលកម្ពុជា គឺមិនគ្រាន់តែទាក់ទាញការវិនិយោគនៅរាជធានីភ្នំពេញនោះទេ តែព្រមទាំងការរៀបចំឲ្យមានការវិនិយោគនៅតាមបណ្ដាខេត្តនានារបស់កម្ពុជា ដើម្បីកាត់បន្ថយការធ្វើចំណាកស្រុក និងដើម្បីលើកកម្ពស់ជីវភាពរបស់ប្រជាពលរដ្ឋនៅតាមខេត្ត ៕
ចែករំលែកព័តមាននេះ